ଫେସବୁକ ପୋଷ୍ଟ ପାଇଁ ଯୁବକଙ୍କୁ ଗୁଳି କରି ହତ୍ୟା

ପାଟନା: ବୁଧବାର ରାତିରେ ବିହାର ରାଜଧାନୀ ପାଟନାରେ ଜଣେ ଯୁବକଙ୍କୁ ଗୁଳି କରି ହତ୍ୟା କରାଯାଇଛି। ଫେସବୁକ୍ ପୋଷ୍ଟକୁ ନେଇ ଚାଲିଥିବା ବିବାଦ ଯୋଗୁଁ ଏହି ଘଟଣା ଘଟିଥିବା କୁହାଯାଉଛି। ଏହି ମାମଲା ଖୁସରୁପୁର ପୁଲିସ ଷ୍ଟେସନ ଅନ୍ତର୍ଗତ ଗୋବିନ୍ଦପୁର ଗ୍ରାମରେ ଘଟିଯାଇଛି | ମିଳିଥିବା ସୂଚନା ମୁତାବକ ଯୁବକ ଜଣକ ଏକ ଘରୋଇ କାରଖାନାରୁ ଡ୍ୟୁଟି କରି ସାଇକେଲ ଯୋଗେ ଘରକୁ ଫେରୁଥିଲେ। ଏହି ସମୟରେ ତାଙ୍କୁ ରାସ୍ତାରେ ଗୁଳି କରାଯାଇଥିଲା। ଏହି ଯୁବକ ଜଣକ ଇଶୋପୁର ଗାଁର ବାସିନ୍ଦା ସୁଜିତ କୁମାର (୨୦) ବୋଲି ଜଣାପଡିଛି।

ପ୍ରାଥମିକ ତଦନ୍ତରୁ ଜଣାପଡିଛି ଯେ ଉକ୍ତ ଯୁବକ ଜଣଙ୍କର ତାଙ୍କ ବନ୍ଧୁଙ୍କ ସହ ଏକ ଫେସବୁକ ପୋଷ୍ଟକୁ ନେଇ ବିବାଦ ଥିଲା | ଫେସବୁକ ପୋଷ୍ଟକୁ ନେଇ ଉଭୟଙ୍କ ମଧ୍ୟରେ କିଛି ଦିନ ଧରି ତୀବ୍ର ବିବାଦ ଲାଗି ରହିଥିଲା। ବିବାଦ ଏତେ ବଢିଯାଇଥିଲା ଫେସବୁକରେ ତାଙ୍କୁ ମାରିଦେବାର ଧମକ ମଧ୍ୟ ଦିଆଯାଇଥିଲା। ମୃତ ଯୁବକଙ୍କ ବାପା କହିଛନ୍ତି ଯେ ତିନି-ଚାରି ଦିନ ପୂର୍ବରୁ ସେ ସୂଚନା ପାଇଥିଲେ ଯେ ତାଙ୍କ ପୁଅର ଏକ ଫେସବୁକ ପୋଷ୍ଟକୁ ନେଇ କାହା ସହିତ ବିବାଦ ଚାଲିଛି | ତେବେ ସେ ଏହି ମାମଲାକୁ ଗମ୍ଭୀରତାର ସହ ନେଇ ନଥିଲେ।

ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ଖୁସରୁପୁର ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଛି । ଏହି ମାମଲାରେ ପୁଲିସ ଏସଡିପିଓ ରାଜେଶ ମାଂଝୀ କହିଛନ୍ତି ଯେ ମୃତକଙ୍କ ବାପା ଏବଂ ପ୍ରତ୍ୟକ୍ଷଦର୍ଶୀଙ୍କ ବିବୃତ୍ତି ଆଧାରରେ ସୁଟରମାନଙ୍କୁ ଚିହ୍ନଟ କରାଯାଇଛି | ସମ୍ପର୍କୀୟଙ୍କ କହିବାନୁସାରେ, ଫେସବୁକରେ ପୋଷ୍ଟକୁ ନେଇ ଚାଲିଥିବା ବିବାଦକୁ ନେଇ ହତ୍ୟା ଘଟଣା ଘଟିଛି। ଦୁଇ ଯୁବକଙ୍କ ନାମ ସାମ୍ନାକୁ ଆସୁଛି ଓ ଯୁବକଙ୍କ ମୋବାଇଲ୍ ଜବତ କରାଯାଇଛି।

ସମ୍ବନ୍ଧିତ ଖବର