ମୁକେଶ ଅମ୍ବାନିଙ୍କୁ ହତ୍ୟା ଧମକ, ବିହାରରୁ ଅଭିଯୁକ୍ତ ଗିରଫ
ନୂଆଦିଲ୍ଲୀ : କର୍ପୋରେଟ୍ ଜଗତର ଜଣାଶୁଣା ବ୍ୟକ୍ତି ତଥା ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡର ଅଧ୍ୟକ୍ଷ ମୁକେଶ ଅମ୍ବାନି, ପତ୍ନୀ ନୀତା ଓ ପୁଅ ଆକାଶଙ୍କୁ ହତ୍ୟା, ସେମାନଙ୍କ ବାସଭବନ ଆଣ୍ଟିଲିଆ ଏବଂ ସାର୍ ଏଚ୍ଏନ୍ ରିଲାଏନ୍ସ ଫାଉଣ୍ଡେସନ ହସ୍ପିଟାଲକୁ ବିସ୍ଫୋରଣ କରି ଉଡ଼ାଇ ଦେବା ପାଇଁ ଧମକ ଦେଇଥିବା ବ୍ୟକ୍ତିକୁ ବିହାରରୁ ଗିରଫ କରାଯାଇଛି। ବିହାର ପୁଲିସ ସହାୟତାରେ ମୁମ୍ବାଇ ପୁଲିସ ଦରଭଙ୍ଗାରୁ ବୁଧବାର ରାତିରେ ରାକେଶ କୁମାର ମିଶ୍ର ନାମକ ଅଭିଯୁକ୍ତକୁ ଗିରଫ କରିଛି। ଅଭିଯୁକ୍ତକୁ ମୁମ୍ବାଇ ଅଣାଯାଉଛି।
Sambad is now on WhatsApp
Join and get latest news updates delivered to you via WhatsApp
ଅଭିଯୁକ୍ତ ବିରୋଧରେ ଆଇପିସିର ୫୦୬(୨) ଏବଂ ୫୦୭ ଦଫା ଲଗାଯାଇ ଏହି ଘଟଣାର ତଦନ୍ତ କରାଯାଉଛି। ଗତ ବୁଧବାର ଦକ୍ଷିଣ ମୁମ୍ବାଇସ୍ଥିତ ଉକ୍ତ ହସ୍ପିଟାଲକୁ ରାକେଶ ତାଙ୍କ ମୋବାଇଲ ନମ୍ବରରୁ ହସ୍ପିଟାଲର ଲ୍ୟାଣ୍ଡଲାଇନକୁ ଫୋନ କରି ଧମକ ଦେଇଥିଲା। ଦୁଇମାସ ଭିତରେ ମୁକେଶଙ୍କୁ ଉକ୍ତ ହସ୍ପିଟାଲ ଜରିଆରେ ଏହା ଦ୍ବିତୀୟ ଧମକ। ଗତ ଅଗଷ୍ଟରେ ନିଜକୁ ଅଫଜଲ ଗୁରୁ ପରିଚୟ ଦେଇ ଧମକ ଦେଇଥିବା ବୋରିଭାଲିର ୫୬ ବର୍ଷୀୟ ଗହଣା ବ୍ୟବସାୟୀ ବିଷ୍ଣୁ ବିଧୁ ଭୌମିକଙ୍କୁ ପୁଲିସ ଗିରଫ କରିଥିଲା। ଉଲ୍ଲେଖଯୋଗ୍ୟ, ନିକଟରେ ମୁକେଶ ଅମ୍ବାନିଙ୍କୁ ସରକାର ଜେଡ୍ ପ୍ଲସ ସୁରକ୍ଷା ଯୋଗାଇ ଦେଇଛନ୍ତି।