ଜୁକରବର୍ଗଙ୍କୁ ଚ୍ୟାଲେଞ୍ଜ ଦେଲେ ମସ୍କ: ଯେକୌଣସି ଠାରେ, ଯେକୌଣସି ସମୟରେ ଲଢ଼ିବାକୁ ପ୍ରସ୍ତୁତ

ୱାଶିଂଟନ: ‌ବୈଷୟିକ ଜଗତର ଦୁଇ ବଡ଼ ବ୍ୟକ୍ତିତ୍ବ ଏଲନ୍ ମସ୍କ ଏବଂ ମାର୍କ ଜୁକରବର୍ଗଙ୍କ ମଧ୍ୟରେ ପୁଣିଥରେ ବାକ୍‌ଯୁଦ୍ଧ ଆରମ୍ଭ ହୋଇଛି। ବର୍ତ୍ତମାନ ମସ୍କ ମେଟା ସିଇଓ ମାର୍କ ଜୁକରବର୍ଗଙ୍କୁ ଯେକୌଣସି ନିୟମ ନେଇ ଯେକୌଣସି ସ୍ଥାନରେ, ଯେକୌଣସି ସମୟରେ ଲଢ଼ିବାକୁ କହିଛନ୍ତି। ଏହାକୁ ନେଇ ସୋସିଆଲ ମିଡିଆରେ ପ୍ରତିକ୍ରିୟା ଆରମ୍ଭ ହୋଇଛି।

ବାସ୍ତବରେ, ଆମେରିକାର ସଂସଦରେ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ଭାଷଣ କାର୍ଯ୍ୟକ୍ରମ ସମୟରେ ମସ୍କ ପୁଣି ଥରେ ମାର୍କ ଜୁକରବର୍ଗଙ୍କ ବିରୋଧରେ ପ୍ରତିକ୍ରିୟା ପ୍ରକାଶ କରିଥିଲେ। ଏହା ପରେ ଜୁକରବର୍ଗଙ୍କ ମନ୍ତବ୍ୟ ଆସିଥିଲା। ସେ କହିଥିଲେ ଆମେ ପ୍ରକୃତରେ ଏହା କରୁଛୁ କି? ଏହାକୁ ନେଇ ସେମାନଙ୍କ ମଧ୍ୟରେ ପୁନର୍ବାର ବାକ୍‌ଯୁଦ୍ଧ ଆରମ୍ଭ ହୋଇଥିଲା।

ଏହାକୁ ନେଇ ୟୁଜରମାନେ ଲେଖିଛନ୍ତି ଯେ ଯଦି କେହି ଜୁକ୍‌ଙ୍କୁ ପଚାରନ୍ତି, ତେବେ ସେ କହିବେ ଯେ ମସ୍କ୍ ଗମ୍ଭୀର ନୁହନ୍ତି। ତେଣୁ ଏହା ଉପରେ ଆଲୋଚନା ହେବା ଉଚିତ୍ ନୁହେଁ। ଜଣେ ୟୁଜର ଲେଖିଛନ୍ତି ଲାଗୁଛି ଉଭୟେ ସେମାନଙ୍କର ପ୍ରତିଦ୍ୱନ୍ଦ୍ୱିତା ବୃଦ୍ଧି କରୁଛନ୍ତି। ଫଳରେ ଡିଜିଟାଲ୍ ସର୍ବୋଚ୍ଚତା ପାଇଁ ସଂଗ୍ରାମ ଏକ ଶାରୀରିକ ଲଢ଼େଇରେ ପରିଣତ ହେଉଛି। ଅନ୍ୟ ଜଣେ ୟୁଜର କହିଛନ୍ତି ମୁଁ ଭାବୁଛି ଦୁହେଁ ଗୁପ୍ତରେ ଭଲ ବନ୍ଧୁ। ମାତ୍ର ଲୋକଙ୍କୁ ଦେଖାଇବା ପାଇଁ ପରସ୍ପର ମଧ୍ୟରେ ବାକ୍‌ଯୁଦ୍ଧ ଜାରି ରଖିଛନ୍ତି।

ସୂଚନାଯୋଗ୍ୟ, ମାର୍କ ଜୁକରବର୍ଗ ଏବଂ ଏଲୋନ୍ ମସ୍କଙ୍କ ମଧ୍ୟରେ ପ୍ରତିଯୋଗିତା କ୍ରମାଗତ ଭାବରେ ଚର୍ଚ୍ଚାରେ ରହିଛ। ଗତ ବର୍ଷ ମସ୍କ ଜୁକରବର୍ଗଙ୍କୁ କେଜ୍ ଯୁଦ୍ଧ ବିରୋଧରେ ଚେତାବନୀ ଦେଇଥିଲା। ମେଟା, ଥ୍ରେଡସ୍ ସୋସିଆଲ୍ ମିଡିଆ ପ୍ଲାଟଫର୍ମ ଆରମ୍ଭ ହେବା ପରେ ୫୨ ବର୍ଷ ବୟସ୍କ ମସ୍କ୍ ଏବଂ ୩୯ ବର୍ଷ ବୟସ୍କ ଜୁକରବର୍ଗ‌ଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ତୀବ୍ର ହୋଇଥିଲା। ଥ୍ରେଡ୍ ଏକ୍ସର ଏକ ନକଲ ବୋଲି ଅଭିଯୋଗ ହୋଇଛି। ବିଶେଷ କଥା ହେଉଛି, ଜୁକରବର୍ଗ ମେଟାର ଏଇ ମଡେଲକୁ ପ୍ରଶଂସା କରିବାର ଦିନକ ପରେ ମସ୍କଙ୍କର ଏଭଳି ଚ୍ୟାଲେଞ୍ଜ ଆସିଛି।