ହିନ୍ଦୁ ସ୍ବାମୀଙ୍କ ପାଇଁ ପ୍ରାର୍ଥନା କରୁଥିଲେ ମୁସଲମାନ୍ ସ୍ତ୍ରୀ: କ୍ରିକେଟର ଶିବମ୍ ଦୁବେଙ୍କ ସ୍ତ୍ରୀଙ୍କ ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ
ଚେନ୍ନାଇ: ସ୍ୱାମୀ ପଡ଼ିଆରେ ରନ୍ ବର୍ଷା କରୁଥିଲେ, ଦର୍ଶକଙ୍କ ମଧ୍ୟରେ ବସିଥିବା ମୁସଲମାନ ସ୍ତ୍ରୀ ପ୍ରାର୍ଥନା କରୁଥିଲେ। ଗତ ମଙ୍ଗଳବାର ଏମ ଚିଦାମ୍ବରମ୍ ଷ୍ଟାଡିୟମରେ ଖେଳାଯାଇଥିବା ଚେନ୍ନାଇ ସୁପର କିଙ୍ଗ୍ସ (ସିଏସକେ) ଏବଂ ଗୁଜୁରାଟ ଟାଇଟାନ୍ସ ମଧ୍ୟରେ ଆଇପିଏଲ୍ ମ୍ୟାଚ ସମୟର ଏହି ଭିଡ଼ିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ଏହା ୟୁଜର୍ସଙ୍କ ହୃଦୟ ଜିଣି ନେଇଛି।
Sambad is now on WhatsApp
Join and get latest news updates delivered to you via WhatsApp
ଆଇପିଏଲ ୨୦୨୪ ଟୁର୍ଣ୍ଣାମେଣ୍ଟର ସବୁଠାରୁ ଶକ୍ତିଶାଳୀ ଦଳ ଭାବରେ ବିବେଚିତ ଚେନ୍ନାଇ ସୁପର କିଙ୍ଗ୍ସ (ସିଏସକେ) ଚମତ୍କାର ପ୍ରଦର୍ଶନ ଜାରି ରଖିଛି । ମଙ୍ଗଳବାର ଏମ ଚିଦାମ୍ବରମ୍ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ଚେନ୍ନାଇ ଦଳ ଗୁଜୁରାଟ ଟାଇଟାନ୍ସକୁ ୬୩ ରନରେ ପରାସ୍ତ କରି ଏକ ବଡ଼ ବିଜୟ ହାସଲ କରିଛି। ଦଳର ହିରୋ ଥିଲେ ଶିବମ୍ ଦୁବେ। ତାଙ୍କର ଧୂଆଁଧାର ଇନିଂସ କେବଳ ତାଙ୍କ ଦଳକୁ ବିଜୟରେ ପହଞ୍ଚାଇବା ସହ ଦର୍ଶକଙ୍କ ହୃଦୟ ଜିତିଥିଲା।
ଗୁଜୁରାଟ ବିପକ୍ଷରେ ଶିବମ ୨୩ ଟି ବଲରେ ୫୧ ରନର ଚମତ୍କାର ଇନିଂସ ଖେଳିଥିଲେ, ଯେଉଁଥିରେ ୨ ଚୌକା ଓ ୫ ଛକା ଅନ୍ତର୍ଭୁକ୍ତ ଥିଲା। ଏହି କାରଣରୁ ତାଙ୍କୁ ‘ପ୍ଲେୟାର ଅଫ୍ ଦି ମ୍ୟାଚ୍’ ଆଖ୍ୟା ମଧ୍ୟ ଦିଆଯାଇଥିଲା। ଗ୍ୟାଲେରିରେ ବସି ଖେଳ ଦେଖୁଥିବା ତାଙ୍କ ପତ୍ନୀ ଅଞ୍ଜୁମ ଖାନଙ୍କ ଭିଡ଼ିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଲୋକମାନେ ତାଙ୍କ ପତ୍ନୀଙ୍କୁ ଶିବମଙ୍କ ସ୍ମରଣୀୟ ଇନିଂସ ପାଇଁ ଶ୍ରେୟ ଦେଉଛନ୍ତି । ଶିବମଙ୍କ ବ୍ୟାଟିଂ ସମୟରେ ଅଞ୍ଜୁମଙ୍କୁ ଗ୍ୟାଲେରିରେ ବସି ପ୍ରାର୍ଥନା କରୁଥିବାର ଦେଖିବାକୁ ମିଳିଥିଲା।
ସୋସିଆଲ ମିଡିଆରେ ଏହି ଭିଡିଓ ଭାଇରାଲ ହେବାରେ ଲାଗିଛି, ଯେଉଁଥିରେ ଦେଖାଯାଉଛି ଯେ ଶିବମ ପଡ଼ିଆରେ ଚୌକା ଓ ଛକା ମାରିଥିଲେ, ସେହି ସମୟରେ ଦର୍ଶକ ଗ୍ୟାଲେରୀରେ ବସିଥିବା ତାଙ୍କ ପତ୍ନୀ ଦୁଇ ହାତ ଟେକି ତାଙ୍କ ପାଇଁ ପ୍ରାର୍ଥନା କରୁଥିଲେ। ଭିଡ଼ିଓ ଦେଖବା ପରେ ୟୁଜର୍ସମାନେ ଅଞ୍ଜୁମଙ୍କୁ ହୃଦୟରୁ ପ୍ରଶଂସା କରିଛନ୍ତି ଏବଂ ତାଙ୍କ ପାଇଁ ସକାରାତ୍ମକ ମନ୍ତବ୍ୟ ଦେଇଛନ୍ତି। ପ୍ରକୃତ ପ୍ରେମକୁ ଏହା କୁହାଯାଏ ବୋଲି ଜଣେ ୟୁଜର ଲେଖିଛନ୍ତି। ପ୍ରକୃତରେ ପ୍ରାର୍ଥନା ଗ୍ରହଣ ହୋଇଥିଲା ବୋଲି ଅନ୍ୟ ଜଣେ ୟୁଜର ଲେଖିଛନ୍ତି। ମୋଟ ଉପରେ, ଅଞ୍ଜୁମ ଖାନ ବର୍ତ୍ତମାନ ସୋସିଆଲ ମିଡିଆରେ ଆକର୍ଷଣର କେନ୍ଦ୍ର ପାଲଟିଛନ୍ତି।
ସୂଚନାଯୋଗ୍ୟ ଯେ ଶିବମ୍ ଏବଂ ଅଞ୍ଜୁମ୍ ମେଡ୍ ଫର୍ ଇଚ୍ ଅଦର ଦମ୍ପତି ଏବଂ ଦୀର୍ଘ ସମୟ ଧରି ଡେଟିଂ କରିବା ପରେ ଦୁହେଁ ପରସ୍ପରକୁ ବିବାହ କରିଥିଲେ, ଯାହା ମଧ୍ୟ ଦୁଇଥର ହୋଇଥିଲା। ବାସ୍ତବରେ ଅଞ୍ଜୁମ୍ ମୁସଲମାନ ଏବଂ ଶିବମ୍ ହିନ୍ଦୁ, ତେଣୁ ଉଭୟେ ହିନ୍ଦୁ ରୀତିନୀତି ଅନୁଯାୟୀ ବିବାହ କରିଥିଲେ ଏବଂ ଏହା ପରେ ମୁସଲମାନ ରୀତିନୀତି ଅନୁଯାୟୀ ମଧ୍ୟ ବିବାହ ଉତ୍ସବ ଅନୁଷ୍ଠିତ କରାଯାଇଥିଲା। ଉଭୟଙ୍କର ଜଣେ ପୁଅ ଅଛନ୍ତି।
ଏହା ଜଣା ଯେ ଉଭୟ ଶିବମ ଏବଂ ଅଞ୍ଜୁମ ମୂଳତଃ ୟୁପିରୁ ଆସିଛନ୍ତି କିନ୍ତୁ ସେମାନଙ୍କ ପରିବାର ମହାରାଷ୍ଟ୍ରରେ ଅବସ୍ଥାନ କରିଥିଲେ, ତେଣୁ ସେମାନେ କେବଳ ମୁମ୍ବାଇରେ ବଢ଼ିଥିଲେ। ଶିବମ ଜଣେ କ୍ରିକେଟର ହୋଇଥିବାବେଳେ ଅଞ୍ଜୁମ୍ ଅନେକ ଟିଭି ସୋ ଏବଂ ମ୍ୟୁଜିକ୍ ଭିଡିଓରେ ମଧ୍ୟ କାମ କରିଛନ୍ତି ତଥା ନିଜର ସୋସିଆଲ ମିଡିଆ ପୋଷ୍ଟ ଯୋଗୁଁ ଅନେକ ସମୟରେ ଖବରରେ ରହିଥା’ନ୍ତି ।