ମୁସଲମାନଙ୍କ ପାଇଁ ୧୫୦ ଦେଶ ଥିବାବେଳେ ହିନ୍ଦୁମାନଙ୍କ ପାଇଁ ଅଛି କେବଳ ଭାରତ: ଗୁଜରାଟର ମୁଖ୍ୟମନ୍ତ୍ରୀ
ଅହମଦାବାଦ: ବସବାସ ପାଇଁ ମୁସଲମାନମାନେ ବିଶ୍ୱର ୧୫୦ଟି ଇସ୍ଲାମୀୟ ଦେଶରୁ ଯେ କୌଣସି ଗୋଟିକୁ ବାଛିପାରିବେ, କିନ୍ତୁ ହିନ୍ଦୁମାନଙ୍କ ପାଇଁ ଅଛି କେବଳ ଭାରତ। ନାଗରିକତା (ସଂଶୋଧନ) ଆଇନର ଯଥାର୍ଥତା ଦର୍ଶାଇବାକୁ ଯାଇ ମଙ୍ଗଳବାର ଦିନ ଗୁଜରାଟର ମୁଖ୍ୟମନ୍ତ୍ରୀ ବିଜୟ ରୁପାନି ଏ କଥା କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସାବରମତୀ ଆଶ୍ରମ ବାହାରେ ‘ସିଏଏ’ ସମର୍ଥନରେ ବାହାରି ଥିବା ଏକ ରାଲିରେ ଭାଷଣ ଦେଇ ମୁଖ୍ୟମନ୍ତ୍ରୀ ରୁପାନି କଂଗ୍ରେସକୁ ତୀବ୍ର ସମାଲୋଚନା କରିଥିଲେ। ଏହି ପ୍ରସଙ୍ଗରେ କଂଗ୍ରେସ ମହାତ୍ମା ଗାନ୍ଧୀ ଓ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ଇଚ୍ଛାକୁ ସମ୍ମାନ ଦେଉନାହିଁ ବୋଲି ସେ କହିଛନ୍ତି।
ରୁପାନି କହିଲେ: ପାକିସ୍ତାନରେ ଥିବା ହିନ୍ଦୁ ଓ ଶିଖ୍ମାନଙ୍କୁ ଭାରତ ନାଗରିକତା ପ୍ରଦାନ କରୁ ବୋଲି ଗାନ୍ଧୀଜୀ ମତ ଦେଇଥିଲେ। ମନମୋହନ ସିଂହ ପ୍ରଧାନମନ୍ତ୍ରୀ ଥିବା ବେଳେ ମଧ୍ୟ ଏହି ପ୍ରସ୍ତାବକୁ ସମର୍ଥନ କରିଥିଲେ। ଏବେ ଏହାକୁ କଂଗ୍ରେସ କାହିଁକି ବିରୋଧ କରୁଛି- ଏ କଥା ସେ ଦେଶବାସୀଙ୍କୁ ବୁଝାଇ ଦେଉ।
ସେ କହିଲେ: ବିଭାଜନ ସମୟରେ ପାକିସ୍ତାନରେ ୨୨% ହିନ୍ଦୁ ଥିଲେ। ଅତ୍ୟାଚାର ବୃଦ୍ଧି ପାଇବା ଯୋଗୁଁ ସେମାନଙ୍କ ସଂଖ୍ୟା ୩%କୁ ହ୍ରାସ ପାଇଲାଣି। ସେଇଥିପାଇଁ ହିନ୍ଦୁମାନେ ଭାରତକୁ ଫେରିଆସିବାକୁ ଚାହୁଁଛନ୍ତି। ଅତ୍ୟାଚାରିତ ହିନ୍ଦୁମାନଙ୍କୁ କଂଗ୍ରେସ ଯେଉଁ ପ୍ରକାରର ସହାୟତା କରିବାର ଥିଲା ଆମେ ତାହା କରୁଥିବା ବେଳେ କଂଗ୍ରେସ ବିରୋଧ କରୁଛି।
ସେ ପୁଣି କହିଲେ ବାଂଲାଦେଶରେ ହିନ୍ଦୁଙ୍କ ସଂଖ୍ୟ ୨%କୁ ହ୍ରାସ ପାଇଲାଣି। କିଛି ଦଶନ୍ଧି ତଳେ ଆଫଗାନିସ୍ଥାନରେ ୨ ଲକ୍ଷ ହିନ୍ଦୁ ଓ ଶିଖ୍ ବାସିନ୍ଦା ଥିଲେ। ଏବେ ମାତ୍ର ୫୦୦ ଅଛନ୍ତି। ମୁସଲମାନମାନେ ୧୫୦ଟି ଦେଶକୁ ଯାଇ ପାରିବେ, କିନ୍ତୁ ହିନ୍ଦୁମାନଙ୍କ ପାଇଁ ମାତ୍ର ଗୋଟିଏ ଦେଶ ଅଛି ଏବଂ ତାହା ହେଊଛି ଭାରତ। ସେମାନେ ଫେରିଆସିବାକୁ ଚାହିଁଲେ ଅସୁବିଧା କ’ଣ?