ନୂଆଦିଲ୍ଲୀ: ମହାରାଷ୍ଟ୍ର ମହା ବିକାଶ ଅଘାଡ଼ି (ଏମ୍‌ଭିଏ) ମେଣ୍ଟରେ ଲାଗି ରହିଥିବା କନ୍ଦଳ ତୀବ୍ର ରୂପ ନେଇଛି। ଦିଲ୍ଲୀରେ ଏକ କାର୍ଯ୍ୟକ୍ରମରେ ଶରଦ ପାୱାର ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ସମ୍ବର୍ଦ୍ଧିତ କରିବା ପରେ ଶିବସେନା ଉଦ୍ଧବ ଗୋଷ୍ଠୀ ଏହାର ଜୋରଦାର ବିରୋଧ କରିଛି ଏବଂ ଏହି ପ୍ରସଙ୍ଗ ଇଣ୍ଡି ମେଣ୍ଟର ଅଡ଼ୁଆ ବଢ଼ାଇଛି। ଶରଦ ପାୱାରଙ୍କୁ ଉଦ୍ଧବ ଗୋଷ୍ଠୀ କଡ଼ା ସମାଲୋଚନା କରିଥିବା ବେଳେ ଉଦ୍ଧବ ଠାକ୍‌ରେଙ୍କ ପୁଅ ତଥା ଶିବସେନା(ୟୁବିଟି) ନେତା ଆଦିତ୍ୟ ଠାକରେ ଆଜି ଦିଲ୍ଲୀରେ ପହଞ୍ଚି କଂଗ୍ରେସ ନେତା ରାହୁଲ ଗାନ୍ଧୀ ଏବଂ ଆମ୍ ଆଦମୀ ପାର୍ଟି ମୁଖ୍ୟ ଅରବିନ୍ଦ କେଜ୍ରିୱାଲଙ୍କୁ ଭେଟିଛନ୍ତି।

Advertisment

ତେବେ ଏହି ସମୟରେ  ଦିଲ୍ଲୀରେ ଥିବା ଶରଦ ପାୱାରଙ୍କୁ ସେ ଭେଟି ନାହାନ୍ତି ଏବଂ  ପାୱାରଙ୍କ ଆଭିମୁଖ୍ୟ ମଧ୍ୟ ଏମ୍‌ଭିଏ ଫାଟକୁ ବଢ଼ାଉଛି। ଦିଲ୍ଲୀ ଓ ମହାରାଷ୍ଟ୍ର ବିଧାନସଭା ନିର୍ବାଚନ ଫଳାଫଳ  ନେଇ  ଠାକରେ ପ୍ରଶ୍ନ ଉଠାଇଛନ୍ତି ଏବଂ ଇଭିଏମ୍‌ ଉପରେ ଦୋଷାରୋପ କରିଛନ୍ତି। ସେ କହିଛନ୍ତି, ଆମ ଦେଶରେ ଅବାଧ ଓ ନିରପେକ୍ଷ ନିର୍ବାଚନ ହେଉଛି କି ନାହିଁ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ନିର୍ବାଚନ ପ୍ରକ୍ରିୟା ନିରପେକ୍ଷ ଓ ସ୍ୱଚ୍ଛ ମନେ ହେଉନାହିଁ। ସେ ଆହୁରି ମଧ୍ୟ ଦର୍ଶାଇଛନ୍ତି ଯେ ନିର୍ବାଚନ ପୂର୍ବରୁ ମହାରାଷ୍ଟ୍ରରେ ୪୭ ଲକ୍ଷ ଭୋଟରଙ୍କୁ ଯୋଡ଼ିବାକୁ ଏମ୍‌ଭିଏ ଆପତ୍ତି ଉଠାଇଛି ଏବଂ ନିର୍ବାଚନ କମିସନ  ଏହି ଅଭିଯୋଗ ଉପରେ ଗୁରୁତ୍ବ ଦେଉନାହାନ୍ତି।