ଜାନୁଆରୀରେ କାର୍ଯ୍ୟକାଳ ଶେଷ ହେବା ପୂର୍ବରୁ ନଡ୍ଡାଙ୍କ ଉପରେ ଅଛି ଏହି ଦାୟିତ୍ୱ
ନୂଆଦିଲ୍ଲୀ: ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ କାର୍ଯ୍ୟକାଳ ଆସନ୍ତା ବର୍ଷ ଜାନୁଆରୀରେ ଶେଷ ହେବ। ଏହାପୂର୍ବରୁ ଚଳିତ ବର୍ଷ ଶେଷରେ ହିମାଚଳ ପ୍ରଦେଶ ଏବଂ ଗୁଜୁରାଟ ବିଧାନସଭା ପାଇଁ ଗୁରୁତ୍ୱପୂର୍ଣ୍ଣ ନିର୍ବାଚନ ଅନୁଷ୍ଠିତ ହେବ। ସେ ଏହି ଦୁଇଟି ରାଜ୍ୟରେ ବିଜୟ ସହ ତାଙ୍କର ଅଧ୍ୟକ୍ଷ ଇନିଂସ ସମାପ୍ତ କରିବାକୁ ଚାହୁଁଛନ୍ତି। ହିମାଚଳ ପ୍ରଦେଶରେ ନଡ୍ଡାଙ୍କ ଘର ହୋଇଥିବାବେଳେ ଗୁଜୁରାଟ ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଡ । ଏଭଳି ପରିସ୍ଥିତିରେ ଉଭୟ ରାଜ୍ୟରେ ଦଳ କିଭଳି ଜିତିବ ସେନେଇ ନଡ୍ଡାଙ୍କ ଉପରେ ଅତିରିକ୍ତ ଚାପ ରହିଛି। ମିଳିଥିବା ସୂଚନା ମୁତାବକ ହିମାଚଳ ପ୍ରଦେଶରେ ସବୁବେଳେ ବିଜେପି ଓ କଂଗ୍ରେସ ମୁହାଁମୁହିଁ ଲଢେଇ ହୋଇଥାଏ | ବିଶେଷ କରି ହିମାଚଳପ୍ରଦେଶର ଲୋକମାନେ ପ୍ରତ୍ୟେକ ଥର ସରକାର ବଦଳାଇବାକୁ ପ୍ରାଥମିକତା ଦେଇଥାନ୍ତି ।
ଏହି ପାହାଡ଼ିଆ ରାଜ୍ୟରେ ୨୦୦୩ରେ କଂଗ୍ରେସ ଏବଂ ୨୦୦୭ ରେ ବିଜେପି ଜିତିଥିଲା | ସେହିପରି ୨୦୧୨ ନିର୍ବାଚନରେ କଂଗ୍ରେସର ବିରଭଦ୍ର ସିଂ ସରକାର ଗଠନ କରିଥିଲେ ଓ ତା’ପରେ ୨୦୧୭ରେ ଲୋକମାନେ ପୁଣି ଥରେ ବିଜେପିକୁ ସୁଯୋଗ ଦେଇଥିଲେ। ତେବେ ଗତ ନିର୍ବାଚନରେ ୬୮ ସଦସ୍ୟ ବିଶିଷ୍ଟ ହିମାଚଳ ବିଧାନସଭା ନିର୍ବାଚନରେ ବିଜେପି ୪୪ଟି ଆସନରେ ଜିତିଥିବାବେଳେ କଂଗ୍ରେସ ୨୧ଟି ଆସନ ଜିତିଥିଲା । ବାସ୍ତବରେ, ଉତ୍ତରାଖଣ୍ଡ ପରି ହିମାଚଳ ପ୍ରଦେଶରେ ମଧ୍ୟ ପ୍ରାୟ ସମସ୍ତ ପରିବାରର କିଛି ବ୍ୟକ୍ତି ସେନାରେ କାର୍ଯ୍ୟ କରନ୍ତି | କୁହାଯାଏ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସେନାର ଯବାନମାନଙ୍କ ମଧ୍ୟରେ ଏକ ଉତ୍ତମ ଭାବମୂର୍ତ୍ତି ସୃଷ୍ଟି କରିଛନ୍ତି, ଯାହାର ଲାଭ ଉତ୍ତରାଖଣ୍ଡରେ ବିଜେପିକୁ ମିଳିଥିଲା ।
ଯଦି ନିକଟରେ ଶେଷ ହୋଇଥିବା ପାଞ୍ଚଟି ରାଜ୍ୟ ନିର୍ବାଚନ ସହିତ ସମାନ ସମୀକରଣ ଏଠାରେ କରାଯାଏ, ତେବେ ଗଣିତ ବିଜେପି ସପକ୍ଷରେ ଯାଇପାରେ। ଆମ୍ ଆଦମୀ ପାର୍ଟି ମଧ୍ୟ ଏଥର ହିମାଚଳ ନିର୍ବାଚନରେ ଭାଗ୍ୟ ପରୀକ୍ଷା କରିବାକୁ ଚେଷ୍ଟା କରୁଛି। ପଞ୍ଜାବରେ ବହୁମତ ପାଇ କ୍ଷମତାକୁ ଆସିବା ପରେ ଆପ ଅନୁଭବ କରୁଛି ଯେ ଦିନେ ପଞ୍ଜାବର ଏକ ଅଂଶ ଥିବା ହିମାଚଳ ପ୍ରଦେଶରେ ମଧ୍ୟ ଦଳ ସଫଳତା ପାଇପାରିବ | କିନ୍ତୁ ଅରବିନ୍ଦ କେଜ୍ରିୱାଲଙ୍କ ହିମାଚଳ ଗସ୍ତ ପରଦିନ ଆପ ରାଜ୍ୟ ସଭାପତି ବିଜେପିରେ ଯୋଗ ଦେଇଥିଲେ | ଯାହାକି ଆପ ପାଇଁ ଏକ ବଡ ଝଟକା ସଦୃଶ ଥିଲା |
