ଜାତୀୟ ସଂଗୀତ ‘ଜନ ଗଣ ମନ…’ର ସଂଶୋଧନ ଲାଗି ପ୍ରଧାନମନ୍ତ୍ରୀଙ୍କୁ ଲେଖିଲେ ଚିଠି ସୁବ୍ରମଣ୍ୟମ୍ ସ୍ୱାମୀ
ନୂଆଦିଲ୍ଲୀ: ଜାତୀୟ ସଂଗୀତ ‘ଜନ ଗଣ ମନ …. ’ରେ ଥିବା ପ୍ରଥମ ତିନିଟି ଶବ୍ଦ ( ଜନ-ଗଣ-ମନ)କୁ ପରିବର୍ତ୍ତନ କରିବାକୁ ବିଜେପିର ବରିଷ୍ଠ ନେତା ତଥା ସାଂସଦ ସୁବ୍ରମଣ୍ୟମ୍ ସ୍ୱାମୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖି ଅନୁରୋଧ କରିଛନ୍ତି । ଏଥିସହ ସୁବ୍ରମଣ୍ୟମ୍ ସ୍ୱାମୀ ପ୍ରଧାନମନ୍ତ୍ରୀଙ୍କ ନିକଟକୁ ଲେଖିଥିବା ଚିଠିର ଏକ ନକଲ ସୋସିଆଲ ମିଡିଆରେ ଅପଲୋଡ୍ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହାକୁ ନେଇ ସେ ଲେଖିଛନ୍ତି, ଅକ୍ଟୋବର ୨୧, ୧୯୪୩ରେ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ନେତୃତ୍ବରେ ଇଣ୍ଡିଆନ୍ ନ୍ୟାସନାଲ୍ ଆର୍ମି ମଣିପୁର ଦଖଲ କରିବା ପରେ ‘ଜନଗଣ ମନ..’କୁ ରାଷ୍ଟ୍ରୀୟ ଗାନ/ଜାତୀୟ ସଂଗୀତ ମାନ୍ୟତା ଦେଇ ଗାନ କରିଥିଲା । ତେବେ ଏଥିଲାଗି ମୂଳ କବିତାରେ ନେତାଜୀ କିଛି ପରିବର୍ତ୍ତନ କରିଥିଲେ। ବର୍ତ୍ତମାନ ପରିପ୍ରେକ୍ଷୀରେ ନେତାଜୀ ଓ ଆଇଏନଏ ଦ୍ବାରା ଗାନ କରାଯାଇଥିବା ସଂଶୋଧିତ ଗୀତଟି ଅଧିକ ପ୍ରଯୁଜ୍ୟ ମନେହୁଏ। ତେଣୁ ‘ଜନ-ଗଣ-ମନ’ ମୂଳଗୀତରେ ଆବଶ୍ୟକ ସଂଶୋଧନ ଅଣାଯାଉ।
ସମ୍ବିଧାନ ସଭାରେ ଜନ-ଗଣ-ମନକୁ ଜାତୀୟ ସଂଗୀତର ସ୍ବୀକୃତି ପ୍ରଦାନ କରିବା ସମୟରେ କୁହାଯାଇଥିଲା କି ଆବଶ୍ୟକସ୍ଥଳେ ଏହି ଗୀତର ଶବ୍ଦକୁ ବଦଳାଯାଇପାରିବ । ଏହି ଜାତୀୟ ସଂଗୀତର ରଚୟିତା ଥିଲେ ବିଶ୍ବକବି ରବୀନ୍ଦ୍ରନାଥ୍ ଠାକୁର । ସେ ଲେଖିଥିବା ଏହି କବିତାକୁ ୧୯୧୧ ମସିହା ଡିସେମ୍ବର ମାସ ୨୭ ତାରିଖରେ କଲିକତାରେ ଅନୁଷ୍ଠିତ କଂଗ୍ରେସ ଅଧିବେଶନରେ ପ୍ରଥମେ ଗାନ କରାଯାଇଥିଲା । ତେବେ ଏହି କବିତାରେ ଜନ-ଗଣ-ମନ ଅଧିନାୟକ କାହାକୁ ସମ୍ବୋଧିତ କରାଯାଇଛି ତାହା ସ୍ପଷ୍ଟ ହୋଇ ନ ଥିବାରୁ ନେତାଜୀ ସୁଭାଷଙ୍କ ଦ୍ବାରା ଗାନ କରାଯାଇଥିବା ଗୀତର ରୂପକୁ ଗ୍ରହଣ କରିବା ଲାଗି ଚିଠିରେ ପ୍ରସ୍ତାବ ଦେଇଛନ୍ତି ରାଜ୍ୟସଭା ସାଂସଦ ।
My letter to PM Modi on Jana Gana Mana pic.twitter.com/qc1KnLDb2g
— Subramanian Swamy (@Swamy39) December 1, 2020
ଏହି ଗୀତଟି ରବୀନ୍ଦ୍ର ନାଥଙ୍କ ଦ୍ୱାରା ରଚିତ ‘ଭାରତ ଭାଗ୍ୟବିଧାତା’ କବିତାର ୧୩ଟି ଧାଡିରୁ ଉଦ୍ଧୃତ କରାଯାଇ ଏହାକୁ ରାଷ୍ଟ୍ରଗାନର ମାନ୍ୟତା ଦିଆଯାଇଥିଲା । ଏହି ଗୀତକୁ ଗାନ କରିବାକୁ ମୋଟ ୫୨ ସେକେଣ୍ଡ ସମୟ ଲାଗିଥାଏ । ସେପଟେ ଏହାକୁ ପରିବର୍ତ୍ତନ କରିବାକୁ ଚାହିଁଲେ ବିଜେପି ସୁବିଧାରେ ଲୋକସଭାରେ ଏହି ପ୍ରସ୍ତାବକୁ ପାରିତ କରିପାରିବ । ହେଲେ ରାଜ୍ୟସଭାରେ ଏହା ପାରିତ ହେବା କଷ୍ଟ ବୋଲି ସମ୍ବିଧାନ ବିଶାରଦ ମାନେ ମତ ଦେଇଛନ୍ତି ।