ପୁଲଓ୍ଵାମା ପରେ ଏବେ ସୁଷମା ସ୍ୱରାଜଙ୍କ ଏହି ଟୁଇଟ୍ ଉପରେ ନିଜର ମତ ରଖି ଫସିଲେ ସିଦ୍ଧୁ
ନୂଆଦିଲ୍ଲୀ : ପୁଲଓ୍ଵାମା ଜିଲ୍ଲାରେ ଆତଙ୍କବାଦୀମାନେ ଆକ୍ରମଣ କରିବା ପରେ ସାରା ଭାରତବାସୀ ପାକିସ୍ତାନକୁ ବିରୋଧ କରିବା ଆରମ୍ଭ କରିଥିଲେ । ସାରା ଦେଶ ପ୍ରତିଶୋଧର ନିଆଁରେ ଜଳୁଥିବା ବେଳେ କ୍ରିକେଟର ନବ୍ଜୋତ୍ ସିଂହ ସିଦ୍ଧୁ ପାକିସ୍ତାନକୁ ସମର୍ଥନ କଲା ଭଳି ମତ ରଖି ବିବାଦରେ ଫସିଥିଲେ । ପୁଲଓ୍ଵାମା ଆକ୍ରମଣକୁ ନେଇ ତାଙ୍କର ପ୍ରତିକ୍ରିୟା ଆସିବା ପରେ ତୁରନ୍ତ ତାଙ୍କୁ କମେଡି ସୋ’ରୁ ବାହାର କରି ଦିଆଯିବା ସହ ଦେଶରୁ ବାହାର କରିବା ପାଇଁ ଅଭିଯାନ ଆରମ୍ଭ ହୋଇଥିଲା ।
Sambad is now on WhatsApp
Join and get latest news updates delivered to you via WhatsApp
ବିବାଦଟି ଧୀରେ ଧୀରେ ଥମି ଆସୁଥିବା ବେଳେ ଏବେ ବୈଦେଶିକ ମନ୍ତ୍ରୀ ସୁଷମା ସ୍ୱରାଜଙ୍କୁ ଟାର୍ଗେଟ କରି ପୁଣି ବିବାଦରେ ଛନ୍ଦି ହୋଇଛନ୍ତି ସିଦ୍ଧୁ । ସୁଷମା ସ୍ୱରାଜ କିଛି ଦିନ ତଳେ ଏକ ଟୁଇଟ୍ କରି, ‘ଆମର ଲଢ଼େଇ ପାକିସ୍ତାନ ବିରୋଧରେ ନୁହେଁ, ବରଂ ସେଠାରେ ରହୁଥିବା ଆତଙ୍କବାଦୀଙ୍କ ବିରୋଧରେ’ ବୋଲି ଲେଖିଥିଲେ । ସୁଷମାଙ୍କ ଏହି ଟୁଇଟ୍କୁ ଟାର୍ଗେଟ କରି ସିଦ୍ଧୁ ଏକ ଟୁଇଟ୍ କରିଥିଲେ ।
ଟୁଇଟ୍ କରି ‘କ୍ୟୁଁ ଭକ୍ତୋ??’ ବୋଲି ଲେଖିଥିଲେ । ସିଦ୍ଧୁ ଏଭଳି ଟୁଇଟ୍ କରିବା ପରେ, ସୁଷମାଙ୍କ ଟୁଇଟ୍ର ଉଦାହରଣ ଦେଇ ସେ ପୁଲଓ୍ଵାମା ଆକ୍ରମଣକୁ ନେଇ ପୂର୍ବରୁ ଦେଇଥିବା ପ୍ରତିକ୍ରିୟାକୁ ଠିକ୍ ବୋଲି ପ୍ରମାଣ କରିବାକୁ ଚେଷ୍ଟା କରୁଥିବା ଜାଣି ଲୋକେ ତାଙ୍କୁ ପୁଣି ଟ୍ରୋଲ କରିଛନ୍ତି । ସୁଷମାଙ୍କ ଟୁଇଟ୍କୁ କୁଟନୈତିକ ଆଧାରରେ ଲୋକମାନେ ଠିକ୍ ବୋଲି କହିବା ସହ ସିଦ୍ଧୁଙ୍କୁ ପୁଣି ବିରୋଧ କରିବା ଆରମ୍ଭ କରି ଦେଇଛନ୍ତି ।