ପାଟନା: ବିହାରରେ ମହାରାଷ୍ଟ୍ରରେ ପୁଲିସର ମାଓଦମନ ନୀତିର ପ୍ରତିଶୋଧ ନେଇଛନ୍ତି ନକ୍ସଲ । ବିହାରର ଗୟା ଜିଲ୍ଲାରୁ ଆସିଥିବା ଖବର ପରେ ମାଓବାଦ ଏକ ଆଦର୍ଶ ବୋଲି ଭାବୁଥିବା ଲୋକମାନେ ଏହାକୁ ଭୁଲ ବୋଲି ମାନିବାକୁ ବାଧ୍ୟ ହେବେ । ନକ୍ସଲମାନେ ଗୟା ଜିଲ୍ଲାର ଗୋଟିଏ ପରିବାରର ୪ ଜଣଙ୍କୁ ଫାଶିରେ ଝୁଲାଇ ହତ୍ୟା କରିଥିବା ଜଣାପଡ଼ିଛି । କେବଳ ହତ୍ୟା କରିନାହାନ୍ତି ମାଓବାଦୀମାନେ ସଂପୃକ୍ତ ଘରକୁ ବୋମା ମାଡ଼କରି ଉଡାଇ ଦେଇଛନ୍ତି । ଏଭଳି ଅଭିଯାନ ସଫଳ ହେବା ପରେ ନକ୍ସଲମାନେ ସେଠାରେ ଏକ ଚିଠି ମଧ୍ୟ ଛାଡି ଯାଇଛନ୍ତି । ଘଟଣା ସଂକ୍ରାନ୍ତରେ ସୂଚନା ପାଇବା ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଗୟା ଜିଲ୍ଲାର ନକ୍ସଲ ପ୍ରଭାବିତ ଅଞ୍ଚଳ ଡୁମାରିଆ ଥାନା ଅଞ୍ଚଳର ମୋନବାର ଗାଁରେ ରହୁଥିବା ସରଜୁ ସିଂଙ୍କ ଘରେ ଶନିବାର ମଧ୍ୟରାତ୍ରରେ ନକ୍ସଲମାନେ ପଶିଥିଲେ । ସରଜୁଙ୍କ ସମେତ ତାଙ୍କର ଦୁଇପୁଅ ଓ ଗୋଟିଏ ଝିଅକୁ ଫାଶିରେ ଝୁଲାଇ ହତ୍ୟା କରିଥିଲେ ନକ୍ସଲ। ଏହି ଘଟଣା ଘଟାଇବା ପରେ ନକ୍ସଲମାନେ ସେଠାରେ ଏକ ଚିଠି ଛାଡିଯାଇଛନ୍ତି । ଚିଠିରେ ଲେଖାଯାଇଛି ଯେ, କିଛିଦିନ ପୂର୍ବରୁ ୪ ଜଣ ନକ୍ସଲଙ୍କୁ ଷଡଯନ୍ତ୍ର କରି ହତ୍ୟା କରାଯାଇଥିଲା ଓ ଏହାକୁ ଏନକାଉଣ୍ଟରର ରୂପ ଦିଆଯାଇଥିଲା । ଏହି ଷଡଯନ୍ତ୍ରରେ ସରଜୁର ପରିବାର ସଂପୃକ୍ତ ଥିବାରୁ ସେମାନଙ୍କୁ ହତ୍ୟା କରାଯାଇଛି ।
ଉଲ୍ଲେଖଯୋଗ୍ୟ, ଗତବର୍ଷ ପୂର୍ବ ଗୟା ଜିଲ୍ଲାର ଡୁମାରିଆ ଥାନା କ୍ଷେତ୍ରରେ ୪ ଜଣ ନକ୍ସଲଙ୍କୁ ପୁଲିସର କୋବ୍ରା ବାହିନୀ ଏନକାଉଣ୍ଟର କରି ହତ୍ୟା କରିଥିଲା । ଏହାକୁ ନେଇ ନକ୍ସଲ ସଂଗଠନ କହିଥିଲା ଯେ, ଯେଉଁ ଘରେ ନକ୍ସଲମାନେ ଲୁଚିଥିଲେ ସେଠାରେ ତାଙ୍କୁ ଖାଦ୍ୟରେ ବିଷ ଦେଇ ହତ୍ୟା କରାଯାଇଥିଲା ଓ ଏହାକୁ ଏନକାଉଣ୍ଟରର ରୂପ ଦିଆଯାଇଥିଲା ।