ମା'କୁ ହରାଇବାର ଦୁଃଖ କହିହେବନି, ୨୬ ବର୍ଷ ପୁରୁଣା ମାମଲାରେ ହସ୍ପିଟାଲ ଉପରେ ଲଗାଇଲେ ୨୦ ଲକ୍ଷ ଟଙ୍କାର ଜରିମାନା

ନୂଆଦିଲ୍ଲୀ: ଜାତୀୟ ଉପଭୋକ୍ତା ବିବାଦର ସମାଧାନ ଆୟୋଗ (ଏନସିଆରଡିସି) ମହାରାଷ୍ଟ୍ରର ଏକ ଡାକ୍ତରଖାନା ଏବଂ ଡାକ୍ତରଙ୍କ ଉପରେ ୨୦ ଲକ୍ଷ ଟଙ୍କା ଜରିମାନା ଲଗାଇଛନ୍ତି । ଏହି ଘଟଣାରେ ଜଣେ ମହିଳା ସନ୍ତାନ ପ୍ରସବ କରିବା ପରେ ତାଙ୍କର ମୃତ୍ୟୁ ଘଟିଥିଲା । ଆୟୋଗ ମହିଳାଙ୍କ ପରିବାର ସଦସ୍ୟଙ୍କୁ ସମବେଦନା ଜଣାଇଛନ୍ତି। ଜଣେ ମା’ଙ୍କୁ ହରାଇବାର ଯନ୍ତ୍ରଣା କେବେ ବର୍ଣ୍ଣନା କରାଯାଇପାରିବ ନାହିଁ ଓ ଏହା ଏକ କ୍ଷତ ଯାହା କେବେ ପୂରଣ ହୋଇପାରିବ ନାହିଁ ବୋଲି ଆୟୋଗ କହିଛନ୍ତି। ଏହି ମାମଲାଟି ୨୬ ବର୍ଷ ପୂର୍ବେ ଘଟିଥିବାବେଳେ ଏହି ମାମଲାର ଶୁଣାଣି ବେଳେ ଏନସିଆରଡିସି ଅଧ୍ୟକ୍ଷ ଆର.କେ ଅଗ୍ରୱାଲ ଏବଂ ସଦସ୍ୟ ଏସ.ଏମ କାନ୍ତିକର ଏହି ରାୟ ଦେଇଛନ୍ତି। ଡାକ୍ତରଖାନା ତଥା ଡାକ୍ତରଙ୍କ ଅବହେଳାର ଅଭିଯୋଗକୁ ନେଇ ଆୟୋଗ କହିଛନ୍ତି ଯେ ସେହି ପିଲାଙ୍କ ପାଇଁ ମାତୃ ଦିବସ ପାଳନ କରିବା କେତେ କଷ୍ଟଦାୟକ ତାହା ଆମେ ବୁଝିପାରୁଛୁ ।

ବାସ୍ତବରେ, ଫେବୃଆରୀ ୨୦୧୫ ରେ, ମହାରାଷ୍ଟ୍ର ଗ୍ରାହକ ବିବାଦ ସମାଧାନ କମିଶନ ଡାକ୍ତରଖାନା ଏବଂ ଡାକ୍ତରଙ୍କୁ ପରିବାରକୁ ୧୬ ଲକ୍ଷ ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଦେଇଥିଲେ। ଯାହା ବିରୋଧରେ ଡାକ୍ତରଖାନା ପକ୍ଷରୁ ଏନସିଆରଡିସି ରେ ଏକ ଆବେଦନ କରାଯାଇଥିଲା | ଏହାର ରାୟ ପ୍ରଦାନ କରି ଏନସିଆରଡିସି କହିଛି ଯେ ଏହି ମାମଲା ୨୬ ବର୍ଷ ପୂର୍ବେ ହୋଇଥିବାରୁ ମାତ୍ର ୧୬ ଲକ୍ଷର ଅର୍ଥଦଣ୍ଡ ବହୁତ କମ୍ । ଏହି ଘଟଣା ପାଇଁ ଉଭୟ ଡାକ୍ତରଖାନା ଏବଂ ଡାକ୍ତର, ପରିବାରକୁ ୨୦ ଲକ୍ଷ ଟଙ୍କା ଜରିମାନା ଦେବେ। ଏହା ବ୍ୟତୀତ ଅନ୍ୟାନ୍ୟ ପ୍ରକ୍ରିୟା ସମୟରେ ହୋଇଥିବା ଖର୍ଚ୍ଚର କ୍ଷତିପୂରଣ ହିସାବରେ ପରିବାରକୁ ଏକ ଲକ୍ଷ ଟଙ୍କା ଦେବେ। ଘଟଣାଟି ୨୦ ସେପ୍ଟେମ୍ବର ୧୯୯୫ରେ ଘଟିଥିଲା |

ଡାକ୍ତରଖାନାରେ ଚିକିତ୍ସା ସମୟରେ ଜଣେ ମହିଳା ସକାଳ ୯.୩୦ ସମୟରେ ଏକ ସୁସ୍ଥ ଶିଶୁପୁତ୍ର ଜନ୍ମ ଦେଇଥିଲେ। କିନ୍ତୁ ମହିଳାଙ୍କ ଗୁପ୍ତାଙ୍ଗରୁ ରକ୍ତସ୍ରାବ ବନ୍ଦ ହୋଇ ନଥିଲା। ଅନେକ ଚେଷ୍ଟା ପରେ ମଧ୍ୟ ଯେତେବେଳେ ଡାକ୍ତରମାନେ ରକ୍ତସ୍ରାବ ବନ୍ଦ କରିପାରିନଥିଲେ, ମହିଳାଙ୍କୁ ଦିନ ପ୍ରାୟ ୨.୩୦ ସମୟରେ ଅନ୍ୟ ଡାକ୍ତରଖାନାକୁ ଅଣାଯାଇଥିଲା। ଯେଉଁଠାରେ ମହିଳାଙ୍କର ମୃତ୍ୟୁ ହୋଇଯାଇଥିଲା | ଅଭିଯୋଗକାରୀଙ୍କ କହିବାନୁସାରେ, ରୋଗୀକୁ ଅନ୍ୟ ଡାକ୍ତରଖାନାକୁ ସ୍ଥାନାନ୍ତର କରିବା ପାଇଁ ହସ୍ପିଟାଲ ଏବଂ ଡାକ୍ତରମାନେ ପାଞ୍ଚ ଘଣ୍ଟା ସମୟ ନଷ୍ଟ କରିଥିଲେ। ଯେଉଁଥିପାଇଁ ମହିଳାଙ୍କର ମୃତ୍ୟୁ ହୋଇଥିଲା।