ପ୍ରଶାନ୍ତଙ୍କ ପରେ ଯୋଗେନ୍ଦ୍ର ଯାଦବଙ୍କ ଭବିଷ୍ୟବାଣୀ: ପୁଣି ଏନ୍‌ଡିଏ ସରକାର, କିନ୍ତୁ ‘୪୦୦ ପାର୍‌’ ଅସମ୍ଭବ

ନୂଆଦିଲ୍ଲୀ: ବିଜେପି ନେତୃତ୍ବାଧୀନ ଏନ୍‌ଡିଏ ୨୦୧୯ ଲୋକସଭା ପ୍ରଦର୍ଶନର ପୁନରାବୃତ୍ତି କରିବ କିନ୍ତୁ ୩୭୦ରୁ ଅଧିକ ଆସନ ପାଇବ ନାହିଁ ବୋଲି ରାଜନୈତିକ ବିଶ୍ଳେଷକ ପ୍ରଶାନ୍ତ କିଶୋର ଭବିଷ୍ୟବାଣୀ କରିଥିବା ବେଳେ ଅନ୍ୟତମ ରାଜନୈତିକ ସମୀକ୍ଷକ ଯୋଗେନ୍ଦ୍ର ଯାଦବ ମଧ୍ୟ ପୁଣି ଏନ୍‌ଡିଏ ଶାସନ ଫେରିବ ବୋଲି ଆକଳନ କରିଛନ୍ତି। ବିଜେପି କେତେ ଆସନ ଜିତିବ ସେ ନେଇ ଉଭୟଙ୍କର ଭିନ୍ନ ଭିନ୍ନ ପୂର୍ବାନୁମାନ ଥିଲେ ମଧ୍ୟ ଯାଦବଙ୍କ ପୂର୍ବାନୁମାନରୁ ଜଣାପଡୁଛି ଯେ ସହଯୋଗୀ ଦଳମାନଙ୍କୁ ନେଇ ବିଜେପି ତୃତୀୟ ଥର ପାଇଁ ସରକାର ଗଠନ କରିବାରେ ସଫଳ ହେବ।

ପ୍ରଶାନ୍ତ କିଶୋର ଭବିଷ୍ୟବାଣୀ କରିଥିଲେ ଯେ ବିଜେପି ପାଇଁ ଏକାକୀ ୩୭୦ ଆସନ ପାଇବା ଅସମ୍ଭବ ହେବ ଏବଂ ଏନ୍‌ଡିଏ ୪୦୦ ପାର୍‌ ଲକ୍ଷ୍ୟ ହାସଲ କରିପାରିବ ନାହିଁ। ତେବେ ବିଜେପି ପ୍ରାୟ ୩ ଶହ ପର୍ଯ୍ୟନ୍ତ ଆସନ ହାସଲ କରିବ ବୋଲି ସେ କହିଥିଲେ। ସରକାର ଗଠନ ପାଇଁ ଦଳକୁ ୨୭୨ ଆସନ ଆବଶ୍ୟକ। ଅନ୍ୟପକ୍ଷରେ ଯୋଗେନ୍ଦ୍ର ଯାଦବ ଭବିଷ୍ୟବାଣୀ କରିଛନ୍ତି ଯେ ବିଜେପି ଏକାକୀ ୨୬୦ରୁ ଅଧିକ ଆସନ ଅତିକ୍ରମ କରିବ ନାହିଁ ଏବଂ ଏନ୍‌ଡିଏ ୪୦୦ ପାର୍‌ ଲକ୍ଷ୍ୟ ହାସଲ କରିବା ମଧ୍ୟ ଅସମ୍ଭବ ବ୍ୟାପାର।

ପ୍ରଶାନ୍ତ କିଶୋର ଯୋଗେନ୍ଦ୍ର ଯାଦବଙ୍କ ଭିଡିଓର ଏକ ସ୍କ୍ରିନ୍ ସଟ୍ ସେୟାର କରିଛନ୍ତି, ଯେଉଁଥିରେ ସେ ଚଳିତ ଲୋକସଭା ନିର୍ବାଚନର ଫଳାଫଳର ପୂର୍ବାନୁମାନ କରିଛନ୍ତି। ଯାଦବ ପୂର୍ବାନୁମାନ ଅନୁଯାୟୀ, ବିଜେପି ୨୪୦ରୁ ୨୬୦ ଆସନ ଜିତିବ ଏବଂ ଏହାର ଏନଡିଏ ସହଯୋଗୀମାନେ ୩୫ରୁ ୪୫ ଟି ଅଧିକ ଯୋଗଦାନ ଦେବେ। ଯାହା ଫଳରେ ମେଣ୍ଟକୁ ୨୭୫ରୁ ୩୦୫ ଆସନ ପର୍ଯ୍ୟନ୍ତ ଆସନ ମିଳିପାରେ ବୋଲି ସେ କହିଛନ୍ତି। ଯାଦବ ପୂର୍ବାନୁମାନ କରିଛନ୍ତି ଯେ କଂଗ୍ରେସ ୮୫ରୁ ୧୦୦ ଆସନ ଜିତିବ ଏବଂ ଏହାର ସହଯୋଗୀମାନେ ଆଉ ୧୨୦ରୁ ୧୩୫ ଆସନ ପାଇବେ, ଯାହା ଫଳରେ ବିରୋଧୀଙ୍କ ନେତୃତ୍ୱାଧୀନ ମେଣ୍ଟ ୨୦୫ରୁ ୨୩୫ ଆସନ ପାଇବ ସମ୍ଭାବନା ରହିଛି। ଦେଶରେ ସରକାର ଗଠନ ପାଇଁ ୨୭୨ଟି ଆସନ ଆବଶ୍ୟକ ଏବଂ ବିଦାୟୀ ଲୋକସଭାରେ ଏନଡିଏର ୩୨୩ ଆସନ ଥିଲା ।