ନେପାଳ ଓ ବାଂଲାଦେଶକୁ ଆଉ ଅନୁନ୍ନତ ଦେଶ କୁହାଯିବ ନାହିଁ
ନ୍ୟୁୟର୍କ : ଭାରତର ଦୁଇଟି ପଡ଼ୋଶୀ ଦେଶ ନେପାଳ ଓ ବାଂଲାଦେଶକୁ ଏବେ ଆଉ ଅନୁନ୍ନତ ଦେଶ କୁହାଯିବ ନାହିଁ । କାରଣ ଏମାନଙ୍କୁ ବିକାଶଶୀଳ ଦେଶ ତାଲିକାକୁ ଉନ୍ନୀତ କରିଛି ମିଳିତ ଜାତିସଂଘ ।
Sambad is now on WhatsApp
Join and get latest news updates delivered to you via WhatsApp
ଜାତିସଂଘର ସାଧାରଣ ପରିଷଦ ଏକ ଐତିହାସିକ ସଂକଳ୍ପ ଗୃହୀତ କରି ଏହି ଦୁଇ ଦେଶ ସମେତ ମୋଟ ୩ଟି ଦେଶକୁ ଅନୁନ୍ନତ ( ଲିଷ୍ଟ୍ ଡେଭଲପଡ୍) ଦେଶରୁ ବିକାଶଶୀଳ ( ଡେଭଲପିଙ୍ଗ୍) ଦେଶର ମାନ୍ୟତା ପ୍ରଦାନ କରିଛି । ୩ୟ ଦେଶଟି ହେଉଛି ଲାଓ ପିପୁଲ୍ସ ଡେମୋକ୍ରାଟିକ୍ ରିପବ୍ଲିକ୍ । ତେବେ ଆସନ୍ତା ୨୦୨୬ରୁ ହିଁ ଏମାନଙ୍କୁ ବିକାଶଶୀଳ ଦେଶ ବୋଲି କୁହାଯିବ । କାରଣ କରୋନା ମହାମାରୀ ପରେ ବିଭିନ୍ନ ଦେଶର ଅର୍ଥନୀତି ପ୍ରଭାବିତ ହୋଇଥିବାରୁ ବିକାଶଶୀଳ ଦେଶର ମାନଦଣ୍ଡ ହାସଲ କରିବାକୁ ଏସବୁ ଦେଶମାନଙ୍କୁ ୫ ବର୍ଷର ପ୍ରସ୍ତୁତି ସମୟସୀମା ଦିଆଯାଇଛି । ଜାତିସଂଘର ଏହି ନିଷ୍ପତ୍ତିକୁ ଜାତିସଂଘରେ ଥିବା ବାଂଲାଦେଶର ସ୍ଥାୟୀ ପ୍ରତିନିଧି ରବାବ୍ ଫାତିମା ସ୍ବାଗତ କରିଛନ୍ତି ।
ବିଶ୍ବରେ ଏବେ ୪୬ଟି ଦେଶକୁ ଅନୁନ୍ନତ ବର୍ଗରେ ରଖାଯାଇଛି । ଗୋଟିଏ ଦେଶର ମୁଣ୍ଡପିଛା ଆୟ ୧୨୩୦ ଡଲାର ଟପିଲେ ତାହାକୁ ବିକାଶଶୀଳ ଦେଶର ମାନ୍ୟତା ଦିଆଯାଇଥାଏ । ୧୯୭୫ରେ ବାଂଲାଦେଶକୁ ଅନୁନ୍ନତ ଦେଶ ମାନ୍ୟତା ଦିଆଯିବା ବେଳେ ଏହାର ଦାରିଦ୍ର୍ୟ ହାର ୮୩ ପ୍ରତିଶତ ଥିଲା । କିନ୍ତୁ ଏବେ ତାହା ୨୦ .୫ ପ୍ରତିଶତକୁ ଖସିଆସିଛି । ସେହିପରି ନେପାଳକୁ ୧୯୭୧ରେ ଅନୁନ୍ନତ ଦେଶର ମାନ୍ୟତା ଦିଆଯାଇଥିଲା ।