ଏୟାର ଇଣ୍ଡିଆ ପରେ ନୂଆ ସିଇଓଙ୍କ ନାମ ଘୋଷଣା କଲା ଇଣ୍ଡିଗୋ

ନୂଆଦିଲ୍ଲୀ: ଇଣ୍ଡିଗୋ ଏୟାରଲାଇନ୍ସ ଆଜି ଏହାର ନୂତନ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ)ଙ୍କ ନାମ ଘୋଷଣା କରିଛି | ଇଣ୍ଡିଗୋ ପିଟର ଆଲବର୍ସଙ୍କୁ ସିଇଓ ଭାବେ ନିଯୁକ୍ତ କରିଛି। ସୂଚନା ଅନୁଯାୟୀ, ଆଲବର୍ସ ଅକ୍ଟୋବର ୧, ୨୦୨୨ରୁ ଦାୟିତ୍ୱ ଗ୍ରହଣ କରିବେ | ଏୟାରଲାଇନ୍ସର ବର୍ତ୍ତମାନର ସିଇଓ ରଞ୍ଜୟ ଦତ୍ତା ସେପ୍ଟେମ୍ବର ୩୦ରେ ଅବସର ନେବାକୁ ଯାଉଛନ୍ତି। ଆଉ ଦତ୍ତା ଅବସର ନେବା ପୂର୍ବରୁ ଆଜି କମ୍ପାନି ନୂତନ ସିଇଓଙ୍କ ନାମ ଘୋଷଣା କରିଛି | ଉଲ୍ଲେଖଯୋଗ୍ୟ, ଯେ ପିଟର ଆଲବର୍ସ ବର୍ତ୍ତମାନ କେଏଲଏମ ରୟାଲ୍ ଡଚ୍ ଏୟାରଲାଇନ୍ସର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଥିବାବେଳେ ଇଣ୍ଡିଗୋ ବୁଧବାର ଦିନ ଘୋଷଣା କରିଛି ଯେ ସେ ଅକ୍ଟୋବର ୧ ରୁ ଦାୟିତ୍ୱ ଗ୍ରହଣ କରିବେ |

ସୂଚନା ଥାଉ କି ଯେ ଜାନୁଆରୀ ୨୦୧୯ରେ ୭୧ ବର୍ଷୀୟ ରଞ୍ଜୟ ଦତ୍ତା ଇଣ୍ଡିଗୋର ଶୀର୍ଷ ପଦରେ ନିଯୁକ୍ତ ହୋଇଥିଲେ। କମ୍ପାନି ସେୟାର କରିଥିବା ଏକ ବିବୃତ୍ତି ଅନୁଯାୟୀ, ଇଣ୍ଟରଗ୍ଲୋବ ଆଭିଏସନ ଲିମିଟେଡର ପ୍ୟାରେଣ୍ଟ ଫାର୍ମର ନିର୍ଦ୍ଦେଶକ ବୋର୍ଡ ନିୟାମକ ଅନୁମୋଦନ ଅନୁଯାୟୀ ପିଟର ଆଲବର୍ସଙ୍କୁ ପରବର୍ତ୍ତୀ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଭାବେ ନିଯୁକ୍ତ କରାଯାଇଛି | ସୂଚନା ଥାଉ କି କିଛି ଦିନ ତଳେ ଟାଟା ସନ୍ସ କ୍ୟାମ୍ପବେଲ ୱିଲସନଙ୍କୁ ଏୟାର ଇଣ୍ଡିଆର ସିଇଓ ତଥା ପରିଚାଳନା ନିର୍ଦ୍ଦେଶକ ଭାବରେ ନିଯୁକ୍ତ କରିଥିଲା ।

୫୦ ବର୍ଷୀୟ କ୍ୟାମ୍ପବେଲ ୱିଲସନଙ୍କର ବିମାନ ଚଳାଚଳ କ୍ଷେତ୍ରରେ ୨୬ ବର୍ଷର ଅଭିଜ୍ଞତା ଥିବାବେଳେ ୱିଲସନ ୨୦୧୧ ମସିହାରେ ସିଙ୍ଗାପୁର ଏୟାରଲାଇନ୍ସର ସ୍ୱଳ୍ପ ମୂଲ୍ୟର କମ୍ପାନୀ ସ୍କୁଟର ପ୍ରତିଷ୍ଠାତା ଥିଲେ ଏବଂ ୨୦୧୬ ପର୍ଯ୍ୟନ୍ତ ଏହି ଦାୟିତ୍ୱରେ ଥିଲେ। ଏହା ପରେ ସେ ସିଙ୍ଗାପୁର ଏୟାରଲାଇନ୍ସର ସେଲସ ଏବଂ ମାର୍କେଟିଂ ବିଭାଗର ବରିଷ୍ଠ ଉପସଭାପତି ଭାବରେ ମଧ୍ୟ କାର୍ଯ୍ୟ କରିଥିଲେ |

ସମ୍ବନ୍ଧିତ ଖବର