ଏବେ ବ୍ୟାପୁଥିବା କରୋନା ଭାଇରସ ଉହାନ୍ ଭାଇରସଠାରୁ ଅଲଗା, ଅଧିକ ସଂକ୍ରାମକ
ଲଣ୍ଡନ : କରୋନା ଭାଇରସକୁ ପରାଜିତ କରିବାକୁ ସାରା ବିଶ୍ୱର ବୈଜ୍ଞାନିକମାନେ ଟୀକା ପ୍ରସ୍ତୁତିରେ ଲାଗିପଡ଼ିଥିବାବେଳେ ଏପର୍ଯ୍ୟନ୍ତ ସଫଳତା ମିଳିପାରିନାହିଁ । ଏହାର ଏକ କାରଣ ହେଉଛି କରୋନା ଭାଇରସ ନିଜକୁ ବଦଳାଇ ଚାଲିଛି । ଏପରିକି ଏବେ ବିଶ୍ୱରେ ଥିବା କରୋନା ଭାଇରସ ଉହାନରୁ ବାହାରିଥିବା ମୂଳ ଭାଇରସଠାରୁ ବେଶ ଅଲଗା ।
Sambad is now on WhatsApp
Join and get latest news updates delivered to you via WhatsApp
ବୈଜ୍ଞାନିକମାନେ କରୋନା ଭାଇରସର ଏହି ନୂତନ ପ୍ରକାରର ମ୍ୟୁଟେସନକୁ କହୁଛନ୍ତି ଡି୬୧୪ଜି । ଏହା ପୂର୍ବାପେକ୍ଷା ଅଧିକ ଦ୍ରୁତଗତିରେ ସଂକ୍ରମିତ ହୋଇଚାଲିଛି, ଫଳରେ ସାରା ବିଶ୍ୱରେ ସଂକ୍ରମଣ ହାର ନିଆଁ ପରି ବ୍ୟାପିଚାଲିଛି ।
ଇଂଲାଣ୍ଡର ବର୍ମିହାମ ବିଶ୍ୱବିଦ୍ୟାଳୟର ପ୍ରଫେସର ନିକ ଲୋମାନ କହିଛନ୍ତି ଯେ ଏହି ଡି୬୧୪ଜି ଦ୍ୱାରା ମଣିଷଙ୍କ ମଧ୍ୟରେ ଦ୍ରୁତଗତିରେ କରୋନା ବ୍ୟାପିଚାଲିଛି । ତେବେ ଏହା ପୂର୍ବର କରୋନା ଭାଇରସ ଅପେକ୍ଷା ଅଧିକ ମାରାତ୍ମକ ହୋଇନଥିଲେ ମଧ୍ୟ ଅଧିକ ସଂକ୍ରାମକ ରହିଛି ଅର୍ଥାତ ଏହା ଶୀଘ୍ର ମଣିଷରୁ ମଣିଷଙ୍କ ମଧ୍ୟରେ ବ୍ୟାପିଚାଲିଛି ।
ଲଣ୍ଡନରେ ଗବେଷକମାନେ ପ୍ରାୟ ୪୦,୦୦୦ କରୋନା ଜିନୋମକୁ ପରୀକ୍ଷା କରି ଜାଣିବାକୁ ପାଇଛନ୍ତି ଯେ ଡି୬୧୪ଜି ଭୁତାଣୁର ସଂକ୍ରମଣ ବେଗ ବେଶ ଅଧିକ ।
ବର୍ତ୍ତମାନ ବିଶ୍ୱରେ ମାଡ଼ିଚାଲିଥିବା କରୋନା ଭାଇରସର ବିଭିନ୍ନ ପ୍ରକାର ମଧ୍ୟରୁ ପ୍ରାୟ ୭୫ ପ୍ରତିଶତ ଏହି ଡି୬୧୪ଜି ବୋଲି ଜଣାପଡ଼ିଛି । ଚୀନର ଉହାନରୁ ଗତ ବର୍ଷ ଡିସେମ୍ବରରେ ବାହାରିଥିବା କରୋନା ଭାଇରସ ହେଉଛି ଡି-ଟାଇପ । କିନ୍ତୁ ଏବେ ଯେଉଁ ଭାଇରସ ରହିଛି ତାହାର ଅଧିକାଂଶ ଭାଗ ଜି-ଟାଇପ ବୋଲି ବୈଜ୍ଞାନିକମାନେ କହିଛନ୍ତି ।