ଏଣିକି ଅନଲାଇନ ସପିଙ୍ଗବେଳେ ସବୁସମୟରେ ଦେବାକୁ ପଡିବ ୧୬ ଅଙ୍କ ବିଶିଷ୍ଟ କାର୍ଡ ନମ୍ବର, ଆରବିଆଇ ଆଣିବାକୁ ଯାଉଛି ନୂଆ ନିୟମ
ନୂଆଦିଲ୍ଲୀ: ଯଦି ଆପଣ ଅଧିକାଂଶ ନେଣଦେଣ ଅନଲାଇନ ମାଧ୍ୟମରେ କରୁଛନ୍ତି ବା ଅନଲାଇନରେ ପ୍ରାୟ ସମୟ ସପିଙ୍ଗ କରୁଛନ୍ତି ତେବେ ଖୁବ ଶୀଘ୍ର ନୂଆ ଢଙ୍ଗରେ ପେମେଣ୍ଟ କରିବାକୁ ପଡିବ | କାରଣ ଖୁବ ଶୀଘ୍ର କ୍ରେଡିଟ୍ ଏବଂ ଡେବିଟ୍ କାର୍ଡ ମାଧ୍ୟମରେ ପେମେଣ୍ଟ୍ କରିବାକୁ ହେଲେ ଆପଣଙ୍କୁ ସିଭିଭି ନମ୍ବର ସହିତ ୧୬ ଅଙ୍କ ବିଶିଷ୍ଟ କାର୍ଡ ନମ୍ବର ଦେବାକୁ ପଡିବ | ଅନଲାଇନ୍ ଠକେଇକୁ ରୋକିବା ପାଇଁ ଆରବିଆଇ ଏହି ପଦକ୍ଷେପ ନେବାକୁ ଯାଉଛି।
Sambad is now on WhatsApp
Join and get latest news updates delivered to you via WhatsApp
ଏହା ସହିତ, ଆରବିଆଇ ସେହି ସବୁ କମ୍ପାନୀଗୁଡିକ ଉପରେ ମଧ୍ୟ ଏକ ଲଗାମ ଲଗାଇବ, ଯେଉଁମାନେ ଗ୍ରାହକଙ୍କ ଡେବିଟ୍-କ୍ରେଡିଟ୍ କାର୍ଡର ତଥ୍ୟ ନିଜ ପାଖରେ ରଖୁଛନ୍ତି | ଆରବିଆଇର ନୂତନ ନିୟମ ପରେ, ଏହିପରି କମ୍ପାନୀଗୁଡିକ ଗ୍ରାହକଙ୍କ କ୍ରେଡିଟ-ଡେବିଟ୍ କାର୍ଡର ତଥ୍ୟକୁ ସେମାନଙ୍କ ସର୍ଭରରେ ସେଭ କରିବାରେ ସମର୍ଥ ହେବେ ନାହିଁ | ଆଉ ଗ୍ରାହକଙ୍କୁ ଯେକୌଣସି ଅନଲାଇନ୍ ପେମେଣ୍ଟ୍ କରିବା ସମୟରେ ତାଙ୍କର ଡେବିଟ୍ କିମ୍ବା କ୍ରେଡିଟ୍ କାର୍ଡର ସମ୍ପୂର୍ଣ୍ଣ ବିବରଣୀ ଦେବାକୁ ପଡିବ |
ଅର୍ଥାତ ଏହି ନିୟମ ଲାଗୁ ହେବା ପରେ କେବଳ ସିଭିଭି ନମ୍ବର କାମ କରିବ ନାହିଁ | ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ନୂତନ ନିୟମ ଆସନ୍ତା ବର୍ଷ ଜାନୁଆରୀରୁ କାର୍ଯ୍ୟକାରୀ ହୋଇପାରେ । ଯଦିଓ ପୂର୍ବରୁ ଆରବିଆଇ ଏହି ନିୟମକୁ ଚଳିତ ବର୍ଷ ଜୁଲାଇରୁ କାର୍ଯ୍ୟକାରୀ କରିବାକୁ ଚାହୁଁଥିଲା, କିନ୍ତୁ ଏହାକୁ କାର୍ଯ୍ୟକାରୀ କରିବାରେ ଅସୁବିଧା ହେତୁ ଏହା ହୋଇପାରିନାହିଁ। ଏସବୁକୁ ଦୃଷ୍ଟିରେ ରଖି ବର୍ତ୍ତମାନ ଜାନୁଆରୀ ୨୦୨୨ ରୁ ଏହି ନିୟମ ଲାଗୁ ହେବ |