ନୂଆଦିଲ୍ଲୀ: ଖଲିସ୍ତାନ ସମର୍ଥକ ସଂଗଠନଗୁଡିକୁ କିଛି ଏନଜିଓ ପ୍ରଦାନ କରୁଥିବା ସହାୟତା ବାବଦରେ ବାରମ୍ବାର ଅଭିଯୋଗ ଆସୁଛି | ସଂଗଠନଗୁଡିକୁ କିଛି ଏନଜିଓ ବିପୁଳ ଆର୍ଥିକ ସହାୟତା କରୁଥିବାର ଅଭିଯୋଗ ଆସିବା ପରେ ଏବାବଦରେ ତଦନ୍ତ କରିବାକୁ ଜାତୀୟ ଅନୁସନ୍ଧାନ ଏଜେନ୍ସି ଦଳ ଟିମ ଶୁକ୍ରବାର ଦିନ କାନାଡାରେ ପହଞ୍ଚିଛି। ରିପୋର୍ଟ ମୁତାବକ ଏନଆଇଏର ଏକ ତିନିଜଣିଆ ଟିମ୍ ଚାରି ଦିନିଆ ଗସ୍ତରେ କାନାଡା ପହଞ୍ଚିଛନ୍ତି। ଶିଖ୍ ଫର ଜଷ୍ଟିସ୍ ଭଳି ଖଲିସ୍ତାନ ସଂଗଠନଗୁଡ଼ିକୁ କିଛି ଏନଜିଓ ଅର୍ଥ ପ୍ରଦାନ କରୁଥିବା ଅଭିଯୋଗ ହୋଇଆସୁଛି, ଯାହାଦ୍ୱାରା ସେମାନେ ସ୍ୱତନ୍ତ୍ର ଖଲିସ୍ତାନ ସୃଷ୍ଟି ପାଇଁ କାର୍ଯ୍ୟ କରିବେ | ଏହି ଘଟଣାର ଅନୁସନ୍ଧାନ ପାଇଁ ଜଣେ ଆଇଜି ସ୍ତରର ଅଧିକାରୀ ମଧ୍ୟ କାନାଡାରେ ପହଞ୍ଚିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଶିଖ୍ ଫର ଜଷ୍ଟିସ୍ ବ୍ୟତୀତ ଏନଆଇଏର ରାଡାରରେ ବାବର ଖାଲସା ଇଣ୍ଟରନ୍ୟାସନାଲ, ଖାଲିସ୍ତାନ ଜିନ୍ଦାବାଦ ଫୋର୍ସ, ଖାଲିସ୍ତାନ ଟାଇଗର ଫୋର୍ସ ଭଳି ସଂଗଠନ ଅଛି। ଏହି ସଂଗଠନଗୁଡିକ କାନାଡା, ବ୍ରିଟେନ, ଆମେରିକା, ଅଷ୍ଟ୍ରେଲିଆ, ଫ୍ରାନ୍ସ ଏବଂ ଜର୍ମାନୀରୁ ପ୍ରବଳ ଅର୍ଥ ପାଉଥିବାର ସନ୍ଦେହ କରାଯାଉଛି | ଏହାର ଅନୁସନ୍ଧାନ ପାଇଁ, ଏନଆଇଏର ଏକ ଦଳ କାନାଡାରେ ପହଞ୍ଚିଛି | ଏହା ପୂର୍ବରୁ ଶିଖ୍ ଫର ଜଷ୍ଟିସ୍ ନାମକ ଏକ ସଂଗଠନ ଦିଲ୍ଲୀ ସୀମାରେ ଆନ୍ଦୋଳନ କରୁଥିବା ଚାଷୀଙ୍କୁ ଉତ୍ସାହିତ କରିବା ପାଇଁ ପୁରସ୍କାର ଘୋଷଣା କରିଥିଲା। ଏହି ଘୋଷଣା ଅନୁଯାୟୀ କୁହାଯାଇଥିଲା ଯେ ୨୬ ଜାନୁୟାରୀରେ ଲାଲକିଲ୍ଲାରେ ଖାଲିସ୍ତାନର ପତାକା ଉତ୍ତୋଳନ କରୁଥିବା ବ୍ୟକ୍ତିଙ୍କୁ ୨.୫ ଲକ୍ଷ ଟଙ୍କା ପୁରସ୍କାର ପ୍ରଦାନ କରାଯିବ।
କେବଳ ଏତିକି ନୁହେଁ, ଏହି ସଂଗଠନ ସହ ଜଡିତ ଆତଙ୍କବାଦୀ ଗୁରୁପତବନ୍ତ ସିଂ ପନ୍ନୁ ମଧ୍ୟ ଏକ ଭିଡିଓରେ ୧୯୮୪ ମସିହାରେ ଶିଖ ବିରୋଧୀ ଦଙ୍ଗା ସହିତ କୃଷକଙ୍କ ଆନ୍ଦୋଳନକୁ ଯୋଡିବାକୁ ଚେଷ୍ଟା କରିଥିଲା । ସୂଚନା ଥାଉ କି ଯେ କୃଷକ ଆନ୍ଦୋଳନ ପୂର୍ବରୁ ମଧ୍ୟ ଆନ୍ତର୍ଜାତୀୟ ଲିଙ୍କ ଥିବା ଅଭିଯୋଗ ଆସିଥିଲା ଏବଂ ଏହାକୁ ନେଇ ବିବାଦ ଦେଖାଦେଇଥିଲା। କେବଳ ଏତିକି ନୁହେଁ, ଯେତେବେଳେ ଅନେକ ବିଦେଶୀ ବ୍ୟକ୍ତିତ୍ୱ କୃଷକଙ୍କ ଆନ୍ଦୋଳନକୁ ସମର୍ଥନ କରି ଟୁଇଟ୍ କରିଥିଲେ ସେତେବେଳେ ଏହି ପ୍ରସଙ୍ଗ ଚର୍ଚ୍ଚା ପରିସରକୁ ଆସିଯାଇଥିଲା |