ନ୍ୟୁୟର୍କରେ ବୁଲୁଛି ନିରବ ମୋଦି, ପାସପୋର୍ଟ ରଦ୍ଦ କଲେ ସରକାର
ନୂଆଦିଲ୍ଲୀ: ଦେଶର ପ୍ରମୁଖ ରାଷ୍ଟ୍ରାୟତ ବ୍ୟାଙ୍କ ପଂଜାବ ନ୍ୟାସନାଲ ବ୍ୟାଙ୍କ (ପିଏନବି)କୁ ୧୧,୪୦୦ କୋଟିର ଚୂନ ଲଗାଇ ଫେରାର ହୋଇଯାଇଥିବା ହୀରା ବ୍ୟବସାୟୀ ନିରବ ମୋଦି ଆମେରିକାର ନ୍ୟୁୟର୍କରେ ବୁଲୁଥିବା ଦେଖାଯାଇଛି । ନ୍ୟୁୟର୍କରେ ଏକ ଆପାର୍ଟମେଣ୍ଟରେ ସେ ରହୁଥିବା ଖବର ମିଳିଛି । ଅନ୍ୟପକ୍ଷରେ ଭାରତ ସରକାର ଆଜି ନିରବ ମୋଦି ଓ ମେହୁଲ ଚୋକସୀଙ୍କ ପାସ୍ପୋର୍ଟକୁ ୪ ସପ୍ତାହ ପାଇଁ ରଦ୍ଦ କରିଦେଇଛନ୍ତି । ଇଡିର ସୁପାରିଶ କ୍ରମେ ବିଦେଶ ମନ୍ତ୍ରାଳୟ ପକ୍ଷରୁ ଏହି ପଦକ୍ଷେପ ନିଆଯାଇଛି । ତେବେ ତାଙ୍କ ପାସପୋର୍ଟକୁ କାହିଁକି ସବୁଦିନ ପାଇଁ ରଦ୍ଦ କରାନଯିବ ସେ ନେଇ ନିରବ ଓ ଚୋକସୀଙ୍କୁ ନୋଟିସ କରାଯାଇଛି । ଗୋଟିଏ ସପ୍ତାହ ମଧ୍ୟରେ ନୋଟିସର ଜବାବ ନଦେଲେ ତାଙ୍କର ପାସପୋର୍ଟକୁ ରଦ୍ଦ କରାଯିବ ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଭାରତୀୟ ତଦନ୍ତ ସଂସ୍ଥା ସିବିଆଇର ଅନୁରୋଧ କ୍ରମେ ଅନ୍ତର୍ଜାତୀୟ ଅପରାଧିକ ପୁଲିସ୍ ସଂଗଠନ (ଇଣ୍ଟରପୋଲ) ନିରବ ମୋଦି, ତାଙ୍କ ଭାଇ ନିଶଲ ମୋଦି, ପତ୍ନୀ ଅମି ମୋଦି ଓ ମାମୁଁ ମେହୁଲ ଚୋକସୀଙ୍କ ବିରୋଧର ଲୁକ୍ ଆଉଟ୍ ନୋଟିସ୍ ଜାରି କରିଛି । ଲୁକ ଆଉଟ ସର୍କିୁଲାରର ଅର୍ଥ ହେଉଛି ବିଶ୍ୱର ସବୁ ପ୍ରମୁଖ ଏୟାରପୋର୍ଟ, ରେଳଜଙ୍କସନ ବା ପୋର୍ଟରେ ଯେଉଁଠାରେ ଇମିଗ୍ରେସନ ଯାଞ୍ଚ ହୁଏ, ସେଗୁଡ଼ିକୁ ନୀରବ ମୋଦି ଓ ତାଙ୍କ ସାଥୀମାନଙ୍କ ବାବଦରେ ସତର୍କ କରିଦିଆଯାଇଛି । ଏହାଫଳରେ ଅପରାଧୀ ପାଇଁ ଗୋଟିଏ ଦେଶରୁ ଆଉ ଏକ ଦେଶକୁ ପଳାୟନ କରିବା କଷ୍ଟକର ହେବ । ଅନ୍ୟପକ୍ଷରେ ଏହି ଠକେଇ ମାମଲାରେ ଅଭିଯୁକ୍ତ ଆଇନ ହାତରୁ ଖସିଯାଇପାରିବେ ନାହିଁ ବୋଲି ସରକାର କହିଛନ୍ତି ।