ବିଦେଶରେ ବ୍ୟାବସାୟିକ ଚୁକ୍ତି ଥିବା ହେତୁ ନୀରବ ମୋଦିଙ୍କୁ ଭାରତ ଆସିବା ପାଇଁ ସମୟ ଲାଗିବ : ଓକିଲ
ନୂଆଦିଲ୍ଲୀ : ୧୨,୬୦୦ କୋଟି ଟଙ୍କା ଠକେଇ କରି ଦେଶ ବାହାରକୁ ଚାଲି ଯାଇଥିବା ହୀରା ବ୍ୟବସାୟୀ ନୀରବ ମୋଦିଙ୍କ ମାମଲା ଧୀରେ ଧୀରେ ନୁଆ ମୋଡ଼ ନେବାକୁ ଲାଗିଛି । ସବୁ ଦିନ ନୂଆ ନୂଆ ତଥ୍ୟ ସାମ୍ନାକୁ ଆସିବାରେ ଲାଗିଛି । ପିଏନ୍ବି ଠକେଇ ମାମଲାରେ ପଚରାଉଚରା କରିବା ପାଇଁ ସିବିଆଇ ନୀରବ ମୋଦିଙ୍କୁ ସମନ ଜାରି କରିଥିବା ବେଳେ ସେ ନିର୍ଦ୍ଧାରିତ ସମୟରେ ଉପସ୍ଥିତ ନ ହୋଇ କେବେ ବି ଭାରତ ଆସିବେ ନାହିଁ ବୋଲି କହିଥିଲେ । ଏବେ ମୋଦିଙ୍କ ଓକିଲ ଏ ନେଇ ଏକ ନୂଆ ମନ୍ତବ୍ୟ ଦେଇଛନ୍ତି ।
ତାଙ୍କ କହିବା ଅନୁଯାୟୀ, ‘ପିଏନ୍ବି ମାମଲା ଏକ ଠକେଇ ନୁହେଁ ଏବଂ ନୀରବ ମୋଦିଙ୍କୁ ଭାରତ ଆସିବା ପାଇଁ କିଛି ସମୟ ଲାଗିବ । କାରଣ ଦେଶ ବାହାରେ ତାଙ୍କର କିଛି ବ୍ୟାବସାୟିକ ଚୁକ୍ତି ରହିଛି, ଯାହାକୁ ସେ ପୁରା କରିବା ପରେ ହିଁ ଭାରତ ଆସି ପାରିବେ । ସୁରକ୍ଷାକୁ ଆଖି ଆଗରେ ରଖି ସେ ଏମିତି ହଠାତ୍ ଭାରତକୁ ଫେରି ପାରିବେ ନାହିଁ । ସେଥିପାଇଁ ତାଙ୍କୁ ସମୟ ଲାଗୁଛି ଏବଂ ଆପଣମାନେ ଏହି ମାମଲାକୁ ଏକ ଠକେଇ ବୋଲି ମନେ କରି ଆଦୌ ଉଚିତ୍ ନୁହେଁ” ବୋଲି ସେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ,ନୀରବ ମୋଦିଙ୍କୁ ଭାରତ ଆସିବା ପାଇଁ କୁହା ଯାଇଥିଲେ ମଧ୍ୟ ସେ ଆସିବା ପାଇଁ ମନା କରି ଦେଇଥିଲେ । ନୀରବ ମୋଦି ଏବଂ ତାଙ୍କ ମାମୁଁ ମେହୁଲ ଚୋକ୍ସିଙ୍କୁ ପଚରାଉଚରା ପାଇଁ ସମନ ଜାରି କରାଯାଇଥିଲେ ମଧ୍ୟ ସେମାନେ ହାଜିର ହୋଇ ନଥିଲେ । ଏଥିପାଇଁ ସେମାନଙ୍କ ବିରୁଦ୍ଧରେ ଅଦାଲତ ଜାମିନ୍ ବିହୀନ ପରଓ୍ଵାନା ଜାରି କରିଥିଲା ।