ଅଙ୍ଗଦାନ କରିପାରିବେ ନାହିଁ ନିର୍ଭୟା ଦୋଷୀ, କୋର୍ଟ ଖାରଜ କଲେ ଆବେଦନ
ନୂଆଦିଲ୍ଲୀ: ଅଙ୍ଗଦାନ କରିପାରିବେ ନାହିଁ ନିର୍ଭୟାଙ୍କ ଦୋଷୀ | ଆଜି ଦିଲ୍ଲୀର ଏକ କୋର୍ଟ ଏଭଳି ଆବେଦନକୁ ଖାରଜ କରିଦେଇଛନ୍ତି | ଏକ ଏନଜିଓ ପକ୍ଷରୁ ଏହି ଆବେଦନ ଦାୟର କରାଯାଇଥିଲା | ଏଠାରେ ସୂଚନା ଥାଉ କି ଗୁରୁବାର ନିର୍ଭୟାଙ୍କ ଦୋଷୀଙ୍କୁ ଅଙ୍ଗଦାନ ପାଇଁ ମନେଇବାକୁ ତାଙ୍କୁ ଜେଲରେ ଭେଟିବାକୁ ଏକ ସ୍ବେଚ୍ଛାସେବୀ ଅନୁଷ୍ଠାନ ଅଦାଲତରେ ଆବେଦନ ଦାୟର କରିଥିଲେ | ତେବେ ଏହାକୁ କୋର୍ଟ ଖାରଜ କରିଦେଇଛନ୍ତି | ଆସନ୍ତା ଜାନୁଆରି ୨୨ ତାରିଖ ସକାଳ ୭ଟା ସମୟରେ ୪ଜଣ ନିର୍ଭୟା ଦୁଷ୍କର୍ମକାରୀଙ୍କୁ ଏକାଠି ଫାଶୀ ଖୁଣ୍ଟରେ ଝୁଲାଯିବ।
Sambad is now on WhatsApp
Join and get latest news updates delivered to you via WhatsApp
ଦିଲ୍ଲୀର ପଟିଆଲା ହାଉସ ଅଦାଲତରେ ଏକ ଏନଜିଓର ମୁଖପାତ୍ର ଶିବମ ଶର୍ମା ଏହି ଆବେଦନ ଦାୟର କରିଥିଲେ | ଏଥିରେ ଉଲ୍ଲେଖ କରାଯାଇଥିଲା କି ନିର୍ଭୟା ଦୋଷୀଙ୍କୁ ଭେଟିବାର ଅନୁମତି ଦିଆଯାଉ |ଯାହାଫଳରେ ତାଙ୍କ ମୃତ୍ୟୁ ପରେ ଅଙ୍ଗଦାନ କରାଯିବା ନେଇ ସେମାନଙ୍କୁ ମନେଇବାକୁ ଏକ ପ୍ରୟାସ କରାଯିବ | ତେବେ ଅତିରିକ୍ତ ନ୍ୟାୟାଧୀଶ ସତୀଶ କୁମାର ଆରୋଡା ଏହାକୁ ଖାରଜ କରିଦେଇଥିଲେ | ଉଲ୍ଲେଖଯୋଗ୍ୟ, ୨୦୧୨ରେ ରାଜଧାନୀ ନୂଆଦିଲ୍ଲୀର ଏକ ଚଳନ୍ତା ବସ୍ ମଧ୍ୟରେ ଜନୈକା ପାରାମୋଡିକାଲ ଛାତ୍ରୀ ନିର୍ଭୟାଙ୍କୁ ପବନ ଗୁପ୍ତା, ବିନୟ ଶର୍ମା, ଅକ୍ଷୟ ଠାକୁର, ମୁକେଶ ସିଂହ ଓ ରାମ ସିଂହ ନିର୍ମମ ଭାବେ ଗଣଦୁଷ୍କର୍ମ କରି ରାଜଧାନୀର ରାଜରାସ୍ତା ଉପରେ ଫିଙ୍ଗି ଦେଇଥିଲେ।
ଏକ ଫାଷ୍ଟଟ୍ରାକ୍ କୋର୍ଟରେ ଏହି ମାମଲାର ବିଚାର ହେବା ପରେ ବିଚାରପତି ଏହି ୫ ଜଣଙ୍କୁ ଅପରାଧୀ ଘୋଷିତ କରି ଫାଶୀ ଦଣ୍ଡାଦେଶ ଶୁଣାଇଥିଲେ, ଯାହା ପରେ ଦିଲ୍ଲୀ ହାଇକୋର୍ଟ ଓ ସୁପ୍ରିମକୋର୍ଟ କାଏମ୍ ରଖିଥିଲେ। ତେବେ, ତିହାର ଜେଲରେ ଥିବା ଏହି ୫ ଜଣ ଅପରାଧୀଙ୍କ ମଧ୍ୟରୁ ରାମ ସିଂହ ଗତ ୨୦୧୩ ମାର୍ଚ୍ଚ ମାସରେ ଆତ୍ମହତ୍ୟା କରିଦେବା ପରେ ଏବେ ଅନ୍ୟ ୪ ଅପରାଧୀ ଏବେ ତିହାର ଜେଲରେ ରହିଛନ୍ତି।