ନୂଆଦିଲ୍ଲୀ : ଫାଶୀରୁ ବର୍ତ୍ତିବାଲାଗି ପ୍ରତିଦିନ ନୂଆ ନୂଆ ଖେଳ ଖେଳୁଛନ୍ତି ନିର୍ଭୟା ମାମଲାର ଦୋଷୀ । ଗତ କାଲି ୩ ଜଣ ଦୋଷୀ ଫାଶୀ ଦଣ୍ଡାଦେଶ ବିରୁଦ୍ଧରେ ଅନ୍ତର୍ଜାତୀୟ ନ୍ୟାୟାଳୟ ଯାଇଥିବାବେଳେ ଆଜି ଦୋଷୀ ମୁକେଶ କହିଛି ଯେ ସେ ଅପରାଧ ହୋଇଥିବା ରାତିରେ ଦିଲ୍ଲୀରେ ଉପସ୍ଥିତ ନଥିଲା ।
Sambad is now on WhatsApp
Join and get latest news updates delivered to you via WhatsApp
ଅତିରିକ୍ତ ସେସନ୍ସ ଜଜ୍ ଧର୍ମେନ୍ଦ୍ର ରାନାଙ୍କ ନିକଟରେ ଏକ ଆବେଦନ କରି ସେ ଦର୍ଶାଇଛି ଯେ ତାକୁ ଡିସେମ୍ବର ୧୮, ୨୦୧୨ରେ ରାଜସ୍ଥାନରୁ ଗିରଫ କରାଯାଇଥିଲା । କିନ୍ତୁ ସେ ଡିସେମ୍ବର ୧୬ରେ ଦିଲ୍ଲୀରେ ନଥିଲା । ନିଜର ଆବେଦନରେ ସେ ଆହୁରି ମଧ୍ୟ ଦର୍ଶାଇଛି ଯେ ଜେଲ ଭିତରେ ତାକୁ ପ୍ରବଳ ନିର୍ଯ୍ୟାତନା ଦିଆଯାଇଥିଲା ।
ଗତକାଲି ୪ ଦୋଷୀଙ୍କ ମଧ୍ୟରୁ ତିନିଜଣ ଅକ୍ଷୟ, ପଓ୍ଵନ ଓ ବିନୟ ଫାଶୀରୁ ବର୍ତ୍ତିବା ପାଇଁ ଅନ୍ତର୍ଜାତୀୟ ନ୍ୟାୟାଳୟର ଦ୍ୱାରସ୍ଥ ହୋଇଥିଲେ । ଏହି ଫାଶୀ ଦଣ୍ଡ ଉପରେ ସ୍ଥଗିତାଦେଶ ଲଗାଇବାକୁ ସେମାନେ ଆବେଦନ କରିଛନ୍ତି ।
ଘଟଣାକ୍ରମ :
ଏଠାରେ ଉଲ୍ଲେଖଯୋଗ୍ୟ ଯେ, ୨୦୧୨ ମସିହା ଡିସେମ୍ବର ୧୬ ତାରିଖରେ ପାରାମେଡ଼ିକାଲ ଛାତ୍ରୀ ନିର୍ଭୟାକୁ ଏକ ଚଳନ୍ତା ବସରେ ଗଣ-ଦୁଷ୍କର୍ମ କରାଯିବା ସହ ଅମାନୁଷିକ ନିର୍ଯ୍ୟାତନା ଦିଆଯାଇଥିଲା । ୬ ଜଣ ବ୍ୟକ୍ତି ଏହି କାଣ୍ଡ ଘଟାଇବା ପରେ ତାକୁ ଚଳନ୍ତା ବସରୁ ଫିଙ୍ଗିଦେଇଥିଲେ । ଗୁରୁତର ଆହତ ଅବସ୍ଥାରେ ଚିକିତ୍ସିତ ହେଉଥିବା ନିର୍ଭୟା, ସେହିବର୍ଷ ଡିସେମ୍ବର ୨୯ରେ ସିଙ୍ଗାପୁରର ମାଉଣ୍ଟ ଏଲିଜାବେଥ ହସପିଟାଲରେ ମୃତ୍ୟୁବରଣ କରିଥିଲେ ।
ଏହି ଘଟଣାରେ ଗିରଫ ହୋଇଥିବା ୬ ଜଣ ଅଭିଯୁକ୍ତଙ୍କ ମଧ୍ୟରୁ ଜଣେ ରାମ ସିଂ ତିହାର ଜେଲରେ ଆତ୍ମହତ୍ୟା କରିଥିଲା । ଆଉ ଜଣ ଅଭିଯୁକ୍ତ ନାବାଳକ ହୋଇଥିବାରୁ ତାକୁ ଏକ ବାଳ ସୁଧାର ଗୃହକୁ ପଠାଇଦିଆଯାଇଥିଲା । ୨୦୧୩, ସେପ୍ଟେମ୍ବର ୧୩ରେ ଦିଲ୍ଲୀର ଏକ ଫାଷ୍ଟଟ୍ରାକ୍ କୋର୍ଟ ଏହି ୪ ଅଭିଯୁକ୍ତମାନଙ୍କୁ ଦୋଷୀ ଘୋଷଣା କରିବା ସହ ମୃତ୍ୟୁଦଣ୍ଡ ଦେଇଥିଲେ । ୫ ମେ, ୨୦୧୭ରେ ସୁପ୍ରିମକୋର୍ଟ ଏହି ମୃତ୍ୟୁଦଣ୍ଡକୁ କାଏମ ରଖିଥିଲେ । ସେହିବର୍ଷ ନଭେମ୍ବର ୧୩ରେ ଦୋଷୀମାନେ ସୁପ୍ରିମକୋର୍ଟରେ ପୁନର୍ବିଚାର ଆବେଦନ କରିଥିଲେ । ଗତ ବର୍ଷ ଜୁଲାଇ ମାସରେ ସୁପ୍ରିମକୋର୍ଟ ଦୋଷୀମାନଙ୍କ ପୁନର୍ବିଚାର ଆବେଦନକୁ ଖାରଜ କରିଦେଇଥିଲେ ।