ନୂଆଦିଲ୍ଲୀ: ତୃଣମୂଳ କଂଗ୍ରେସ ସାଂସଦ ମହୁଆ ମୈତ୍ର ଏବଂ ବିଜେପି ସାଂସଦ ନିଶିକାନ୍ତ ଦୁବେଙ୍କ ମଧ୍ୟରେ ବିବାଦ କ୍ରମାଗତ ଭାବେ ବୃଦ୍ଧି ପାଉଛି। ବିଜେପି ସାଂସଦ ନିଶିକାନ୍ତ ଦୁବେ ଟିଏମ୍‌ସି ସାଂସଦ ମହୁଆ ମୈତ୍ରଙ୍କ ବିରୋଧରେ ପ୍ରଶ୍ନ ପାଇଁ ଅର୍ଥ ନେବା ଅଭିଯୋଗ ଆଣିଥିଲେ। ତେବେ ନିଶିକାନ୍ତ ଦୁବେ ଆଜି ତାଙ୍କ ବିରୋଧରେ ଆଉ ଏକ ଗୁରୁତର ଅଭିଯୋଗ ଆଣିଛନ୍ତି। ବିଜେପି ସାଂସଦ କହିଛନ୍ତି ଯେ ଯେତେବେଳେ ମହୁଆ ଭାରତରେ ଥିଲେ, ଦୁବାଇରେ ତାଙ୍କ ସଂସଦର ଲଗଇନ୍ ଆଇଡି ବ୍ୟବହାର କରାଯାଇଥିଲା। ଜାତୀୟ ସୂଚନା କେନ୍ଦ୍ର (ଏନଆଇସି) ଅନୁସନ୍ଧାନକାରୀ ସଂସ୍ଥାକୁ ଏହି ସୂଚନା ଦେଇଛି ବୋଲି ସେ ଦାବି କରିଛନ୍ତି। ସୋସିଆଲ ମିଡିଆ ପ୍ଲାଟଫର୍ମରେ ବିଜେପି ନେତା ଏହା କହିଛନ୍ତି ଯେତେବେଳେ ଦୁବାଇରେ ସଂସଦର ଲଗ ଇନ ଆଇଡି ଖୋଲିଲା, ସେତେବେଳେ ସାଂସଦ ଭାରତରେ ଥିଲେ। ସମଗ୍ର ଭାରତ ସରକାର, ଦେଶର ପ୍ରଧାନମନ୍ତ୍ରୀ, ଅର୍ଥ ବିଭାଗ, କେନ୍ଦ୍ରୀୟ ଏଜେନ୍ସିମାନେ ଏହି ଏନଆଇସିରେ ଅଛନ୍ତି। ଟିଏମସି ଏବଂ ବିରୋଧୀଙ୍କୁ ତଥାପି ରାଜନୀତି କରିବାକୁ ପଡିବ କି? ଜନସାଧାରଣ ଏହା ସ୍ଥିର କରିବେ। ଏନଆଇସି ଏହି ସୂଚନା ଅନୁସନ୍ଧାନକାରୀ ସଂସ୍ଥାକୁ ଦେଇଛି।

Advertisment

ତେବେ ନିଶିକାନ୍ତ ଏହି ପୋଷ୍ଟରେ ସିଧାସଳଖ ମହୁଆଙ୍କ ନାମ ନେଇନାହାନ୍ତି | ଉଲ୍ଲେଖ ଥାଉ କି ବିଜେପି ସାଂସଦ ନିଶିକାନ୍ତ ଦୁବେ ଟିଏମ୍‌ସି ସାଂସଦ ମହୁଆ ମୈତ୍ରଙ୍କ ବିରୋଧରେ ପ୍ରଶ୍ନ ପାଇଁ ଅର୍ଥ ନେବା ଅଭିଯୋଗ ଆଣିଥିଲେ । ନିଶିକାନ୍ତ କହିଥିଲେ ବ୍ୟବସାୟୀ ଦର୍ଶନ ହୀରାନନ୍ଦାନୀଙ୍କ ବ୍ୟବସାୟିକ ସ୍ବାର୍ଥକୁ ସୁରକ୍ଷା ଦେବା ପାଇଁ ମହୁଆ ଏକ ଅପରାଧିକ ଷଡ଼୍‌ଯନ୍ତ୍ର କରିଥିଲେ। ମହୁଆ ମୈତ୍ରଙ୍କ ବିରୋଧରେ ଦୁବେ କରିଥିବା ଅଭିଯୋଗକୁ ବାଚସ୍ପତି ଓମ୍‌ ବିର୍ଲା ଏଥିକ୍ସ କମିଟି ନିକଟକୁ ପଠାଇ ଦେଇଥିଲେ | ମହୁଆ ଏହାପରେ ଦୁବେ ଏବଂ ଆଇନଜୀବୀ ଜୟ ଅନନ୍ତ ଦେହାଦ୍ରାଇଙ୍କ ନିକଟକୁ ଲିଗାଲ ନୋଟିସ ପଠାଇଥିଲେ । ତାଙ୍କୁ ବଦନାମ କରିବା ଅଭିଯୋଗ ମହୁଆ ଆଣିଥିଲେ । ତେବେ ହୀରାନନ୍ଦାନୀ ଗୁରୁବାର ସଂସଦର ଏଥିକ୍ସ କମିଟି ନିକଟରେ ଏକ ସତ୍ୟପାଠ ଦାଖଲ କଲେ ସେତେ‌ବେଳେ ଘଟଣା ନୂଆ ମୋଡ଼ ନେଲା। ଏଥିରେ ସେ ଦାବି କରିଥିଲେ ଯେ ମହୁଆ ତାଙ୍କର ସଂସଦୀୟ ଲଗ୍‌ଇନ୍‌ ଆଇଡି ଏବଂ ପାସୱାର୍ଡ ତାଙ୍କୁ ଦେଇଥିଲେ ଯାହାଫଳରେ ସେ ତାଙ୍କ ତରଫରୁ ପ୍ରଶ୍ନ ପୋଷ୍ଟ କରିପାରିବେ। ହୀରାନନ୍ଦାନୀ ତାଙ୍କ ସତ୍ୟପାଠରେ ଉଲ୍ଲେଖ କରିଥିଲେ ଯେ, ମହୁଆ ଯୋଜନାବଦ୍ଧ ଭାବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ବଦନାମ କରିବା ପାଇଁ ଆଦାନି ପ୍ରସଙ୍ଗ ଉଠାଉଥିଲେ।