ପୁଣି ପାଦ ଛୁଇଁବାକୁ ଯାଉଥିଲେ ନୀତିଶ; ହାତ ଧରି ପକାଇଲେ ମୋଦୀ

ନୂଆଦିଲ୍ଳୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପାଦ ଛୁଇଁବାକୁ ଚେଷ୍ଟା କରି ବିହାର ମୁଖ୍ୟମନ୍ତ୍ରୀ ନୀତିଶ କୁମାର ସମସ୍ତଙ୍କୁ ବାରମ୍ବାର ଚକିତ କରାଇ ଚାଲିଛନ୍ତି। ପୂର୍ବରୁ ବି ସେ ମୋଦୀଙ୍କ ପାଦ ଛୁଇଁ ଚର୍ଚ୍ଚାର ପରିସର ଭିତରକୁ ଆସିଛନ୍ତି।

ଏବେ ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ଭିଡିଓରେ ୭୩ ବର୍ଷୀୟ ନୀତୀଶ କୁମାର ୭୪ ବର୍ଷୀୟ ପିଏମ ମୋଦୀଙ୍କ ଆଡକୁ ଯାଉଥିବାର ନଜର ଆସିଛନ୍ତି। ସେ ତାଙ୍କ ପାଦ ଛୁଇଁବାକୁ ଚେଷ୍ଟା କରୁଥିବା ବେଳେ ମୋଦୀ ତାଙ୍କୁ ଅଟକାଇ ଦେଇ ହାତ ମିଳାଉଥିବାର ଭିଡିଓରେ ଦେଖିବାକୁ ମିଳିିଛି। 

ତେବେ ନୀତିଶ କୁମାର ମୋଦୀଙ୍କ ପାଦ ଛୁଇଁବା ଘଟଣା ପ୍ରଥମ ଥର ଘଟିନାହିଁ। ଗତବର୍ଷ ଜୁନ୍ ମାସରେ ନୀତିଶ କୁମାର ଯେତେବେଳେ ମୋଦୀଙ୍କ ପାଦ ଛୁଇଁବାକୁ ଚେଷ୍ଟା କରିଥିଲେ ସେତେବେଳେ ସଂସଦର ସେଣ୍ଟ୍ରାଲ ହଲରେ ଉପସ୍ଥିତ ଥିବା ସମସ୍ତଙ୍କୁ ସେ ଆଶ୍ଚର୍ଯ୍ୟନ୍ବିତ କରିଥିଲେ।

ଚଳିତବର୍ଷ ଏପ୍ରିଲରେ ନୱାଡାଠାରେ ଅନୁଷ୍ଠିତ ଏକ ଲୋକସଭା ନିର୍ବାଚନ ପ୍ରଚାର ‌ବେଳେ ​​ସେ ପ୍ରଧାନମନ୍ତ୍ରୀ ମୋଦୀଙ୍କ ପାଦକୁ ସଂକ୍ଷେପରେ ସ୍ପର୍ଶ କରିଥିଲେ। ଯାହା ଖୁବ୍ ଜୋର୍‌ ଆ‌ଲୋଚନାର ବିଷୟ ପାଲଟିଥିଲା।

ଲୋକସଭା ନିର୍ବାଚନରେ ​​ନୀତିଶ କୁମାରଙ୍କ ଜେଡି (ୟୁ) ବିଜେପିର ଦ୍ୱିତୀୟ ବୃହତ୍ତମ ସହଯୋଗୀ ଭାବରେ ଉଭା ହୋଇଛି ଏବଂ ଚଳିତବର୍ଷ କ୍ରମାଗତ ତୃତୀୟ ଥର ପାଇଁ ସରକାର ଗଠନ କରିବାରେ ସାହାଯ୍ୟ କରିଛି। 

ତେବେ ଏଥର ନୀତିଶ ମୋଦୀଙ୍କ ପାଦ ଛୁଇଁବା ଘଟଣା ଦରଭାଙ୍ଗାର ଏକ ଇଭେଣ୍ଟରେ ଘଟିଛି। ଯେଉଁଠାରେ ପ୍ରଧାନମନ୍ତ୍ରୀ ମୋଦୀ ଏମ୍ସ ପାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ ଏବଂ ପ୍ରାୟ ୧୨,୧୦୦ କୋଟି ଟଙ୍କା ମୂଲ୍ୟର ଅନେକ ପ୍ରମୁଖ ଭିତ୍ତିଭୂମି ପ୍ରକଳ୍ପର ଉଦଘାଟନ କରିଥିଲେ।