ତାମିଲନାଡ଼ୁରେ ପ୍ରବାସୀ ଶ୍ରମିକଙ୍କ ଉପରେ ଆକ୍ରମଣ କଥା ମିଛ : ବିହାର ତଦନ୍ତକାରୀ ଦଳର ଦାବି

ପାଟନା : ପ୍ରବାସୀ ଶ୍ରମିକଙ୍କ ଉପରେ ଆକ୍ରମଣ ନେଇ ଗୁଜବର ତଦନ୍ତ ପାଇଁ ତାମିଲନାଡୁ ଯାଇଥିବା ବିହାରର କିଛି ଅଧିକାରୀ ତାଙ୍କ ରିପୋର୍ଟରେ କହିଛନ୍ତି ଯେ ଏଭଳି ଆକ୍ରମଣ କେବଳ ଗୁଜବ। ତାମିଲନାଡୁର ବିଭିନ୍ନ ଅଞ୍ଚଳ ବୁଲି ବିହାର ଫେରିବା ରିପୋର୍ଟରେ ଏହି ଅଧିକାରୀମାନେ କହିଛନ୍ତି ଯେ ପ୍ରବାସୀ ଶ୍ରମିକଙ୍କ ଉପରେ କୌଣସି ଆକ୍ରମଣ ହୋଇନାହିଁ। ଡିଏମକେ ଶାସିତ ତାମିଲନାଡୁରେ ପ୍ରବାସୀ ଶ୍ରମିକଙ୍କ ଉପରେ ଆକ୍ରମଣ ଅଭିଯୋଗ ଆଣିଥିବା ସଦ୍ୟତମ ନକଲି ଭିଡିଓ ମାର୍ଚ୍ଚ ୬ ରେ ସାମ୍ନାକୁ ଆସିଥିଲା । ମନୀଷ କଶ୍ୟପ ଟୁଇଟ୍ କରିଥିବା ଏହି ନକଲି ଭିଡିଓରେ ଜଣେ ପ୍ରବାସୀ ଶ୍ରମିକ କ୍ୟାମେରାରେ କଥା ହେବା ପୂର୍ବରୁ ହସୁଥିବାର ଦେଖିବାକୁ ମିଳିଛି। ତାମିଲନାଡୁ ପୁଲିସ ଏହି ମାମଲାରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚେତାବନୀ ଦେଇଛି। ମନୀଷ ଟ୍ୱିଟରରେ ନିଜକୁ ଜଣେ ‘ସାର୍ବଜନୀନ ବ୍ୟକ୍ତିତ୍ୱ’ ଏବଂ ‘ସାମ୍ବାଦିକ’ ବୋଲି ପରିଚୟ ଦେଇଥିଲା ।

ପୋଲିସ କହିଛି ଯେ ମାର୍ଚ୍ଚ ୬ ରେ ସାମ୍ନାକୁ ଆସିଥିବା ପ୍ରବାସୀ ଶ୍ରମିକଙ୍କ ଆକ୍ରମଣ ର ନକଲି ଭିଡିଓ ପାଟନାରେ ସୁଟିଂ କରାଯାଇଥିଲା । ବିହାରର ଗୋପାଳଗଞ୍ଜରେ ଶ୍ରମିକମାନଙ୍କୁ ମାଡ଼ ମରାଯାଉଥିବାର ଭିଡିଓ କିପରି ସୁଟିଂ କରାଯାଇଥିଲା, ସେ ସମେତ ଅନେକ କଥା ବିହାର ପୁଲିସ ତଦନ୍ତରୁ ସାମ୍ନାକୁ ଆସିଛି। ତାମିଲନାଡୁ ଗସ୍ତରେ ଯାଇଥିବା କମିଟିର ମୁଖ୍ୟ ଡି ବାଲାମୂର୍ତ୍ତିଗାନ କହିଛନ୍ତି ଯେ ପ୍ରବାସୀଙ୍କ ଉପରେ ଆକ୍ରମଣ ସମ୍ପର୍କରେ ସମସ୍ତ ସୂଚନା ଗୁଜବ ଉପରେ ଆଧାରିତ। ବିହାର ପୁଲିସର ବରିଷ୍ଠ ଅଧିକାରୀ ଜିତେନ୍ଦ୍ର ସିଂହ ଗଙ୍ଗୱାର ଗଣମାଧ୍ୟମକୁ କହିଛନ୍ତି ଯେ ଯେଉଁମାନେ ନକଲି ଭିଡିଓ ପୋଷ୍ଟ କରି ସୋସିଆଲ ମିଡିଆରେ ଭାଇରାଲ  କରିବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ସମ୍ବନ୍ଧିତ ଖବର