ଦିଲ୍ଲୀ ବିଧାନସଭା ନିର୍ବାଚନ ପାଇଁ ମୁଖ୍ୟମନ୍ତ୍ରୀ ପ୍ରାର୍ଥୀ ଚୂଡ଼ାନ୍ତ ହୋଇନାହିଁ : ବିଜେପି
ନୂଆଦିଲ୍ଲୀ : ଆସନ୍ତା ଫେବ୍ରୁଆରି ମାସରେ ଦିଲ୍ଲୀରେ ବିଧାନସଭା ନିର୍ବାଚନ ହେବାର ସମ୍ଭାବନା ରହିଛି । ଖୁବ ଶୀଘ୍ର ନିର୍ବାଚନ ଆୟୋଗ ତାରିଖ ଘୋଷଣା କରିପାରେ । ତେବେ ବିଜେପି ଏପର୍ଯ୍ୟନ୍ତ ନିଜର ମୁଖ୍ୟମନ୍ତ୍ରୀ ପ୍ରାର୍ଥୀ ଚୂଡ଼ାନ୍ତ କରିନାହିଁ ।
Sambad is now on WhatsApp
Join and get latest news updates delivered to you via WhatsApp
ବିଜେପିର ଦିଲ୍ଲୀ ପ୍ରଭାରୀ ତଥା କେନ୍ଦ୍ରମନ୍ତ୍ରୀ ପ୍ରକାଶ ଜାବଡ଼େକର କହିଛନ୍ତି ଯେ ମୁଖ୍ୟମନ୍ତ୍ରୀ ପ୍ରାର୍ଥୀ ସଂପର୍କରେ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇନାହିଁ । ଏ ସଂପର୍କରେ ଦଳରେ କୌଣସି ନିଷ୍ପତ୍ତି ହେଲେ ସେ ସଂପର୍କରେ ସୂଚନା ଦିଆଯିବ । ସେ କହିଛନ୍ତି ଯେ ଦିଲ୍ଲୀରେ ବିଜେପି ନରେନ୍ଦ୍ର ମୋଦୀ ସରକାରର ସଫଳତାକୁ ନେଇ ନିର୍ବାଚନ ଲଢିବ ଓ ବିପୁଳ ବିଜୟ ହାସଲ କରିବ ।
ଅନ୍ୟପକ୍ଷରେ ଦିଲ୍ଲୀରେ ହୋଇଥିବା ନାଗରିକତା (ସଂଶୋଧନ) ଆଇନ ବିରୋଧୀ ହିଂସା ପଛରେ କଂଗ୍ରେସ ଓ ଆମ ଆଦମୀ ପାର୍ଟି (ଆପ୍) ଅଛନ୍ତି ବୋଲି ସେ ଅଭିଯୋଗ କରିଛନ୍ତି ।
୨୦୧୫ ଦିଲ୍ଲୀ ବିଧାନସଭା ନିର୍ବାଚନ ପାଇଁ ବିଜେପି ପୂର୍ବତନ ଆଇପିଏସ ଅଫିସର କିରଣ ବେଦୀଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀଭାବେ ଉପସ୍ଥାପନ କରିଥିଲା । କିନ୍ତୁ ଏହି ନିର୍ବାଚନରେ ଆମ ଆଦମୀ ପାର୍ଟି ବିପୁଳ ସଫଳତା ହାସଲ କରିଥିବାବେଳେ ବିଜେପି ଶୋଚନୀୟଭାବେ ପରାସ୍ତ ହୋଇଥିଲା । ଏହି ନିର୍ବାଚନରେ ଆପ ମୋଟ ୭୦ରୁ ୬୭ଟି ଆସନ ଜିତିଥିବାବେଳେ ବିଜେପି ମାତ୍ର ୩ଟି ଆସନ ଜିତିଥିଲା । ଏହି ପରାଜୟ ପରେ କିରଣ ବେଦୀଙ୍କୁ ପୁଡ଼ୁଚେରୀର ଉପ-ରାଜ୍ୟପାଳ ନିଯୁକ୍ତ କରାଯାଇଥିଲା ।