ଭାରତ ଉପରେ ପ୍ରଭାବ ପଡ଼ିବନି : ନୂଆ ନଦୀବନ୍ଧକୁ ନେଇ ଚୀନର ସଫେଇ

ବେଜିଂ: ବ୍ରହ୍ମପୁତ୍ର ନଦୀ ଉପରେ ବିଶ୍ୱର ସବୁଠାରୁ ବଡ ଡ୍ୟାମ୍ ନିର୍ମାଣ କରିବାକୁ ଯାଉଛି ଚୀନ । ପ୍ରକଳ୍ପର ଆନୁମାନିକ ମୂଲ୍ୟ ପ୍ରାୟ ୧୩.୭ ବିଲିୟନ ଡଲାର । ଅତ୍ୟନ୍ତ ସମ୍ବେଦନଶୀଳ ହିମାଳୟ ଅଞ୍ଚଳର ଟେକ୍ଟୋନିକ୍ ପ୍ଲେଟ୍ ସୀମାରେ ଚୀନ୍ ଏହି ଡ୍ୟାମ୍ ନିର୍ମାଣ କରୁଛି। ଏଠାରେ ପ୍ରାୟତଃ ଭୂମିକମ୍ପ ହୋଇଥାଏ। ଏହି ନିର୍ମାଣକୁ ନେଇ ଭାରତ ଚିନ୍ତା ପ୍ରକଟ କରିଥିବା ବେଳେ ଚୀନ୍ ଏବେ ନିଜର ଆଭିମୁଖ୍ୟ ସ୍ପଷ୍ଟ କରିଛି। ଏହି ଡ୍ୟାମ୍ ଭାରତରେ ଜଳ ପ୍ରବାହକୁ ପ୍ରଭାବିତ କରିବ ନାହିଁ ବୋଲି ଚୀନ ପକ୍ଷରୁ କୁହାଯାଇଛି।

ଏହି ପ୍ରକଳ୍ପର ବୈଜ୍ଞାନିକ ଯାଞ୍ଚ କରାଯାଇଛି ବୋଲି ଚୀନ୍ କହିଛି। ଭାରତ ଓ ବାଂଲାଦେଶ ଉପରେ ଏହାର କୌଣସି ନକାରାତ୍ମକ ପ୍ରଭାବ ପଡ଼ିବ ନାହିଁ। ଚୀନ୍ ବୈଦେଶିକ ମନ୍ତ୍ରାଳୟର ନୂଆ ମୁଖପାତ୍ର ଗୁଓ ଜିଆକୁନ୍ କହିଛନ୍ତି, ଆମେ ୟାର୍ଲୁଙ୍ଗ ସାଙ୍ଗପୋ ନଦୀ (ବ୍ରହ୍ମପୁତ୍ର ନଦୀର ତିବ୍ବତୀୟ ନାମ)ର ତଳ ମୁଣ୍ଡରେ ଚୀନ୍ ଜଳବିଦ୍ୟୁତ ପ୍ରକଳ୍ପ ନିର୍ମାଣର ବୈଜ୍ଞାନିକ ଯାଞ୍ଚ କରିଛୁ। ଏହା କୌଣସି ତଳିଆ ଦେଶର ପରିବେଶ, ପରିବେଶ ଓ ଜଳସମ୍ପଦ ଉପରେ କୌଣସି ନକାରାତ୍ମକ ପ୍ରଭାବ ପକାଇବ ନାହିଁ।