କୋଭିଡ୍-୧୯ ସନ୍ଦିଗ୍ଧ ତବଲିଗି ଜମାତ ସଦସ୍ୟଙ୍କ ତତ୍ତ୍ୱାବଧାନରେ କୌଣସି ମହିଳା ପୁଲିସ ଓ ନର୍ସ ରହିବେ ନାହିଁ
ଗାଜିଆବାଦ: ତବଲିଗି ଜମାତର ସଦସ୍ୟମାନଙ୍କ ଡାକ୍ତରୀ ସେବା ଓ ନିରାପତ୍ତା ସେବା ଯୋଗାଣରେ କୌଣସି ମହିଳା କର୍ମଚାରୀ ନିୟୋଜିତ ହେବେ ନାହିଁ ବୋଲି ଶୁକ୍ରବାର ଦିନ ଯୋଗୀ ଆଦିତ୍ୟନାଥଙ୍କ ନେତୃତ୍ୱାଧୀନ ଉତ୍ତର ପ୍ରଦେଶ ସରକାର ଘୋଷଣା କରିଛନ୍ତି । ଗାଜିଆବାଦର ଏମଏମଜି ଡିଷ୍ଟ୍ରିକ୍ଟ ହସପିଟାଲର ଆଇସୋଲେସନ୍ ୱାର୍ଡରେ ଥିବା ଏହି ସଦସ୍ୟମାନେ ଷ୍ଟାଫ୍ ନର୍ସମାନଙ୍କ ସହ ଦୁର୍ବ୍ୟବହାର କରିଥିଲେ । ତେଣୁ, ଆଜିଠାରୁ କେବଳ ପୁରୁଷ ସ୍ୱାସ୍ଥ୍ୟକର୍ମୀ ଏବଂ ପୁଲିସ ସେମାନଙ୍କର ତତ୍ତ୍ୱାବଧାନ କରିବେ ।
Sambad is now on WhatsApp
Join and get latest news updates delivered to you via WhatsApp
ଏହାଛଡ଼ା ଯେଉଁ ତବଲିଗି ଜମାତ ସଦସ୍ୟମାନେ ଗାଜିଆବାଦ ଡାକ୍ତରଖାନାରେ ମହିଳା ନର୍ସମାନଙ୍କ ସହ ଦୁର୍ବ୍ୟବହାର କରିଛନ୍ତି ସେମାନଙ୍କୁ ଜାତୀୟ ନିରାପତ୍ତା ଆଇନରେ ବୁକ୍ କରିବାକୁ ଯୋଗୀ ଆଦିତ୍ୟନାଥ ସରକାର ନିଷ୍ପତ୍ତି ଗ୍ରହଣ କରିଛନ୍ତି । ଏକ ବିବୃତିରେ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ଯେ ସେମାନେ ମାନବଜାତିର ଶତ୍ରୁ । ସେମାନେ ଆଇନ ଅମାନ୍ୟ କରିଛନ୍ତି । ମାନବଜାତିର ଶତ୍ରୁ ହୋଇଥିବାରୁ ସେମାନେ ଶାସନ ବ୍ୟବସ୍ଥା ଗ୍ରହଣ କରୁନାହାନ୍ତି । ମହିଳା ସ୍ୱାସ୍ଥ୍ୟକର୍ମୀଙ୍କ ପ୍ରତି ସେମାନେ କରିଥିବା ବ୍ୟବହାର ଘୃଣ୍ୟ ଅପରାଧ ଅଟେ । ତାଙ୍କୁ ଜାତୀୟ ନିରାପତ୍ତା ଆଇନରେ ଦଣ୍ଡିତ କରାଯିବ । ଆମେ ତାଙ୍କୁ ଛାଡ଼ିବୁ ନାହିଁ ।