ଅକ୍ଟୋବର ୧ରୁ ଫେବ୍ରୁଆରି ୨୮ ପର୍ଯ୍ୟନ୍ତ ଦିଲ୍ଲୀକୁ ଭାରୀଯାନ ମନା
ନୂଆଦିଲ୍ଲୀ : ଦିଲ୍ଲୀରେ ପ୍ରଦୂଷଣକୁ କମାଇବାକୁ ଦିଲ୍ଲୀ ସରକାର କେତେକ ଗୁରୁତ୍ବପୂର୍ଣ୍ଣ ପଦକ୍ଷେପ ନେଇଛନ୍ତି । ଆସନ୍ତା ଅକ୍ଟୋବର ୧ରୁ ଆସନ୍ତା ବର୍ଷ ଫେବ୍ରୁଆରି ୨୮ ପର୍ଯ୍ୟନ୍ତ ଦିଲ୍ଲୀକୁ ବାହାର ରାଜ୍ୟରୁ ମଧ୍ୟମ ଓ ଓଜନିଆ ଯାନ ପ୍ରବେଶକୁ ନିଷିଦ୍ଧ କରିଛନ୍ତି । ଏହାଛଡ଼ା ଏହି ସମୟରେ ଦିଲ୍ଲୀକୁ କେବଳ ବିଏସ-୬ ଭାରିଆଣ୍ଟ ଯାନ ପ୍ରବେଶ କରିପାରିବ । ଏସଂପର୍କରେ ଦିଲ୍ଲୀ ସରକାର ପଡ଼ୋଶୀ ଉତ୍ତରପ୍ରଦେଶ ଓ ହରିୟାଣା ସରକାରଙ୍କୁ ଚିଠି ଲେଖି କେବଳ ବିଏସ-୬ ପ୍ରଦୂଷଣ ମାନଦଣ୍ଡ ପାଳନ କରୁଥିବା ଯାନକୁ ପ୍ରବେଶ ଅଧିକାର ପାଇଁ ଅନୁରୋଧ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଦିଲ୍ଲୀର ପରିବହନ କମିସନର ଏପି ମିଶ୍ର ଏହି ପତ୍ର ଲେଖି ଜଣାଇଛନ୍ତି ଯେ ଦିଲ୍ଲୀର ପ୍ରଦୂଷଣ ସ୍ଥିତି ଦିନକୁ ଦିନ ଅଧିକ ଖରାପ ହେଉଛି । ଏହାକୁ ନେଇ ଖୋଦ ସୁପ୍ରିମକୋର୍ଟ ମଧ୍ୟ ଚିନ୍ତା ପ୍ରକଟ କରିଛନ୍ତି । ଉଭୟ ସୁପ୍ରିମକୋର୍ଟ ଓ ସିଏକ୍ୟୁଏମ ଦିଲ୍ଲୀର ପ୍ରଦୂଷଣ କମାଇବାକୁ ନିର୍ଦ୍ଦେଶ ଦେଇଛନ୍ତି । ବିଶେଷକରି ବାୟୁ ପ୍ରଦୂଷଣ କମାଇବାକୁ ଯାନବାହନ ଉପରେ ନିୟନ୍ତ୍ରଣ ପାଇଁ ପରାମର୍ଶ ଦିଆଯାଇଛି ।
ପ୍ରତିବର୍ଷ ଦିଲ୍ଲୀରେ ଶୀତଋତୁ ବିଶେଷକରି ଅକ୍ଟୋବରରୁ ଫେବ୍ରୁଆରି ପର୍ଯ୍ୟନ୍ତ ପ୍ରଦୂଷଣ ସ୍ଥିତି ସବୁଠାରୁ ଖରାପ ସ୍ଥିତିରେ ଥାଏ । ଏହାର କାରଣ ହେଉଛି ପଡ଼ୋଶୀ ହରିୟାଣା ଓ ପଂଜାବରେ ନଡ଼ା ଜାଳିବା ଓ ଯାନବାହନର ବହୁଳତା ।