ମୋହଲା କ୍ଲିନିକ୍‌ରେ ନାହିଁ ଶୌଚାଳୟ, ୧୪ଟି ହସ୍ପିଟାଲ୍‌ରେ ଆଇସିୟୁ ସୁବିଧା ନାହିଁ

ନୂଆଦିଲ୍ଲୀ: ଦିଲ୍ଲୀରେ ଡାକ୍ତରୀ ସେବାର ଅବହେଳା ଗୁରୁତର ଆର୍ଥିକ କୁପରିଚାଳନା ଏବଂ ଦାୟିତ୍ୱହୀନତାର ସ୍ପଷ୍ଟ ଚିତ୍ର ପ୍ରଦାନ କରିଛି। ଦିଲ୍ଲୀର ସ୍ୱାସ୍ଥ୍ୟସେବା ଭିତ୍ତିଭୂମି ଉପରେ ନିୟନ୍ତ୍ରକ ଏବଂ ଅଡିଟର ଜେନେରାଲ (ସିଏଜି) ରିପୋର୍ଟ ଗତ ଛଅ ବର୍ଷ ମଧ୍ୟରେ ଗୁରୁତର ଆର୍ଥିକ କୁପରିଚାଳନା, ଅବହେଳା ଏବଂ ଦାୟିତ୍ୱହୀନତାକୁ ଉଜାଗର କରିଛି।

ଆଜି ଦିଲ୍ଲୀ ବିଧାନସଭାରେ ଉପସ୍ଥାପିତ ହେବାକୁ ଥିବା ଏହି ରିପୋର୍ଟରେ ଉପକରଣ ଏବଂ ସ୍ୱାସ୍ଥ୍ୟସେବା କର୍ମୀଙ୍କ ତୀବ୍ର ଅଭାବ, ମୋହଲ୍ଲା କ୍ଲିନିକଗୁଡ଼ିକରେ ଦୁର୍ବଳ ଭିତ୍ତିଭୂମି ଏବଂ ଜରୁରୀକାଳୀନ ପାଣ୍ଠିର ନିମ୍ନ ବ୍ୟବହାରକୁ ଇଙ୍ଗିତ କରାଯାଇଛି।

ଅନେକ ହସ୍ପିଟାଲରେ ଗୁରୁତ୍ୱପୂର୍ଣ୍ଣ ସେବା ନାହିଁ ବୋଲି ଉଲ୍ଲେଖ କରାଯାଇଛି। ରିପୋର୍ଟରେ ପ୍ରକାଶ ପାଇଛି ଯେ ଦିଲ୍ଲୀର ଅନେକ ହସ୍ପିଟାଲରେ ଗୁରୁତ୍ୱପୂର୍ଣ୍ଣ ଚିକିତ୍ସା ସେବାର ଘୋର ଅଭାବ ରହିଛି। ସହରର ୨୭ଟି ହସ୍ପିଟାଲ ମଧ୍ୟରୁ ୧୪ଟିରେ ଆଇସିୟୁ ସୁବିଧା ନାହିଁ। ସେହିପରି ୧୬ଟିରେ ରକ୍ତଭଣ୍ଡାର ନାହିଁ। ଏହା ବ୍ୟତୀତ ଆଠଟି ହସ୍ପିଟାଲରେ ଅକ୍ସିଜେନ ଯୋଗାଣ ମଧ୍ୟ ନାହିଁ ବୋଲି ସୂଚନା ରହିଛି।

୧୫ଟି ହସ୍ପିଟାଲରେ ଶବଗୃହ ନାହିଁ, ୧୨ଟି ହସ୍ପିଟାଲ ଆମ୍ବୁଲାନ୍ସ ସେବା ବିନା କାର୍ଯ୍ୟ କରୁଛି, ଅନେକ ମୋହଲ୍ଲା କ୍ଲିନିକରେ ଶୌଚାଳୟ, ପାୱାର ବ୍ୟାକଅପ୍ ଏବଂ ଚେକ୍-ଅପ୍ ଟେବୁଲ ଭଳି ଅତ୍ୟାବଶ୍ୟକୀୟ ସୁବିଧାର ଅଭାବ ରହିଛି। ଆୟୁଷ ଡିସପେନ୍ସରୀରେ ମଧ୍ୟ ସମାନ ଅଭାବ ରିପୋର୍ଟ କରାଯାଇଛି।