ଏନଆରସି ଯୋଗୁଁ କୌଣସି ଭାରତୀୟଙ୍କ ପ୍ରତି ଅନ୍ୟାୟ ହେବ ନାହିଁ : ମୋଦି
ନୂଆଦିଲ୍ଲୀ : ଜାତୀୟ ଜନସଂଖ୍ୟା ରେଜିଷ୍ଟାର (ଏନଆରସି) ଯୋଗୁଁ କୌଣସି ଭାରତୀୟଙ୍କ ପ୍ରତି ଅନ୍ୟାୟ କରାଯିବ ନାହିଁ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ପଷ୍ଟ କରିଦେଇଛନ୍ତି । ଆଜି ଆସାମର ସିଲଚରଠାରେ ସେ କହିଛନ୍ତି ଯେ ଏନଆରସି ଯୋଗୁଁ ଲୋକମାନେ ସମସ୍ୟାର ସମ୍ମୁଖୀନ ହେଉଥିବା ସଂପର୍କରେ ସେ ଅବଗତ ଅଛନ୍ତି । କିନ୍ତୁ ଏହା ଫଳରେ ଜଣେ େହେଲେ ଭାରତୀୟଙ୍କ ପ୍ରତି ଅନ୍ୟାୟହେବାକୁ ଦିଆଯିବ ନାହିଁ ବୋଲି ସେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଆସାମ ଛଡା ବର୍ତ୍ତମାନ ସୁଦ୍ଧା ଅନ୍ୟ କୌଣସି ରାଜ୍ୟରେ ନ୍ୟାସନାଲ ରେଜିଷ୍ଟର ଅଫ ସିଟିଜେନ୍ସ ବା ଏନଆରସି ଲାଗୁ କରିବାର ଯୋଜନା ନାହିଁ ବୋଲି ସୂଚନା ଦେଇଛନ୍ତି କେନ୍ଦ୍ର ଗୃହ ରାଷ୍ଟ୍ରମନ୍ତ୍ରୀ ଶ୍ରୀ ହଂସରାଜ ଗଙ୍ଗାରାମ ଅହିର । ଶ୍ରୀ ଅହିର ରାଜ୍ୟସଭାକୁ ଲିଖିତ ଉତ୍ତର ମାଧ୍ୟମରେ ଏହା ଜଣାଇଛନ୍ତି ।
ମନ୍ତ୍ରୀଙ୍କ ଏହି ଉତ୍ତରର ଗୁରୁତ୍ବ ରହିଛି, କାରଣ ପୂର୍ବରୁ ଚର୍ଚ୍ଚା ହେଉଥିଲା ଯେ ସରକାର ଆସାମ ପରେ ପଶ୍ଚିମବଙ୍ଗ ଓ ଆଉ କିଛି ପ୍ରଦେଶରେ ଏନଆରସି ଲାଗୁ କରିପାରନ୍ତି । ବିଜେପି ସଭାପତି ଅମିତ ଶାହା ମଧ୍ୟ ନିଜର ଏକ ଭାଷଣରେ ଏଥିପାଇଁ ଯୁକ୍ତି ବାଢିଥିଲେ ।
ସୂଚନାଯୋଗ ଯେ ନାଗରିକତା ଅଧିନିୟମ (ନାଗରିକ ପଞ୍ଜିକରଣ ଓ ଜାତୀୟ ପରିଚୟପତ୍ର ଜାରି) ୨୦୦୩ ଅନୁଯାୟୀ ଆସାମରେ ଏନଆରସି ୧୯୫୧ ଲାଗୁ ହୋଇଛି । ମେ ୨୦୧୫ ଠାରୁ ଅଗଷ୍ଟ ୨୦୧୫ ଯାଏଁ ଆସାମରେ ଏନଆରସି ପାଇଁ ଦରଖାସ୍ତ ଆହ୍ୱାନ କରା ଯାଇଥିଲା ଓ ଆବଶ୍ୟକ ଯାଞ୍ଚ ପରେ ଏନଆରସିର ସଂପୂର୍ଣ୍ଣ ଚିଠା ଗତ ବର୍ଷ ଜୁଲାଇ ୩୦ରେ ରେ ପ୍ରସ୍ତୁତ ହୋଇଥିଲା । ଏନଆରସି ଚିଠାକୁ ନେଇ କୌଣସି ଦାବି ବା ଆପତ୍ତି ଗତ ଡିସେମ୍ବର ୩୧ ଯାଏଁ ଗ୍ରହଣ କରା ଯାଇଥିଲା ।