ଉତ୍ତରପ୍ରଦେଶ : ନାଗରିକତା ଆଇନ ବିରୋଧୀ ହିଂସାରେ ପୁଲିସ ଗୁଳିରେ କେହି ପ୍ରାଣ ହରାଇନାହାନ୍ତି : ଯୋଗୀ
ଲକ୍ଷ୍ନୌ : ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବୁଧବାରଦିନ କହିଛନ୍ତି ଯେ ରାଜ୍ୟରେ ହୋଇଥିବା ନାଗରିକତା ଆଇନ (ସିଏଏ) ବିରୋଧୀ ହିଂସାରେ କୌଣସି ବ୍ୟକ୍ତି ପୁଲିସ ଗୁଳିରେ ପ୍ରାଣ ହରାଇନାହାନ୍ତି । ଆନ୍ଦୋଳନକାରୀଙ୍କ ଦ୍ୱାରା ଗୁଳି ଚଳାଯିବାରୁ କିଛି ଲୋକ ମୃତ୍ୟୁବରଣ କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟ ବିଧାନସଭାରେ ସେ କହିଛନ୍ତି ଯେ କୌଣସି ପ୍ରସଙ୍ଗରେ ସ୍ୱର ଉତ୍ତୋଳନ କରିବାର ଅଧିକାର ସମସ୍ତଙ୍କର ରହିଛି, କିନ୍ତୁ ତାହା ସମ୍ବିଧାନ ପରିସରରେ ହେବା ଆବଶ୍ୟକ । ଜାତୀୟ ପତାକାକୁ ଆଗରେ ରଖି କୌଣସି ଗୋଷ୍ଠୀ ଶାନ୍ତିଭଙ୍ଗ କଲେ ଓ ହିଂସାକାଣ୍ଡ କଲେ କାହାରିକୁ ଛଡ଼ାଯିବ ନାହିଁ । ବିରୋଧୀ ଦଳମାନେ ମଧ୍ୟ ମହିଳା ସୁରକ୍ଷା, କୃଷକର ସମସ୍ୟା ଆଦି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉଠାଇବା ବଦଳରେ ଏହି ହିଂସାକାଣ୍ଡକାରୀଙ୍କୁ ସମର୍ଥନ କରୁଛନ୍ତି । ଯେଉଁମାନେ ରାମଭକ୍ତଙ୍କ ଉପରେ ଗୁଳିଚଳାଇଥିଲେ ସେମାନେ ଏବେ ହିଂସାକାଣ୍ଡକାରୀଙ୍କ ଉପରେ କାର୍ଯ୍ୟାନୁଷ୍ଠାନକୁ ବିରୋଧ କରୁଛନ୍ତି ।
ପୂର୍ବରୁ ଉତ୍ତରପ୍ରଦେଶର ବିଜନୋର ଜିଲ୍ଲାର ଏସପି ସ୍ୱୀକାର କରିଥିଲେ ଯେ ପୁଲିସ ଗୁଳିରେ ଜଣେ ବ୍ୟକ୍ତି ପ୍ରାଣ ହରାଇଛି । ବେସରକାରୀଭାବେ ପୁଲିସ ଗୁଳିରେ ମୃତ୍ୟୁ ସଂଖ୍ୟା ୨୦ ବୋଲି କୁହାଯାଉଛି । ସୂଚନାଯୋଗ୍ୟ ଯେ ନାଗରିକତା ଆଇନ ପ୍ରତିବାଦରେ ଗତ ଡିସେମ୍ବର ମାସରେ ଉତ୍ତରପ୍ରଦେଶର ବିଭିନ୍ନ ସହରରେ ବ୍ୟାପକ ହିଂସା ଦେଖାଦେଇଥିଲା । ହିଂସାକୁ ନିୟନ୍ତ୍ରଣ କରିବାକୁ ଯାଇ ପୁଲିସକୁ ଗୁଳି ଚଳାଇବାକୁ ପଡ଼ିଥିଲା ।