ନୂଆଦିଲ୍ଲୀ : ସରକାରଙ୍କ ଅଗ୍ନିପଥ ସ୍କିମକୁ ନେଇ ସାରା ଦେଶରେ ପୋଡ଼ାଜଳା କରୁଥିବା ଯୁବକମାନଙ୍କ ପ୍ରତି କଠୋର ହୋଇଛି ଭାରତୀୟ ସାମରିକ ବାହାନୀ । ଏପରି କାର୍ଯ୍ୟରେ ଲିପ୍ତ ରହିଥିବା ଯୁବକମାନଙ୍କୁ ସେନାରେ ନିଯୁକ୍ତି ଦିଆଯିବ ନାହିଁ ବୋଲି ତିନିସେନା ପକ୍ଷରୁ ସ୍ପଷ୍ଟ କରିଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ଆଜି ଅନୁଷ୍ଠିତ ତିନିବାହିନୀର ସାମ୍ବାଦିକ ସମ୍ମିଳନୀରେ କେନ୍ଦ୍ର ପ୍ରତିରକ୍ଷା ମନ୍ତ୍ରାଳୟ ଅଧିନସ୍ଥ ମିଲିଟାରୀ ବ୍ୟାପାର ବିଭାଗର ଅତିରିକ୍ତ ସଚିବ ଲେପ୍ଟନାଣ୍ଟ ଜେନେରାଲ ଅନୀଲ ପୁରି କହିଛନ୍ତି ଯେ ଶୃଙ୍ଖଳା ହେଉଛି ଭାରତୀୟ ସେନା ବାହାନୀର ମୂଳ ଭିତ୍ତି । ଏଠାରେ ଜଳାପୋଡ଼ାର କୌଣସି ସ୍ଥାନ ନାହିଁ । ନିଯୁକ୍ତି ବେଳେ ପ୍ରତି ପ୍ରାର୍ଥୀଙ୍କୁ ନିଶ୍ଚିତ ଭାବରେ ପୋଲିସ ଭେରିଫିକେସନ ଦେବାକୁ ହେବ । ଏହା ସହିତ ସେମାନଙ୍କୁ ଏକ ପ୍ରମାଣପତ୍ର ଦେବାକୁ ହେବ ଯେ ସେମାନେ ଜଳାପୋଡ଼ା ଓ ହିଂସାରେ ସାମିଲ ହୋଇ ନଥିଲେ । ପୋଲିସ ଯାଞ୍ଚ ସହ ଏପରି ପ୍ରମାଣପତ୍ର ବିନା ନିଯୁକ୍ତି ଦିଆଯିବ ନାହିଁ ।
ଯଦି କୌଣସି ପ୍ରାର୍ଥୀଙ୍କ ନାଁରେ ଏହି ହିଂସାକାଣ୍ଡ ଯୋଗୁଁ ପୁଲିସ ଏଫଆଇଆର ରହିଛି, ତେବେ ସେମାନେ ନିଯୁକ୍ତି ପାଇପାରିବେ ନାହିଁ ।
ସେ କହିଛନ୍ତି ଅଗ୍ନିବୀରଙ୍କ ସେବା ସର୍ତ୍ତାବଳୀ ଅନ୍ୟ ନିୟମିତ ସୈନ୍ୟଙ୍କ ସହ ସମାନ ହେବ । ସେବା ସମୟରେ ସହିଦ ହେଲେ ୧ କୋଟି ଟଙ୍କା ମିଳିବ । ସେହିପରି ସିଆଚେନ ଓ ଅନ୍ୟ ଦୁର୍ଗମ ସ୍ଥାନରେ ନିୟୋଜିତ ହେଲେ ନିୟମିତ ସୈନିକଙ୍କ ପରି ଭତ୍ତା ମିଳିବ ।