କୁତବ ମିନାର ପରିସରରେ ଖନନ ପାଇଁ ନିଷ୍ପତ୍ତି ହୋଇନି : ସଂସ୍କୃତି ମନ୍ତ୍ରାଳୟ
ନୂଆଦିଲ୍ଲୀ : ବାରାଣାସୀର ପ୍ରସିଦ୍ଧ କାଶୀ ବିଶ୍ବନାଥ ମନ୍ଦିର ପରିସରରେ ଥବା ଜ୍ଞାନବାପି ମସଜିଦ ସର୍ଭେକୁ ନେଇ ବିବାଦ ଚାଲିଥିବାବେଳେ ଦିଲ୍ଲୀର କୁତବ ମିନାରର ବି ସର୍ଭେ ହେବ ବୋଲି କଳ୍ପନା ଜଳ୍ପନା ପ୍ରକାଶ ପାଇଥିଲା । ଏପରିକି କୁତବ ମିନାର ପରିସରରେ ଖନନ ପାଇଁ କେନ୍ଦ୍ର ସରକାର ଭାରତୀୟ ପ୍ରତ୍ନତତ୍ତ୍ବ ବିଭାଗ(ଏଏସଆଇ)କୁ ନିର୍ଦ୍ଦେଶ ଦେଇଥିବା ବି ଚର୍ଚ୍ଚା ହେଉଥିଲା । କିନ୍ତୁ ମନ୍ତ୍ରାଳୟ ପକ୍ଷରୁ ଏହାକୁ ଖଣ୍ଡନ କରାଯାଇଛି । କେନ୍ଦ୍ର ସଂସ୍କୃତି ମନ୍ତ୍ରୀ ଜି.କେ. ରେଡ୍ଡି କହିଛନ୍ତି ଏପରି କୌଣସି ଖନନ ପାଇଁ ନିଷ୍ପତ୍ତି ନିଆଯାଇନାହିଁ କିମ୍ବା ଏଏସଆଇକୁ ଏପରି କୌଣସି ନିର୍ଦ୍ଦେଶ ଦିଆଯାଇନାହିଁ ।
Sambad is now on WhatsApp
Join and get latest news updates delivered to you via WhatsApp
ଏହା ପୂର୍ବରୁ ଏକ ରିପୋର୍ଟ ଆସିଥିଲା ଯେ, ଶନିବାର ଦିନ କେତେକ ଐତିହାସିକଙ୍କ ସହ କେନ୍ଦ୍ର ସଂସ୍କୃତି ମନ୍ତ୍ରାଳୟର ସଚିବ ଗୋବିନ୍ଦ ମୋହନ କୁତବ ମିନାର ପରିଦର୍ଶନ କରିଥିଲେ । ସୂତ୍ରରୁ ମିଳିଥିବା ସୂଚନା ଅନୁଯାୟୀ, ମିନାରର ଦକ୍ଷିଣରେ ଥିବା ମସଜିଦଠାରୁ ୧୫ ମିଟର ଦୂରରେ ଖନନ କାମ ଆରମ୍ଭ ହେବ। କିନ୍ତୁ ଏପରି କୌଣସି ନିଷ୍ପତ୍ତି ହୋଇନଥିବା ସଂସ୍କତି ମନ୍ତ୍ରାଳୟ ସ୍ପଷ୍ଟ କରିବା ପରେ ଏସବୁ କଳ୍ପନାଜଳ୍ପନାର ଅନ୍ତ ଘଟିଛି ।
କିଛିଦିନ ତଳେ ଏଏସଆଇର ପୂର୍ବତନ ଆଞ୍ଚଳିକ ନିର୍ଦ୍ଦେଶକ ଧରମବୀର ଶର୍ମା ଦାବି କରିଥିଲେ ଯେ କୁତବ ମିନାରକୁ କୁତବୁଦ୍ଦିନ ଆଇବାକ ନୁହେଁ, ରାଜା ବିକ୍ରମାଦିତ୍ୟ ନିର୍ମାଣ କରିଥିଲେ ।