ଯେତେ ଆନ୍ଦୋଳନ ହେଲେ ମଧ୍ୟ ନାଗରିକତା ଆଇନ ପ୍ରତ୍ୟାହାର କରାଯିବ ନାହିଁ : ଅମିତ ଶାହା
ଲକ୍ଷ୍ନୌ : ନାଗରିକତା (ସଂଶୋଧନ) ଆଇନ ବିରୋଧରେ ଦେଶବ୍ୟାପୀ ଆନ୍ଦୋଳନ ଚାଲିଥିବାବେଳେ ସରକାର ନିଜ ଆଭିମୁଖ୍ୟରେ ଅଟଳ ରହିଛନ୍ତି । ଗୃହମନ୍ତ୍ରୀ ଅମିତ ଶାହା କହିଛନ୍ତି ଯେ ଯେଉଁମାନେ ଏହି ଆଇନ ବିରୋଧରେ ଆନ୍ଦୋଳନ କରୁଛନ୍ତି ସେମାନେ ମନେ ରଖିବା ଆବଶ୍ୟକ ଯେ ଏହି ଆଇନକୁ ପ୍ରତ୍ୟାହାର କରାଯିବ ନାହିଁ । ସେମାନେ ଯେତେ ଇଚ୍ଛା ଆନ୍ଦୋଳନ କଲେ ମଧ୍ୟ ସରକାର ଏହି ଆଇନକୁ ପ୍ରତ୍ୟାହାର କରିବେ ନାହିଁ ।
Sambad is now on WhatsApp
Join and get latest news updates delivered to you via WhatsApp
ଲକ୍ଷ୍ନୌଠାରେ ଅନୁଷ୍ଠିତ ଏକ ର୍ୟାଲିରେ ଯୋଗ ଦେଇ ସେ କହିଛନ୍ତି ଯେ ଏହି ଆଇନ ମାଧ୍ୟମରେ କୌଣସି ନାଗରିକଙ୍କ ନାଗରିକତା ପ୍ରତ୍ୟାହାର କରାଯିବାର କୌଣସି ବ୍ୟବସ୍ଥା ନାହିଁ । ଏହି ଆଇନ ମାଧ୍ୟମରେ ପଡ଼ୋଶୀ ଦେଶରେ ଅତ୍ୟାଚାରର ସମ୍ମୁଖୀନ ହେଉଥିବା ସଂଖ୍ୟାଲଘୁମାନଙ୍କୁ ନାଗରିକତା ପ୍ରଦାନ କରାଯିବ । ଏହା ସତ୍ତ୍ୱେ କଂଗ୍ରେସ, ତୃଣମୂଳ କଂଗ୍ରେସ, ସମାଜବାଦିପାର୍ଟି, ବିଏସପି ଆଦି ଦଳ ଏହା ବିରୋଧରେ ମିଥ୍ୟା ପ୍ରଚାର କରୁଛନ୍ତି । ଯଦି କଂଗ୍ରେସର ସତସାହସ ଅଛି, ସେମାନେ ଏହି ଆଇନ ଉପରେ ତାଙ୍କ ସହ ବିତର୍କ କରନ୍ତୁ ବୋଲି ସେ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ଭୋଟ ବ୍ୟାଙ୍କ ରାଜନୀତି କଂଗ୍ରେସକୁ ଅନ୍ଧ କରିଦେଇଛି ।
ଏହି ର୍ୟାଲିରେ ସେ ଆହୁରି ମଧ୍ୟ କହିଛନ୍ତି ଯେ ଅଯୋଧ୍ୟାଠାରେ ଏକ ଆକାଶଛୁଆଁ ମନ୍ଦିରର ନିର୍ମାଣ କାର୍ଯ୍ୟ ଆସନ୍ତା ତିନିମାସ ମଧ୍ୟରେ ଆରମ୍ଭ ହେବ ।