ନୂଆଦିଲ୍ଲୀ: ଋଷ ଏବଂ ୟୁକ୍ରେନ ମଧ୍ୟରେ ଏବେ ବି ଯୁଦ୍ଧ ଜାରି ରହିଛି। ୟୁକ୍ରେନରୁ ବହୁ ସଂଖ୍ୟକ ଲୋକ ସ୍ଥାନାନ୍ତର ହୋଇଛନ୍ତି | ୟୁକ୍ରେନ ଯୁଦ୍ଧରେ ଛୋଟ ଛୋଟ ପିଲାମାନେ ମଧ୍ୟ ବହୁତ ପ୍ରଭାବିତ ହୋଇଛନ୍ତି | ଏହି ସମୟରେ,ଋଷର ଜଣେ ସାମ୍ବାଦିକ ୟୁକ୍ରେନର ପିଲାମାନଙ୍କୁ ସାହାଯ୍ୟ କରିବା ପାଇଁ ତାଙ୍କ ନୋବେଲ ପୁରସ୍କାର ପଦକକୁ ନିଲାମ କରିଛନ୍ତି। ସୋମବାର ରାତିରେ ଋଷର ସାମ୍ବାଦିକ ଦିମିତ୍ରୀ ମୁରାଟୋଭ ତାଙ୍କ ନୋବେଲ ଶାନ୍ତି ପୁରସ୍କାର ପଦକ ନିଲାମ କରିଛନ୍ତି। ସାମ୍ବାଦିକ ଦିମିତ୍ରୀ ମୁରାଟୋଭ ନୋବେଲ ପୁରସ୍କାର ନିଲାମରୁ ମିଳିଥିବା ଅର୍ଥକୁ ୟୁକ୍ରେନ ଯୁଦ୍ଧରେ ବିସ୍ଥାପିତ ପିଲାମାନଙ୍କୁ ସାହାଯ୍ୟ କରିବେ। ସେ ଏହି ରାଶି ସିଧାସଳଖ ୟୁନିସେଫକୁ ଟ୍ରାନ୍ସଫର କରିବେ ଯାହାଦ୍ୱାରା ପିଲାମାନଙ୍କୁ ସାହାଯ୍ୟ କରାଯାଇପାରିବ |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ଋଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ମଧ୍ୟରେ ଋଷର ସାମ୍ବାଦିକ ତଥା ଖବରକାଗଜ ନୋଭାୟା ଗେଜେଟାର ମୁଖ୍ୟ ସମ୍ପାଦକ ଦିମିତ୍ରୀ ମୁରାଟୋଭ ସୋମବାର ଦିନ ତାଙ୍କ ନୋବେଲ ଶାନ୍ତି ପୁରସ୍କାରରେ ପାଇଥିବା ପଦକକୁ ୧୦୩.୫ ମିଲିୟନ ଡଲାରରେ ନିଲାମ କରିଛନ୍ତି। ଏକ ସାକ୍ଷାତକାରରେ ବରିଷ୍ଠ ସାମ୍ବାଦିକ କହିଛନ୍ତି ଯେ ୟୁକ୍ରେନ ଯୁଦ୍ଧ ସମୟରେ ଅନାଥ ହୋଇଯାଇଥିବା ପିଲାମାନଙ୍କୁ ନେଇ ସେ ଚିନ୍ତିତ ଅଛନ୍ତି ।
ସୂଚନା ଥାଉ କି ୨୦୨୧ ମସିହାରେ ଫିଲିପାଇନ୍ସର ସାମ୍ବାଦିକ ମାରିଆ ରାସାଙ୍କ ସହ ଋଷର ସାମ୍ବାଦିକ ଦିମିତ୍ରୀ ମୁରାଟୋଭ ନୋବେଲ ଶାନ୍ତି ପୁରସ୍କାର ପାଇଥିଲେ। ଅଭିବ୍ୟକ୍ତିର ସ୍ୱାଧୀନତା ରକ୍ଷା ପାଇଁ ତାଙ୍କ ଉଦ୍ୟମ ପାଇଁ ନୋବେଲ କମିଟି ତାଙ୍କୁ ସମ୍ମାନିତ କରିଥିଲା | ସୋଭିଏତ୍ ୟୁନିଅନର ପତନ ପରେ ୧୯୯୩ରେ ନୋଭାୟା ଗେଜେଟା ପ୍ରତିଷ୍ଠା କରିଥିବା ସାମ୍ବାଦିକମାନଙ୍କ ମଧ୍ୟରୁ ସେ ଅନ୍ୟତମ। ଚଳିତ ବର୍ଷ ଋଷରେ କାର୍ଯ୍ୟ କରିବାକୁ ବାରଣ କରାଯିବା ପରେ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ରଣନୀତିକୁ ସମାଲୋଚନା କରିବାରେ ଏହା ଏକମାତ୍ର ପ୍ରମୁଖ ଖବରକାଗଜ ପାଲଟିଛି।