ଖୋଲିଲା ଶାହିନବାଗର ନୋଏଡା-ଫରିଦାବାଦ ରାସ୍ତା, କାର-ବାଇକ ହିଁ ଯାଇପାରିବ
ନୂଆଦିଲ୍ଲୀ: ୭୦ ଦିନ ପରେ ଖୋଲିଲା ଶାହିନବାଗର ଅବରୋଧ ରାସ୍ତା | ନାଗରିକତା ସଂଶୋଧନ ଅଧିନିୟମ ବିରୋଧରେ ଦିଲ୍ଲୀର ଶାହିନବାଗରେ ପ୍ରଦର୍ଶନ କରୁଥିବା ପ୍ରଦର୍ଶନକାରୀ ନୋଏଡା ଓ ଫରିଦାବାଦକୁ ସଂଯୋଗ କରୁଥିବା ରାସ୍ତାକୁ ଖୋଲିଦେଇଛନ୍ତି | ପ୍ରଦର୍ଶନକାରୀ କେବଳ ଆବୁଲଫଜାଲ ରୋଡକୁ ଖୋଲିଥିବାରୁ ଭାରୀ ଯାନ ଏହା ମଧ୍ୟ ଦେଇ ଯାଇପାରିବ ନାହିଁ | ଏହି ରାସ୍ତା ଦେଇ କେବଳ କାର ଓ ବାଇକ ହିଁ ଯାଇପାରିବ | ବର୍ତ୍ତମାନ ଯାଏଁ ପ୍ରଦର୍ଶନକାରୀ ଶାହିନବାଗ ମୁଖ୍ୟ ରାସ୍ତାକୁ ଅବରୋଧ କରି ରଖିଛନ୍ତି |
Sambad is now on WhatsApp
Join and get latest news updates delivered to you via WhatsApp
ପ୍ରଦର୍ଶନକାରୀଙ୍କ କହିବା ମୁତାବକ ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ କରାଯାଇଥିବା ବାର୍ତ୍ତାକାରଙ୍କ ସହ କଥାବାର୍ତ୍ତା ହେବ ପରେ ହିଁ ଆବୁଲଫଜାଲ ରୋଡକୁ ଖୋଲିବାର ନିଷ୍ପତ୍ତି ନିଆଯାଇଛି | ଏଠାରେ ସୂଚନା ଥାଉ କି ଗତକାଲି ନୋଏଡାକୁ ଦିଲ୍ଲୀର କାଳିନ୍ଦୀକୁଞ୍ଜକୁ ସଂଯୋଗ କରୁଥିବା ନୋଏଡା-ଫରିଦାବାଦ ରାସ୍ତାକୁ ଶୁକ୍ରବାର ଦିନ ଦିଲ୍ଲୀ ପୁଲିସ କିଛି ସମୟ ପାଇଁ ଖୋଲିଥିଲା |
ସେ ରାସ୍ତାରେ ଏକ ବସ୍ ଯିବାକୁ ଥିବାରୁ କିଛି ସମୟ ପାଇଁ ବେରିକେଡ୍ ହଟାଯାଇଥିଲା ଓ ପରେ ବସ୍ଟି ଚାଲିଯିବା ପରେ ପୁଣି ବେରିକେଡ୍ ବସାଯାଇଥିଲା । ‘ସିଏଏ’ ବିରୋଧରେ ପ୍ରତିବାଦ ଚାଲିଥିବାରୁ ଦକ୍ଷିଣପୂର୍ବ ଦିଲ୍ଲୀର ଶାହିନବାଗ-କାଳିନ୍ଦୀକୁଞ୍ଜ ରାସ୍ତାକୁ ଦୁଇ ମାସରୁ ଅଧିକ ସମୟ ହେବ ଅବରୋଧ କରାଯାଇଛି। ଦୁଇ କିଲୋମିଟର ଦୀର୍ଘ ଏହି ରାସ୍ତାରେ ବ୍ୟାବସାୟିକ କେନ୍ଦ୍ର ଏବଂ ରେସ୍ତୋଁରା ଆଦି ରହିଛି।