ନୂଆଦିଲ୍ଲୀ: ବାଂଲାଦେଶର ଅନ୍ତରୀଣ ସରକାରଙ୍କ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ୍ ଭାରତର ଉତ୍ତର-ପୂର୍ବ ରାଜ୍ୟଗୁଡ଼ିକରେ ପ୍ରଭାବ ବିସ୍ତାର କରିବାକୁ ଚୀନ୍‌କୁ ଆମନ୍ତ୍ରଣ କରି ଦେଇଥିବା ମନ୍ତବ୍ୟକୁ ଭାରତରେ ରାଜନୈତିକ ଦଳ ନିର୍ବିଶେଷରେ ନେତାମାନଙ୍କ ଦ୍ବାରା ତୀବ୍ର ନିନ୍ଦା କରାଯାଇଛି। ଗତ ସପ୍ତାହରେ ଚୀନ୍ ଗସ୍ତ ଅବସରରେ ଏକ ଉଚ୍ଚସ୍ତରୀୟ ବୈଠକରେ ୟୁନୁସ୍ ଭାରତର ‘ଭୂ-ପରିବୃତ’ (ଲ୍ୟାଣ୍ଡ୍‌ଲକ୍‌ଡ) ଉତ୍ତର-ପୂର୍ବାଞ୍ଚଳ ପାଇଁ ‘ମହାସାଗରର ଏକମାତ୍ର ରକ୍ଷକ’ ଭାବରେ ତା’ର ରଣନୈତିକ ସ୍ଥିତିର ଉପଯୋଗ କରି ବାଂଲାଦେଶରେ ଅର୍ଥନୈତିକ ପାଦ ଥାପିବା ପାଇଁ ବେଜିଂକୁ ଅନୁରୋଧ କରିଥିଲେ। ତାଙ୍କ ମନ୍ତବ୍ୟକୁ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ତୀବ୍ର ନିନ୍ଦା କରିବା ସହ ଏହାକୁ ଉତ୍ତେଜନାମୂଳକ ଓ ଅଗ୍ରହଣୀୟ ବୋଲି କହିଛନ୍ତି। ବାଂଲାଦେଶର ତଥାକଥିତ ଅନ୍ତରୀଣ ସରକାରର ମହମ୍ମଦ ୟୁନୁସ୍ ଉତ୍ତର-ପୂର୍ବ ଭାରତର ସାତଟି ରାଜ୍ୟକୁ ଭୂ-ପରିବୃତ ବୋଲି ଉଲ୍ଲେଖ କରିବା ଏବଂ ବାଂଲାଦେଶକୁ ସମୁଦ୍ର ଅଞ୍ଚଳର ରକ୍ଷକ ଭାବରେ ଦର୍ଶାଇବାର ବୟାନ ଆପତ୍ତିଜନକ ଓ ଘୋର ନିନ୍ଦନୀୟ। ଏହି ମନ୍ତବ୍ୟ ଭାରତର ରଣନୈତିକ ‘ଚିକେନ୍‌ସ ନେକ୍’ କରିଡର ସହ ଜଡ଼ିତ ନିରନ୍ତର ଦୁର୍ବଳତାକୁ ଦର୍ଶାଉଛି ବୋଲି ଶର୍ମା କହିଛନ୍ତି। ଏଭଳି ବିପଦର ମୁକାବିଲା ପାଇଁ ସେ ଏହି ଅଞ୍ଚଳରେ ଭିତ୍ତିଭୂମି ବୃଦ୍ଧି କରିବାକୁ ଆହ୍ୱାନ ଦେଇଛନ୍ତି। 

Advertisment

ଚିକେନ୍ସ ନେକ୍ କରିଡର ତଳେ ଏବଂ ଏହାର ଆଖପାଖରେ ଅଧିକ ମଜବୁତ ରେଳ ଓ ସଡ଼କ ନେଟୱାର୍କ ବିକଶିତ କରିବା ତଥା ସମ୍ବେଦନଶୀଳ କରିଡରକୁ ବାଦ୍ ଦେଇ ବିକଳ୍ପ ରାସ୍ତା ମାର୍ଗ ମଧ୍ୟ ଅନୁସନ୍ଧାନ କରିବା ଆବଶ୍ୟକ ବୋଲି ସେ କହିଛନ୍ତି। ଟିପ୍ରା ମୋଟା ପାର୍ଟି ମୁଖ୍ୟ ପ୍ରଦ୍ୟୋତ ମାଣିକ୍ୟ ଆହୁରି ଉଗ୍ର ପ୍ରତିକ୍ରିୟା ପ୍ରକାଶ କରି କହିଛନ୍ତି ଯେ ସମୁଦ୍ର ପ୍ରବେଶକୁ ସୁରକ୍ଷିତ କରିବା ପାଇଁ ଭାରତ ଅଧିକ ଆକ୍ରମଣାତ୍ମକ ଆଭିମୁଖ୍ୟ ଗ୍ରହଣ କରିବା ଉଚିତ। ଆମେ ବାଂଲାଦେଶ ସହ ସମ୍ପର୍କ ଭାଙ୍ଗି ପାରିବା ଏବଂ ସମୁଦ୍ର ଅଞ୍ଚଳକୁ ଦଖଲ କରିପାରିବା ବୋଲି ମାଣିକ୍ୟ କହିଛନ୍ତି। ଟୁଇଟ୍ କରି ସେ କହିଛନ୍ତି ଯେ ୧୯୪୭ ମସିହାରେ ଚଟ୍ଟଗ୍ରାମ ବନ୍ଦର ଉପରେ ନିୟନ୍ତ୍ରଣ ଛାଡ଼ିବାକୁ ଭାରତର ନିଷ୍ପତ୍ତି ଦେଶର ସବୁଠାରୁ ବଡ଼ ଭୁଲ୍ ଥିଲା। ଏକ ରଣନୈତିକ ସମୁଦ୍ର ମାର୍ଗ ପାଇଁ ସମର୍ଥନ କରି ସେ ଭାରତକୁ ଐତିହାସିକ ଭାବରେ ଚଟ୍ଟଗ୍ରାମରେ ଶାସନ କରୁଥିବା ଆଦିବାସୀ ଗୋଷ୍ଠୀଗୁଡ଼ିକୁ ସମର୍ଥନ କରି ବାଂଲାଦେଶ ଉପରେ ନିର୍ଭରଶୀଳତା ହ୍ରାସ କରିବାକୁ ଅନୁରୋଧ କରିଥିଲେ।

ଚଟ୍ଟଗ୍ରାମର ପାହାଡ଼ିଆ ଅଞ୍ଚଳରେ ସବୁବେଳେ ଆଦିବାସୀ ଜନଜାତି ବସବାସ କରୁଥିଲେ, ଯେଉଁମାନେ ୧୯୪୭ ମସିହାରୁ ସବୁବେଳେ ଭାରତର ଅଂଶ ହେବାକୁ ଚାହୁଥିଲେ। ବାଂଲାଦେଶରେ ଲକ୍ଷ ଲକ୍ଷ ତ୍ରିପୁରୀ, ଗାରୋ, ଖାସି ଓ ଚକମା ଲୋକ ସେମାନଙ୍କ ପାରମ୍ପରିକ ଭୂମିରେ ଭୟଙ୍କର ପରିସ୍ଥିତିରେ ରହୁଛନ୍ତି। ଏହାକୁ ଆମର ଜାତୀୟ ସ୍ୱାର୍ଥ ଓ ସେମାନଙ୍କ କଲ୍ୟାଣ ପାଇଁ ବ୍ୟବହାର କରାଯିବା ଉଚିତ ବୋଲି ସେ କହିଛନ୍ତି। କଂଗ୍ରେସ ନେତା ପୱନ ଖେରା ମଧ୍ୟ ୟୁନୁସଙ୍କ ମନ୍ତବ୍ୟକୁ ନିନ୍ଦା କରିବା ସହ ଏହି ଅଞ୍ଚଳରେ ଚୀନ୍‌ର ବଢୁଥିବା ପ୍ରଭାବ ଯୋଗୁଁ ସୃଷ୍ଟି ହେଉଥିବା ରଣନୈତିକ ବିପଦ ବିଷୟରେ ଚେତାବନୀ ଦେଇଛନ୍ତି। ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱାଧୀନ ସରକାର ଉତ୍ତର-ପୂର୍ବାଞ୍ଚଳକୁ ସୁରକ୍ଷା ଦେବାରେ ବିଫଳ ହୋଇଥିବା ସେ ଅଭିଯୋଗ କରିଛନ୍ତି।