ନିଜ ଝିଅ ସହ ସର୍ବସାଧାରଣରେ ଦେଖାଦେଇ ପରମାଣୁ ଆକ୍ରମଣ ଧମକ ଦେଲେ କିମ୍ ଜଙ୍ଗ୍
ସିଓଲ : ପୁଣି ଥରେ ପରମାଣୁ ଆକ୍ରମଣ ଧମକ ଦେଇଛନ୍ତି ଉତ୍ତର କୋରିଆର ଶାସନ କିମ ଜଙ୍ଗ ଉନ । ଜାପାନର ସ୍ୱତନ୍ତ୍ର ଅର୍ଥନୈତିକ ଜୋନ୍ (ଇଇଜେଡ୍ )ରେ ପଡ଼ିଥିବା ଏକ ଅନ୍ତଃମହାଦେଶୀୟ ବାଲିଷ୍ଟିକ୍ କ୍ଷେପଣାସ୍ତ୍ର ପରୀକ୍ଷଣ କରିବାର ଗୋଟିଏ ଦିନ ପରେ ଉତ୍ତର କୋରିଆ ନେତା କିମ୍ ଜଙ୍ଗ-ଉନ୍ ଏହି ଧମକ ଦେଇଛନ୍ତି । ଗୁରୁବାରଦିନ ସେ ପ୍ରଥମ ଥର ପାଇଁ ନିଜ ଝିଅ ସହ ସର୍ବସାଧାରଣରେ ଦେଖାଦେଇ ଏହି ଚେତାବନୀ ଶୁଣାଇଥିଲେ ।
Sambad is now on WhatsApp
Join and get latest news updates delivered to you via WhatsApp
ବିଗତ କିଛି ମାସ ହେଲା ତାଙ୍କ ସ୍ବାସ୍ଥ୍ୟକୁ ନେଇ ବିଭିନ୍ନ ପ୍ରକାରର କଳ୍ପନା ଜଳ୍ପନା ପ୍ରକାଶ ପାଉଥିବାବେଳେ ସର୍ବସାଧାରଣରେ ବାହାରି ସେ ଉକ୍ତ କଳ୍ପନା ଜଳ୍ପନାରେ ପୂର୍ଣ୍ଣଛେଦ ପକାଇଛନ୍ତି । ଉତ୍ତର କୋରିଆର ସରକାରୀ ନ୍ୟୁଜ ଏଜେନ୍ସି କହିଛି, “କିମ୍ ଜଙ୍ଗ-ଉନ୍ ଗୁରତ୍ବର ସହ ଘୋଷଣା କରିଛନ୍ତି ଯେ ଯଦି ଶତ୍ରୁମାନେ ଧମକ ଦେବା ଜାରି ରହନ୍ତି… ଆମ ଦଳ ଏବଂ ସରକାର ପରମାଣୁ ଅସ୍ତ୍ର ଶସ୍ତ୍ର ସହିତ ତାହାର ଚରମ ଜବାବ ଦେବେ” । ଗୁରୁବାର ଦିନ ତାଙ୍କ ଝିଅ ଏବଂ ପତ୍ନୀଙ୍କ ସହ କ୍ଷେପଣାସ୍ତ୍ର ଉତ୍ କ୍ଷେପଣରେ ଯୋଗ ଦେଇଥିଲେ ।
ଗୁରୁବାରଦିନ ଉତ୍ତରକୋରିଆ ପକ୍ଷରୁ ଅନ୍ତଃମହାଦେଶୀୟ ବାଲିଷ୍ଟିକ୍ କ୍ଷେପଣାସ୍ତ୍ର ପରୀକ୍ଷଣ କରାଯିବାର ଦିନକ ପରେ ଅର୍ଥାତ ଶୁକ୍ରବାରଦିନ ଜାପାନ ଓ ଆମେରିକା ଉତ୍ତରକୋରିଆ ଜଳସୀମା ନିକଟରେ ସାମରିକ ଅଭ୍ୟାସ କରିଥିଲେ । ଏହା ପରେ ହିଁ ଉତ୍ତରକୋରିଆ ପକ୍ଷରୁ ଏହି ଧମକ ଦିଆଯାଇଛି ।