ଚୀନ ଭାରତୀୟ ଅଞ୍ଚଳ ଅଧିକାର କରିଥିବା ଖବର ମିଛ : ପ୍ରତିରକ୍ଷା ମନ୍ତ୍ରାଳୟ
ଭାରତର ୪୩ ହଜାର ବର୍ଗ କିଲୋମିଟର ଅଞ୍ଚଳ ୧୯୬୨ରୁ ଚୀନ ମାଡ଼ିବସିଛି
ନୂଆଦିଲ୍ଲୀ : ଚୀନ ଭାରତୀୟ ଅଞ୍ଚଳ ଅଧିକାର କରିନେଇଥିବା କଥା କଂଗ୍ରେସ ନେତା ରାହୁଲ ଗାନ୍ଧି କହୁଥିବାରୁ ତାହାର କଡ଼ା ଜବାବ ରଖିଛନ୍ତି ସରକାର ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ଜାରି ଏକ ପ୍ରେସ ଇସ୍ତାହାରରେ କୁହାଯାଇଛି ଯେ ଚୀନ ସହ ହୋଇଥିବା ସୈନ୍ୟ ପ୍ରତ୍ୟାହାର ବୁଝାମଣା ପାଇଁ ଭାରତ ନିଜର କୌଣସି ଅଞ୍ଚଳ ହରାଇନାହିଁ । ଭାରତ ସରକାର ନିଜର ସେନା ଉପରେ ସଂପୂର୍ଣ୍ଣ ଭରସା ରଖିଥିବାରୁ ଭାରତର ଜାତୀୟ ସ୍ବାର୍ଥ ଓ ଅଖଣ୍ଡତାକୁ ସୁରକ୍ଷିତ ରଖାଯାଇପାରିଛି । ମନ୍ତ୍ରାଳୟ ପକ୍ଷରୁ ଆହୁରି ମଧ୍ୟ କୁହାଯାଇଛି ଯେ, ଫିଙ୍ଗର-୪ ପର୍ଯ୍ୟନ୍ତ ଭାରତୀୟ ଅଞ୍ଚଳ ବୋଲି କେତେକ ଲୋକ ଯେଉଁ ଭ୍ରାନ୍ତି ସୃଷ୍ଟି କରୁଛନ୍ତି ତାହା ଭୁଲ । ଭାରତର ପ୍ରକୃତ ଅଞ୍ଚଳ ଭାରତୀୟ ମାନଚିତ୍ରରେ ଦର୍ଶାଯାଇଛି ଓ ଏହାର ୪୩ ହଜାର କିଲୋକମିଟର ଅଞ୍ଚଳ ୧୯୬୨ ପରଠାରୁ ବେଆଇନ ଭାବେ ଚୀନ କବଜାରେ ଅଛି ।
ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ, ଭାରତ ଓ ଚୀନ ମଧ୍ୟରେ ହୋଇଥିବା ସୈନ୍ୟ ପ୍ରତ୍ୟାହାରକୁ ନେଇ କେତେକ ମିଥ୍ୟା ପ୍ରଚାର ସୋସିଆଲ ମିଡିଆ ଓ ଗଣମାଧ୍ୟମରେ କରାଯାଉଛି । କିନ୍ତୁ ପ୍ରକୃତ ସତ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ସଂସଦରେ କହିସାରିଛନ୍ତି ।
ଆଜି ଏକ ସାମ୍ବାଦିକ ସମ୍ମିଳନୀ କରି କଂଗ୍ରେସ ନେତା ରାହୁଲ ଗାନ୍ଧି କହିଥିଲେ ଯେ, ଭାରତ ସରକାର ଚୀନ ଆଗରେ ଭାରତର କେତେକ ଅଞ୍ଚଳକୁ ଟେକିଦେଇଛନ୍ତି ।