ନୂଆଦିଲ୍ଲୀ : ଦିଲ୍ଲୀ-ହରିୟାନା ସୀମା ସିଙ୍ଗୁଠାରେ ଗତକାଲି ଜଣେ ଯୁବକର ହାତ କାଟି ଅତ୍ୟନ୍ତ ନିର୍ମମଭାବେ ହତ୍ୟା କରିଥିବା ନିହଙ୍ଗ ଶିଖ ସରବଜିତ ସିଂ ନିଜର ଏହି କର୍ମ ପାଇଁ ଅନୁତପ୍ତ ନୁହେଁ ବୋଲି କହିଛି । ଗତକାଲି ଗିରଫ ହୋଇଥିବା ସରବଜିତକୁ ଆଜି ପୁଲିସ ପକ୍ଷରୁ କୋର୍ଟରେ ହାଜର କରାଯିବା ପରେ କୋର୍ଟ ତାକୁ ୭ ଦିନ ପାଇଁ ପୁଲିସ ରିମାଣ୍ଡକୁ ପଠାଇଦେଇଛନ୍ତି । ତେବେ ଘଟଣାର ଅଧିକ ତଦନ୍ତ ପାଇଁ ପୁଲିସ ପକ୍ଷରୁ ୧୪ ଦିନର ରିମାଣ୍ଡ ମାଗିଥିଲେ ମଧ୍ୟ କୋର୍ଟ ୭ ଦିନର ରିମାଣ୍ଡ ମଂଜୁର କରିଛନ୍ତି । ପୁଲିସ ପକ୍ଷରୁ କୁହାଯାଇଥିଲା ଯେ ଏହି ଘଟଣାରେ ଆଉ ୪ ଜଣ ସଂପୃକ୍ତ ଥିବା ସରବଜିତ କହିଛି । ଏହାଛଡ଼ା ହତ୍ୟାରେ ବ୍ୟବହୃତ ଅସ୍ତ୍ର ମଧ୍ୟ ଜବତ ହୋଇନାହିଁ ।
Sambad is now on WhatsApp
Join and get latest news updates delivered to you via WhatsApp
ଗତ କାଲି ପୁଲିସ ନିକଟରେ ଆତ୍ମସମର୍ପଣ କରିବା ପୂର୍ବରୁ ତାକୁ ସାମ୍ବାଦିକମାନେ ପ୍ରଶ୍ନ କରିବାରୁ ସେ କହିଥିଲା ଯେ ଏହି କାର୍ୟ୍ୟ ପାଇଁ ସେ ଅନୁତପ୍ତ ନୁହେଁ ।
ଗତକାଲି ସିଙ୍ଗୁ ସୀମାରେ ଥିବା କୃଷକ ଆନ୍ଦୋଳନସ୍ଥଳୀ ନିକଟରେ ଜଣେ ଯୁବକର ହାତକଟା ମୃତଦେହ ଝୁଲୁଥିବା ଦେଖାଯିବାପରେ ସାରା ଦେଶରେ ଚହଳ ପଡ଼ିଯାଇଥିଲା । ସେ ପଂଜାବର ତରନତାରନ ଜିଲ୍ଲାର ୩୫ ବର୍ଷୀୟ ଦଳିତ ଯୁବକ ଲଖବୀର ସିଂ ବୋଲି ଜଣାପଡ଼ିଛି ।