ମଧ୍ୟପ୍ରଦେଶ: ଭୋଟ ପାଇଁ ବଣ୍ଟା ହେଉଛି ନୋଟ୍, ଭିଡିଓ ହେଲା ଭାଇରାଲ୍
ଶିବପୁରୀ : ମଧ୍ୟପ୍ରଦେଶରେ ଲୋକସଭା ନିର୍ବାଚନ ପୂର୍ବରୁ ଟଙ୍କା ବଣ୍ଟନର ଫଟୋ ଓ ଭିଡିଓ ଭାଇରାଲ ହେବାରେ ଲାଗିଛି । ତେବେ ଏହି ଟଙ୍କା କ’ଣ ପାଇଁ ବଣ୍ଟନ କରାଯାଉଛି ସେ ନେଇ ସ୍ଥିତି ସ୍ପଷ୍ଟ ହୋଇନଥିଲେ ବି ସ୍ଥାନୀୟ ଲୋକଙ୍କ ମତରେ ଭୋଟରଙ୍କୁ ଆକୃଷ୍ଟ କରିବାକୁ ଟଙ୍କା ବଣ୍ଟନ କରାଯାଉଛି । ଭିଡିଓଟି ମଧ୍ୟପ୍ରଦେଶର ଶିବପୁରୀ ଜିଲ୍ଲାରେ ଜଣେ ବିଜେପି ନେତା ଅରବିନ୍ଦ ବେଦରଙ୍କର ବୋଲି ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ତାଙ୍କ ସହ ସିରସୋଦ ବିଜେପି ମଣ୍ଡଳ ସଭାପତି ହୁକୁମଚାନ୍ଦ ଲୋଧି ମଧ୍ୟ ଉପସ୍ଥିତ ଥିଲେ। କୁହାଯାଉଛି ଯେ ଉମା ଭାରତୀଙ୍କ ବୈଠକ ସିରସୋଦ ଗ୍ରାମରେ ଅନୁଷ୍ଠିତ ହୋଇଥିଲା। ଯାହା ପରେ ବିଜେପି ନେତା ଜନତାଙ୍କ ମଧ୍ୟରେ ୫୦୦ ଓ ୫୦୦ ଟଙ୍କିଆ ନୋଟ୍ ବାଣ୍ଟୁଛି । ଦଳ ସପକ୍ଷରେ ଭୋଟ୍ ଦେବା ପାଇଁ ଏହି ଟଙ୍କା ବଣ୍ଟନ କରାଯାଉଛି ବୋଲି ଲୋକେ କହୁଛନ୍ତି। ଅନ୍ୟପଟେ ବିଜେପି ନେତା ଅରବିନ୍ଦ ବେଦର କହିଛନ୍ତି ଯେ ବୈଠକ ପରେ ଟେଣ୍ଟ, ମାଇକ୍ ଏବଂ ଲାଇଟ୍ ବାଲାଙ୍କୁ ଏହି ଟଙ୍କା ଦିଆଯାଉଥିଲା ।
କେବଳ ବିଜେପି ନୁହେଁ, କଂଗ୍ରେସ ତରଫରୁ ମଧ୍ୟ ଟଙ୍କା ବାଣ୍ଟିବା ଅଭିଯୋଗ ହେଉଛି । ମଧ୍ୟପ୍ରଦେଶର ବିଦିଶା ଜିଲ୍ଲାରେ ସିରୋଞ୍ଜରେ ଏକ କଂଗ୍ରେସ ସଭା ପାଇଁ ଲୋକଙ୍କୁ ଟଙ୍କା ବାଣ୍ଟିବା ଅଭିଯୋଗ ହୋଇଛି । ସଭାକୁ ଲୋକଙ୍କୁ ଆକୃଷ୍ଟ କରିବାକୁ ଜଣେ ମହିଳା ଲୋକଙ୍କୁ ୫୦୦ ଟଙ୍କା ବାଣ୍ଟୁଥିବାର ଭିଡିଓ ଭାଇରାଲ ହୋଇଛି ।