ଆମେରିକୀୟ ପ୍ରତିପକ୍ଷଙ୍କ ସହ କଥା ହେଲେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଦୋଭାଲ: ଭାରତ ବିରୋଧରେ ପାକିସ୍ତାନର ଆମେରିକୀୟ ଯୁଦ୍ଧାସ୍ତ୍ର ପ୍ରୟୋଗ ନେଇ ଜଣାଇଲେ କ୍ଷୋଭ

ନୂଆଦିଲ୍ଲୀ: ଜମ୍ମୁ-କଶ୍ମୀରର ପୁଲଓ୍ଵାମାରେ ଭାରତୀୟ ସିଆରଫିଏଫ୍‌ ଯବାନଙ୍କ ଉପରେ ଆତଙ୍କବାଦୀ ଆକ୍ରମଣ ଓ ବାଲକୋଟରେ ପାକିସ୍ତାନ ଆତଙ୍କବାଦୀ ସଂଗଠନର ଜୈସ୍‌-ଇ-ମହମ୍ମଦ  ଶିବିର ଉପରେ ଭାରତୀୟ ବାୟୁସେନାର ବୋମାମାଡ ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଛି। ଏହି ସମୟରେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଦୋଭାଲ ଦେଶର ସାମରିକ ଓ ପ୍ରତିରକ୍ଷା ସ୍ଥିତିକୁ ନେଇ ଆମେରିକାର ସୁରକ୍ଷା ପରାମର୍ଶଦାତା ଜନ ବୋଲଟନ୍‌ ସହିତ ଆଲୋଚନା କରିଛନ୍ତି।

ଏଏନ୍‌ଆଇର ପ୍ରକାଶିତ ଖବର ମୁତାବକ, ଭାରତ ଉପରେ ଆକ୍ରମଣ କରିବା ପାଇଁ ପାକିସ୍ତାନ ଆମେରିକୀୟ ନିର୍ମିତ ଏଫ୍‌-୧୬ ବିମାନ ସହ ଆମେରିକା ନିର୍ମିତ ଆମ୍ରନ (ଏଆଇଏମ୍‌-୨୧୦) ମିସାଇଲର ବ୍ୟବହାର କରିଥିଲା।  ପାକିସ୍ତାନ ଏସବୁ ବ୍ୟବହାର କରି  ଭାରତର ସାମରିକ ଓ ପ୍ରତିରକ୍ଷା ଅନୁଷ୍ଠାନକୁ ଧ୍ୱଂସ କରିବା ଲାଗି ଉଦ୍ୟମ କରିିଥିଲା ବୋଲି  ଆମେରିକାକୁ ପ୍ରମାଣ ଦେଇଛି ଭାରତ।