ବିଶ୍ବକୁ ଏନ୍‌ଏସ୍‌ଏ ଅଜିତ ଡୋଭଲଙ୍କ ବାର୍ତ୍ତା: ପାକ୍‌ ଅତି ହେଲେ ଜବାବ ପାଇବ

ନୂଆଦିଲ୍ଲୀ: ଭାରତୀୟ ସେନା ପାକିସ୍ତାନ ଓ ପାକ୍-ଅଧିକୃତ କାଶ୍ମୀରରେ ଥିବା ଆତଙ୍କବାଦୀ ସ୍ଥଳଗୁଡ଼ିକ ଉପରେ ନିର୍ଦ୍ଦିଷ୍ଟ ଲକ୍ଷ୍ୟଭିତ୍ତିକ ଏୟାର୍ ଷ୍ଟ୍ରାଇକ୍ କରିବାର କିଛି ଘଣ୍ଟା ପରେ ଜାତୀୟ ସୁରକ୍ଷା ପରାମର୍ଶଦାତା (ଏନ୍‌ଏସ୍‌ଏ) ଅଜିତ ଡୋଭଲ ବୁଧବାର ବିଭିନ୍ନ ଦେଶର ପ୍ରତିପକ୍ଷଙ୍କୁ ଅବଗତ କରିଛନ୍ତି। ସେ କହିଛନ୍ତି ଯେ ଉତ୍ତେଜନା ବଢ଼ାଇବା ପାଇଁ ନୂଆଦିଲ୍ଲୀର କୌଣସି ଉଦ୍ଦେଶ୍ୟ ନାହିଁ, କିନ୍ତୁ ଯଦି ଇସଲାମାବାଦ ଏପରି କରେ ତେବେ ଏହାର ଦୃଢ଼ ଜବାବ ଦେବାକୁ ପ୍ରସ୍ତୁତ ଅଛି।
ଅଜିତ ଡୋଭାଲ ଆମେରିକା, ବ୍ରିଟେନ, ସାଉଦି ଆରବ ଓ ଜାପାନରେ ଥିବା ତାଙ୍କ ପ୍ରତିପକ୍ଷଙ୍କୁ ପାକିସ୍ତାନ ଓ ପାକ୍-ଅଧିକୃତ ଜମ୍ମୁ-କାଶ୍ମୀରରେ ଆତଙ୍କବାଦୀ ଭିତ୍ତିଭୂମି ଉପରେ ଭାରତର କ୍ଷେପଣାସ୍ତ୍ର ଆକ୍ରମଣ ବିଷୟରେ ଅବଗତ କରାଇଥିଲେ। ସେ ରୁଷିଆ ଓ ଫ୍ରାନ୍ସ ସହ ମଧ୍ୟ ଯୋଗାଯୋଗ ସ୍ଥାପନ କରିଥିଲେ। ଏନ୍‌ଏସ୍‌ଏ ତାଙ୍କ ପ୍ରତିପକ୍ଷଙ୍କୁ ନିଆଯାଇଥିବା ପଦକ୍ଷେପ ବିଷୟରେ ସୂଚିତ କରାଇଥିଲେ। ସେ କହିଛନ୍ତି ଯେ ଭାରତ ଏବେ ସାମରିକ କାର୍ଯ୍ୟାନୁଷ୍ଠାନରେ ଆଗକୁ ବଢ଼ିବାର କୌଣସି ଉଦ୍ଦେଶ୍ୟ ନାହିଁ କିନ୍ତୁ ଯଦି ପାକିସ୍ତାନ ଉତ୍ତେଜନା ସୃଷ୍ଟି କରେ ତେବେ ଦୃଢ଼ ଜବାବ ଦେବାକୁ ଭାରତ ପ୍ରସ୍ତୁତ ଅଛି। 

ଡୋଭାଲ ଆମେରିକାର ଏନ୍‌ଏସ୍‌ଏ ତଥା ବୈଦେଶିକ ସଚିବ ମାର୍କୋ ରୁବିଓ, ବ୍ରିଟେନର ଜୋନାଥନ ପାୱେଲ, ସାଉଦି ଆରବର ମୁସାଇଦ ଅଲ ଆଇବାନ୍‌, ୟୁଏଇର ଏଚ୍ଏଚ୍ ଶେଖ୍ ତହନୁନ୍ ଓ ଜାପାନର ମାସାତାକା ଓକାନୋଙ୍କ ସହ କଥା ହୋଇଛନ୍ତି। ସିପିସି କେନ୍ଦ୍ରୀୟ କମିଟିର ରାଜନୈତିକ ବ୍ୟୁରୋର ସଦସ୍ୟ ତଥା ଚୀନ୍‌ର ବୈଦେଶିକ ବ୍ୟାପାର ମନ୍ତ୍ରୀ ୱାଙ୍ଗ ୟି ଏବଂ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ବୋନଙ୍କ କୂଟନୈତିକ ପରାମର୍ଶଦାତା ରୁଷିଆର ଏନ୍‌ଏସ୍‌ଏ ସେର୍ଗେଇ ଶୋଇଗୁଙ୍କ ସହ ମଧ୍ୟ ଯୋଗାଯୋଗ ସ୍ଥାପନ କରାଯାଇଛି।

ଆଗାମୀ ଦିନରେ ଡୋଭାଲ ତାଙ୍କ ପ୍ରତିପକ୍ଷଙ୍କ ସହ ଅଧିକ ଯୋଗାଯୋଗରେ ରହିବେ। ତେଣେ ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର କତରର ପ୍ରଧାନମନ୍ତ୍ରୀ ତଥା ବୈଦେଶିକ ମନ୍ତ୍ରୀ ଶେଖ୍ ମହମ୍ମଦ ବିନ୍ ଅବଦୁଲ ରହମାନ ଅଲ୍ ଥାନିଙ୍କ ସହ କଥା ହୋଇଛନ୍ତି ଏବଂ ସୀମାପାର ଆତଙ୍କବାଦକୁ ରୋକିବା ପାଇଁ ଭାରତର ଲକ୍ଷ୍ୟଭିତ୍ତିକ ଜବାବ ଉପରେ ଆଲୋଚନା କରିଛନ୍ତି। ଆମେରିକାର ବିଦେଶ ସଚିବ ମାର୍କୋ ରୁବିଓ ଆଜି ଅପରାହ୍ଣରେ ଭାରତ ଓ ପାକିସ୍ତାନର ଏନ୍‌ଏସ୍‌ଏଙ୍କ ସହ କଥା ହୋଇ ଯୋଗାଯୋଗ ଲାଇନ ଖୋଲା ରଖିବା ଏବଂ ଉତ୍ତେଜନାକୁ ଏଡ଼ାଇବାକୁ ଅନୁରୋଧ କରିଛନ୍ତି।