ଲକଡାଉନ ଦେଲା ନୂଆ ଆଶା, କମିଲା ଅପରିପକ୍ଵ ଶିଶୁଙ୍କ ସଂଖ୍ୟା
ନ୍ୟୁୟର୍କ: କରୋନା ଭୁତାଣୁ ଯୋଗୁଁ ସମଗ୍ର ବିଶ୍ୱ ଏବେ ଚିନ୍ତିତ ଥିବାବେଳେ ସଂକ୍ରମଣ ରୋକିବାକୁ ଲଗାଯାଇଥିବା ଲକଡାଉନ ଯୋଗୁଁ ବିଶ୍ୱ କିଛି ଲାଭ ପାଇଛି। ଗବେଷଣାରୁ ମିଳିଥିବା ତଥ୍ୟ ମୁତାବକ ଅନେକ ଦେଶରେ ଅପରିପକ୍ଵ ଶିଶୁମାନଙ୍କର ଜନ୍ମ (ପ୍ରିମ୍ୟାଚ୍ୟୁର) ହାର ତୀବ୍ର ହ୍ରାସ ପାଇଛି। ଏହି ପରିବର୍ତ୍ତନକୁ ନେଇ ସାରା ବିଶ୍ୱରେ ଡାକ୍ତରମାନେ ବହୁତ ଖୁସି ଅଛନ୍ତି। ଏଥି ସହିତ, ଏହି ଢାଞ୍ଚା ଉପରେ ଗବେଷଣା ପାଇଁ ପ୍ରସ୍ତୁତି ଆରମ୍ଭ ହୋଇଛି। ନ୍ୟୁୟର୍କ ଟାଇମ୍ସରେ ପ୍ରକାଶିତ ଖବର ଅନୁଯାୟୀ, ଆୟର୍ଲାଣ୍ଡ, ଡେନମାର୍କ, ନେଦରଲ୍ୟାଣ୍ଡ, ଆମେରିକା, ଅଷ୍ଟ୍ରେଲିଆ ଭଳି ଅନେକ ଦେଶର ଡାକ୍ତରଖାନାରେ ନବଜାତକ ଇଣ୍ଟେନ୍ସିଭ୍ କେୟାର ୟୁନିଟରେ ଅପରିପକ୍ଵ ଶିଶୁ ଜନ୍ମ ହେବାର ତୀବ୍ର ହ୍ରାସ ଘଟିଛି। ସେହିପରି ଅପରିପକ୍ଵ ଶିଶୁଙ୍କ ଜନ୍ମ ସହ ଜଡିତ ସମସ୍ୟାଗୁଡିକ ମଧ୍ୟ ହ୍ରାସ ପାଇଛି |
Sambad is now on WhatsApp
Join and get latest news updates delivered to you via WhatsApp
ବଡ କଥା ଯେ ଡାକ୍ତରମାନେ ଏପର୍ଯ୍ୟନ୍ତ ବୁଝିପାରିନାହାଁନ୍ତି ଯେ ଏଭଳି କାହିଁକି ଘଟିଛି | ଏହା ଉପରେ ଗବେଷଣା କରିବାକୁ ପ୍ରସ୍ତୁତି ଚାଲିଛି | କିନ୍ତୁ ଡାକ୍ତରମାନେ ବିଶ୍ୱାସ କରୁଛନ୍ତି ଯେ ଗର୍ଭବତୀ ମହିଳାମାନେ ଲକଡାଉନରେ ଭଲ ଭାବେ ବିଶ୍ରାମ ନେଉଛନ୍ତି। ସେହିପରି ବାୟୁମଣ୍ଡଳରେ ପ୍ରଦୂଷଣ ସ୍ତର ମଧ୍ୟ କମ୍ ଥିବା ସହ ବାହାର ଖାଦ୍ୟ ଖାଇବା ବହୁତ କମିଯାଇଛି | ଯାହାଫଳରେ ଅପରିପକ୍ଵ ଜନ୍ମ ହ୍ରାସ ପାଇଛି।
ଆଟଲାଣ୍ଟାର ଇମୋରୀ ୟୁନିଭରସିଟି ସ୍କୁଲ୍ ଅଫ୍ ମେଡ଼ିସିନର ଡାକ୍ତର ଡେନିସ୍ ଜାମିସନ୍ କହିଛନ୍ତି ଯେ ଏହା ଏକ ଚମତ୍କାର ଘଟଣା। ଯୁକ୍ତରାଷ୍ଟ୍ର ଆମେରିକାରେ, ପ୍ରତି ଦଶଟି ପ୍ରସବରେ ଗୋଟିଏ ଅପରିପକ୍ଵ ଶିଶୁ ଜନ୍ମ ହୁଏ | ସାଧାରଣତଃ ଗର୍ଭଧାରଣ ପ୍ରାୟ ୪୦ ସପ୍ତାହର ହୋଇଥାଏ | କିନ୍ତୁ ଯଦି ୩୭ ସପ୍ତାହ ପୂର୍ବରୁ ଡେଲିଭରି କରାଯାଇଥାଏ, ତେବେ ଏହାକୁ ଅପରିପକ୍ଵ ବା ପ୍ରିମ୍ୟାଚ୍ୟୁର କୁହାଯାଏ |