କେନ୍ଦ୍ର ସରକାରଙ୍କ ରିପୋର୍ଟ: ଓଡ଼ିଶାରେ ୨୦୨୦ରେ କମିଛି ସଡ଼କ ଦୁର୍ଘଟଣା
୨୦୨୦ରେ ସଡ଼କ ଦୁର୍ଘଟଣାରେ ୪୩୭୮ ଜଣ ଓ ୨୦୧୯ରେ ୫୩୩୩ ଜଣଙ୍କ ମୃତ୍ୟୁ
ନୂଆଦିଲ୍ଲୀ : ଓଡ଼ିଶାରେ ୨୦୨୦ରେ ସମୁଦାୟ ୯୮୧୭ ସଡ଼କ ଦୁର୍ଘଟଣା ଘଟିଥିଲା। ଏଥିରେ ୪୩୭୮ଜଣଙ୍କ ମୃତ୍ୟୁ ଘଟିଥିବା ବେଳେ ୮୮୨୨ ଆହତ ହୋଇଥିଲେ। ଏହାର ପୂର୍ବ ବର୍ଷ ୨୦୧୯ରେ ରାଜ୍ୟରେ ୧୧ ହଜାର ୬୪ ଟି ସଡ଼କ ଦୁର୍ଘଟଣାରେ ୫ ହଜାର ୩୩୩ ଜଣଙ୍କ ମୃତ୍ୟୁ ହୋଇଥିଲା। ୨୦୧୯ ତୁଳନାରେ ୨୦୨୦ରେ ଓଡ଼ିଶାରେ ଉଭୟ ସଡ଼କ ଦୁର୍ଘଟଣା ଓ ତଦ୍ଜନିତ ମୃତ୍ୟୁ ସଂଖ୍ୟା କମିଛି। କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରାଳୟ ଅଧୀନ ପରିବହନ ଗବେଷଣା ଶାଖା ପକ୍ଷରୁ ପ୍ରକାଶିତ ‘ରୋଡ ଆକ୍ସିଡେଣ୍ଟ ଇନ୍ ଇଣ୍ଡିଆ-୨୦୨୦’ ରିପୋର୍ଟରେ ଏହା ଉଲ୍ଲେଖ କରାଯାଇଛି। ରିପୋର୍ଟକୁ ଗତକାଲି ମନ୍ତ୍ରାଳୟ ପକ୍ଷରୁ ପ୍ରକାଶ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ରିପୋର୍ଟ ବିଶ୍ଳେଷଣରୁ ଜଣାପଡ଼ିଛି ଯେ ୨୦୨୦ରେ ଓଡ଼ିଶାରେ ଦିନକୁ ୨୭ଟି ଦୁର୍ଘଟଣା ଘଟିଥିଲା। ଏହା ଫଳରେ ପ୍ରତିଦିନ ୧୨ ଜଣ ଲୋକଙ୍କ ମୃତ୍ୟୁ ହୋଇଥିଲା। ଦୁର୍ଘଟଣା ଓ ମୃତ୍ୟୁ ସଂଖ୍ୟାରେ ଓଡ଼ିଶା ଦେଶର ଦ୍ବାଦଶ ସ୍ଥାନରେ ଥିଲା। ରାଜ୍ୟରେ ଉକ୍ତ ବର୍ଷ ଜାତୀୟ ରାଜପଥମାନଙ୍କରେ ୩୬୭୩ ସଡ଼କ ଦୁର୍ଘଟଣାରେ ୧୭୮୧ ଜଣଙ୍କ ମୃତ୍ୟୁ ହୋଇଥିବା ବେଳେ ରାଜ୍ୟ ରାଜପଥମାନଙ୍କରେ ୨୩୬୫ ଦୁର୍ଘଟଣାରୁ ୧୧୭୯ ଜଣ ପ୍ରାଣ ହରାଇଥିଲେ। ସହରାଞ୍ଚଳରେ ମୋଟ ୩୦୨୪ଟି ଦୁର୍ଘଟଣା ଘଟି ୧୨୨୯ ଜଣଙ୍କ ମୃତ୍ୟୁ ହୋଇଥିଲା ଓ ଗ୍ରାମାଞ୍ଚଳରେ ୬୭୯୩ ଦୁର୍ଘଟଣାରେ ୩୫୦୯ ଜଣଙ୍କ ମୃତ୍ୟୁ ହୋଇଥିଲା। ଉକ୍ତ ବର୍ଷ ଗମ୍ଭୀର ସଡ଼କ ଦୁର୍ଘଟଣା ସଂଖ୍ୟା ଜାତୀୟ ସ୍ତରରେ ୩୬ ପ୍ରତିଶତ ରହିଥିବାବେଳେ ଓଡ଼ିଶାରେ ଏହି ହାର ଥିଲା ୪୮.୩ ପ୍ରତିଶତ। ଦେଶରେ ସମୁଦାୟ ସଡ଼କ ଦୁର୍ଘଟଣାର ସଂଖ୍ୟାରେ ଓଡ଼ିଶାର ଅଂଶ ୨.୭ ପ୍ରତିଶତ ରହିଛି।
ଦୁର୍ଘଟଣାର କାରଣ ସଂପର୍କରେ ମଧ୍ୟ ରିପୋର୍ଟରେ ଉଲ୍ଲେଖ କରାଯାଇଛି। ୨୦୨୦ରେ ଓଡ଼ିଶାରେ ଦ୍ରୁତ ଗତି ଯୋଗୁ ୭୦୬୪ ଦୁର୍ଘଟଣା ଘଟି ୩୮୪୩ ଜଣ ପ୍ରାଣ ହରାଇଥିଲେ। ମଦ୍ୟପାନ କରି ଗାଡ଼ି ଚଳାଇବା ଯୋଗୁ ୬୪୮ ଦୁର୍ଘଟଣା ଘଟିଥିଲା, ଯେଉଁଥିରେ କି ୨୯୮ ଜଣଙ୍କ ମୃତ୍ୟୁ ହୋଇଥିଲା। ଭୁଲ ପାର୍ଶ୍ବରେ ଡ୍ରାଇଭିଂ ଯୋଗୁ ୭୪୯ ସଡ଼କ ଦୁର୍ଘଟଣା ଘଟିଥିଲା। ଏହା ସହ ଡ୍ରାଇଭିଂ ସମୟରେ ମୋବାଇଲ ଫୋନ ବ୍ୟବହାର ଯୋଗୁ ୨୯୭ ଦୁର୍ଘଟଣା ହୋଇଛି। ରେଡ ଲାଇଟ ନମାନିବା କାରଣରୁ ୨୯୯ ଟି ଦୁର୍ଘଟଣା ମଧ୍ୟ ହୋଇଥିଲା।
୨୦୨୦ରେ ୧୭୩୭ ହିଟ୍ ଆଣ୍ଡ ରନ୍ ଘଟଣାରେ ୯୦୭ ଜଣ ପ୍ରାଣ ହରାଇଥିଲେ। ପଛରୁ ଧକ୍କା ଦେବା ଫଳରେ ୧୬୯୪ ଘଟଣାରେ ୮୦୩ ଜଣଙ୍କର ମୃତ୍ୟୁ ହୋଇଥିଲା। ୧୦୦୩ ଟି ଦୁର୍ଘଟଣା ଅନ୍ୟାନ୍ୟ କାରଣ ଯୋଗୁ ହୋଇଥିଲା ଓ ଏଥିରେ ୫୨୬ ଜଣଙ୍କ ମୃତ୍ୟୁ ହୋଇଥିଲା। ହେଲମେଟ୍ ପିନ୍ଧିନଥିବାରୁ ୭୬୭ ଜଣ ଗାଡ଼ିଚାଳକ ଓ ୫୦୩ ଜଣ ଯାତ୍ରୀଙ୍କ ମୃତ୍ୟୁ ହୋଇଛି। ୯୮୧୭ ସଡ଼କ ଦୁର୍ଘଟଣାରେ ୧୧୦୨ ଡ୍ରାଇଭରଙ୍କ ପାଖରେ ଲାଇସେନ୍ସ ନଥିବା କୁହାଯାଇଛି। ୨୦୨୦ରେ ଦେଶରେ ସମୁଦାୟ ୩,୬୬,୧୩୮ ସଡକ ଦୁର୍ଘଟଣାରେ ୧,୩୧,୭୧୪ ଜଣଙ୍କ ମୃତ୍ୟୁ ୩,୪୮,୨୭୯ ଜଣ ଆହତ ହୋଇଥିବା ରିପୋର୍ଟରେ କୁହାଯାଇଛି।