ଯୌତୁକ ନିର୍ଯାତନା ମାମଲାରେ ସୁପ୍ରିମକୋର୍ଟଙ୍କ ଐତିହାସିକ ରାୟ ! ଏବେ ଯେ କୌଣସି ସ୍ଥାନରୁ ପୀଡିତାଙ୍କ ସମେତ ସଂପର୍କୀୟ ମଧ୍ୟ କରିପାରିବେ ଅଭିଯୋଗ
ନୂଆଦିଲ୍ଲୀ : ଯୌତୁକ ଉତ୍ପୀଡନ ଆଇନକୁ ନେଇ ସୁପ୍ରିମକୋର୍ଟ ଏକ ଐତିହାସିକ ନିଷ୍ପତ୍ତି ନେଇଛନ୍ତି । ଏବେ ପୀଡିତା ମହିଳାଙ୍କ କୌଣସି ସଂପର୍କୀୟ ତାଙ୍କ ଶାଶୂଘର ଲୋକ ଏବଂ ସ୍ୱାମୀଙ୍କ ବିରୋଧରେ ଯୌତୁକ ଉତ୍ପୀଡନର ମାମଲା ରୁଜୁ କରି ପାରିବେ। ସୁପ୍ରିମକୋର୍ଟରେ ଏହି ନିଷ୍ପତ୍ତି ଜଷ୍ଟିସ୍ ଅଶୋକ ଭୂଷଣ ଏବଂ ଜଷ୍ଟିସ୍ କେ.ଏମ୍. ଜୋସେଫ୍ ଶୁଣାଇଛନ୍ତି । କୋର୍ଟ ପକ୍ଷରୁ କୁହାଯାଇଛି, ଆଇପିସି ଧାରା ୪୯୮ ଏରେ କେଉଁଠାରେ ବି କୁହାଯାଇନାହିଁ ଯେ ଅଭିଯୋଗ କେବଳ ପୀଡିତା ହିଁ କରିିବେ । ପୀଡିତାଙ୍କ ବ୍ୟତୀତ ତାଙ୍କ ସଂପର୍କୀୟ ମଧ୍ୟ ଅଭିଯୋଗ କରିପାରିବେ । ଯେତେବେଳେ କୌଣସି ମହିଳାଙ୍କ ଶାଶୁଘରଲୋକ କିମ୍ବା ସ୍ୱାମୀ ତାଙ୍କୁ ଯୌତୁକ ପାଇଁ ହଇରାଣ କରନ୍ତି ସେତେବେଳେ ଅଭିଯୋଗ ଧାରା ୪୯୮-ଏ ଅନୁସାରେ କରାଯାଏ। ସୁପ୍ରିମକୋର୍ଟଙ୍କ ମୁତାବକ ଏଭଳି ମାମଲାରେ ବହୁ କ୍ଷେତ୍ରରେ ପୀଡିତା ମହିଳାଙ୍କୁ ଅଭିଯୋଗ କରିବା ପାଇଁ ଅନେକ ଅସୁବିଧାର ସାମ୍ନା କରିବାକୁ ପଡିଥାଏ ।
Sambad is now on WhatsApp
Join and get latest news updates delivered to you via WhatsApp
ଏବେ ଯୌତୁକ କିମ୍ବା ଅନ୍ୟ କୌଣସି ନିର୍ଯାତନା ବିରୁଦ୍ଧରେ ଜଣେ ମହିଳା ଦେଶର କୌଣସି ବି ସ୍ଥାନରେ ଅଭିଯୋଗ କରିପାରିବେ । ସିଆରପିସିର ଧାରା ୧୭୭ ମୁତାବକ କୌଣସି ଅପରାଧିକ ମାମଲା ଉକ୍ତ ସ୍ଥାନରେ ହିଁ ଅଭିଯୋଗ କରାଯାଇପାରିବ ଯେଉଁଠାରେ ସେହି ଘଟଣା ଘଟିଥିବ । ଅର୍ଥାତ କୌଣସି ମହିଳା ଯଦି ତାଙ୍କ ଶାଶୁଘରେ ଅତ୍ୟାଚାରର ଶିକାର ହୋଇଥାନ୍ତି ତେବେ ସେ ଶାଶୁଘର ଅଞ୍ଚଳ କିମ୍ବା ଏହାର ନିକଟସ୍ଥ ଥାନାରେ ହିଁ ଅଭିଯୋଗ କରିପାରିବେ । କିନ୍ତୁ ଏଥିରେ ବହୁତ ଅସୁବିଧା ସୃଷ୍ଟି ହୋଇଥାଏ । ପୀଡିତାଙ୍କୁ ଯଦି ନିଜ ଶାଶୁଘରୁ ବାହାର କରାଯାଇଥାଏ କିମ୍ବା ଏଭଳି ପରିସ୍ଥିତି କରାଯାଏ ଯାହାଦ୍ୱାରା ପୀଡିତାଙ୍କୁ ଘର ଛାଡି ଯିବାକୁ ପଡ଼ିଥାଏ ତେବେ ଥାନାରେ ଅଭିଯୋଗ କରିବା ପୀଡିତାଙ୍କ ପାଇଁ କଷ୍ଟକର ହୋଇପଡ଼େ । ଏଭଳି ସ୍ଥିତିରେ ସୁପ୍ରିମକୋର୍ଟଙ୍କ ଏଭଳି ନିୟମ ପ୍ରଶଂସାଯୋଗ୍ୟ ।