ଯୋଗୀଙ୍କ ଶପଥ ଗ୍ରହଣ ପଡିଆରେ ହେବ ୯ଟି ହେଲିପ୍ୟାଡ଼ ସହ ୨୧ ହଜାର ଗାଡି ପାଇଁ ପାର୍କିଙ୍ଗ ବ୍ୟବସ୍ଥା
ନୂଆଦିଲ୍ଲୀ: ଆଉ ମାତ୍ର ତିନି ଦିନ ପରେ ଉତ୍ତରପ୍ରଦେଶରେ ମୁଖ୍ୟମନ୍ତ୍ରୀ ଭାବରେ ଯୋଗୀ ଆଦିତ୍ୟନାଥ ଶପଥ ନେବେ | ଆଉ ଯୋଗୀ ସରକାରଙ୍କ ଶପଥ ଗ୍ରହଣ ସମାରୋହକୁ ସ୍ମରଣୀୟ ରଖିବା ପାଇଁ ଜୋରଦାର ପ୍ରସ୍ତୁତି ଚାଲିଛି | ଏହି ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଉପସ୍ଥିତ ରହିବେ। ଉତ୍ତରପ୍ରଦେଶର ଇକାନା ଷ୍ଟାଡିୟମକୁ ନବବଧୂ ଭଳି ସଜା ଯାଉଥିବାବେଳେ ପାଖାପାଖି ୯ଟି ହେଲିପ୍ୟାଡ଼ ସହ ୨୧ ହଜାର ଗାଡି ପାଇଁ ପାର୍କିଙ୍ଗ ବ୍ୟବସ୍ଥା କରାଯାଉଛି | ଶପଥ ଗ୍ରହଣ ମଞ୍ଚ ପାଖରେ ୩ଟି ହେଲିପ୍ୟାଡ଼ ନିର୍ମାଣ ଜୋରସୋରରେ ଚାଲିଥିବାବେଳେ ଲଖନଉର ଅଟଳ ବିହାରୀ ବାଜପେୟୀ ଇକାନା ଷ୍ଟାଡିୟମର କ୍ଷମତା ପ୍ରାୟ ୫୦ ହଜାର ଲୋକ ହୋଇଥିବାବେଳେ ୭୦ ହଜାର ଲୋକଙ୍କ ବସିବାର ବ୍ୟବସ୍ଥା କରାଯାଇଛି |
Sambad is now on WhatsApp
Join and get latest news updates delivered to you via WhatsApp
ଏହି ସମାରୋହରେ ପ୍ରଧାନମନ୍ତ୍ରୀ ମୋଦୀ, ଗୃହମନ୍ତ୍ରୀ ଅମିତ ଶାହା, ବିଜେପି ସଭାପତି ଜେପି ନଡ୍ଡା, ଅନେକ ରାଜ୍ୟର ମୁଖ୍ୟମନ୍ତ୍ରୀ ସାମିଲ ହେବେ। ତେଣୁ ଇକାନା ଷ୍ଟାଡିୟମ ଏବଂ ଏହାର ଆଖପାଖରେ ୯ ଟି ହେଲିପ୍ୟାଡ୍ ନିର୍ମାଣ କରାଯାଉଛି। ଏଥିମଧ୍ୟରୁ ଇକାନା ଷ୍ଟାଡିୟମ ପାଖରେ ପ୍ରଧାନମନ୍ତ୍ରୀଙ୍କ ପାଇଁ ୩ଟି ହେଲିପ୍ୟାଡ୍ ପ୍ରସ୍ତୁତ କରାଯାଉଛି | ମୁଖ୍ୟମନ୍ତ୍ରୀ ଏବଂ ଅନ୍ୟ ଭିଭିଆଇପିଙ୍କ ପାଇଁ ପ୍ରାୟ ୬ଟି ହେଲିପ୍ୟାଡ୍ ନିର୍ମାଣ କରାଯାଉଛି |
ଷ୍ଟାଡିୟମ ବାହାରେ ୨୧ ହଜାର ଗାଡି ପାଇଁ କାର ପାର୍କିଂର ବ୍ୟବସ୍ଥା କରାଯାଇଛି | ଇକାନା ଷ୍ଟାଡିୟମକୁ ଯାଉଥିବା ରାସ୍ତା ପାର୍ଶ୍ୱରେ ପ୍ରାୟ ଦଶ ହଜାର ଫୁଲକୁଣ୍ଡ ରଖାଯାଇଛି | ଗୋଟିଏ ପଟେ ଇକାନା ଷ୍ଟାଡିୟମରେ ଶପଥ ଗ୍ରହଣ ସମାରୋହ ପାଇଁ ଜୋରଦାର ପ୍ରସ୍ତୁତି ଚାଲିଛି। ଅନ୍ୟପଟରେ ନୂତନ କ୍ୟାବିନେଟରେ କେଉଁମାନଙ୍କୁ ସାମିଲ କରାଯିବ ସେ ନେଇ ଆଲୋଚନା ଜାରି ରହିଛି | ୨୦୨୪ ଲୋକସଭା ନିର୍ବାଚନକୁ ନଜରରେ ରଖି ମନ୍ତ୍ରିମଣ୍ଡଳ ଗଠନ କରାଯିବ ବୋଲି ଚର୍ଚ୍ଚା ହେଉଛି |