‘ସମ୍ବିଧାନ ପ୍ରତି ଆନୁଗତ୍ୟ ରଖନ୍ତୁ ବିଚାରପତି, ଓକିଲ’

ନୂଆଦିଲ୍ଲୀ: ପ୍ରତ୍ୟେକ ଭାରତୀୟଙ୍କର ଏକ ରାଜନୈତିକ ବିଚାରଧାରା ରହିବାର ସମ୍ଭାବନା ଥିବାବେଳେ ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ ଆଜି କହିଛନ୍ତି ଯେ ଆଇନଜୀବୀ ଓ ବିଚାରପତିଙ୍କ ଆନୁଗତ୍ୟ ସମ୍ବିଧାନ ପ୍ରତି ରହିବା ଉଚିତ। ଲୋକସଭା ନିର୍ବାଚନ ଆରମ୍ଭ ହେବାର ମାତ୍ର କିଛିଦିନ ପୂର୍ବରୁ ପ୍ରଧାନ ବିଚାରପତି ଏହି ମନ୍ତବ୍ୟ ଦେଇ ବିଚାରପତିମାନେ ନିରପେକ୍ଷ ହେବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।

ଭାରତ ଭଳି ଏକ ପ୍ରାଣବନ୍ତ ଗଣତନ୍ତ୍ରରେ ଅଧିକାଂଶ ବ୍ୟକ୍ତିଙ୍କର ନିର୍ଦ୍ଦିଷ୍ଟ ରାଜନୈତିକ ଆଦର୍ଶ ବା ଆଗ୍ରହ ରହିଛି। ଆରିଷ୍ଟଟଲ କହିଛନ୍ତି ଯେ ମଣିଷ ଏକ ରାଜନୈତିକ ପ୍ରାଣୀ ଏବଂ ଓକିଲମାନେ ମଧ୍ୟ ଏହାର ବ୍ୟତିକ୍ରମ ନୁହନ୍ତି। ତେବେ ବାର୍‌ର ସଦସ୍ୟମାନଙ୍କ ପାଇଁ ବ୍ୟକ୍ତିର ସର୍ବୋଚ୍ଚ ଆନୁଗତ୍ୟ ଦଳୀୟ ସ୍ୱାର୍ଥ ବଦଳରେ ଅଦାଲତ ଓ ସମ୍ବିଧାନ ପ୍ରତି ରହିବା ଉଚିତ ବୋଲି ନାଗପୁର ହାଇକୋର୍ଟ ବାର୍ ଆସୋସିଏସନର ଶତବାର୍ଷିକୀ ପାଳନ ଅବସରରେ ଚନ୍ଦ୍ରଚୂଡ଼ କହିଛନ୍ତି। ତେବେ ନ୍ୟାୟପାଳିକାର ସ୍ୱାଧୀନତା ଏବଂ ବାର୍‌ ସ୍ୱାଧୀନତା ମଧ୍ୟରେ ଘନିଷ୍ଠ ସମ୍ପର୍କ ରହିଛି ବୋଲି ଆମେ ଭୁଲିବା ଉଚିତ ନୁହେଁ ବୋଲି ପ୍ରଧାନ ବିଚାରପତି କହିଛନ୍ତି। ଆଇନର ଶାସନ ଏବଂ ସାମ୍ବିଧାନିକ ଶାସନକୁ ସୁରକ୍ଷିତ ରଖିବା ପାଇଁ ସ୍ୱାଧୀନ ବାର୍ ଏକ ନୈତିକ ବାଡ଼ ଭାବରେ କାର୍ଯ୍ୟ କରେ ବୋଲି ସେ ଗୁରୁତ୍ୱାରୋପ କରିଥିଲେ। ପ୍ରଧାନ ବିଚାରପତି କହିଛନ୍ତି ଯେ ଥରେ ରାୟ ପ୍ରକାଶ ପାଇବା ପରେ ତାହା ସାର୍ବଜନୀନ ସମ୍ପତ୍ତିରେ ପରିଣତ ହୋଇଥାଏ।

ଆମେ ଉଭୟ ପ୍ରଶଂସା ଏବଂ ସମାଲୋଚନା ଗ୍ରହଣ କରିବାକୁ ପ୍ରସ୍ତୁତ। ତେବେ ବାର୍ ଆସୋସିଏସନର ସଦସ୍ୟ ଓ କର୍ମକର୍ତ୍ତା ହିସାବରେ ଆଇନଜୀବୀମାନେ ଅଦାଲତଙ୍କ ରାୟ ଉପରେ ପ୍ରତିକ୍ରିୟା ପ୍ରକାଶ କରିବା ସମୟରେ ସାଧାରଣ ଲୋକଙ୍କଠାରୁ ଭିନ୍ନତା ବଜାୟ ରଖିବା ଉଚିତ। ବାର୍ ଆସୋସିଏସନର ସଦସ୍ୟମାନେ ବିଚାରାଧୀନ ମାମଲା ଏବଂ ରାୟ ଉପରେ ମନ୍ତବ୍ୟ ଦେବାର ପ୍ରବୃତ୍ତି ଦେଖି ମୁଁ ଅତ୍ୟନ୍ତ ବ୍ୟଥିତ ବୋଲି ପ୍ରଧାନ ବିଚାରପତି କହିଛନ୍ତି।