ଦିଲ୍ଲୀରେ ଓଡ଼ିଶା ଦିବସ ସମାରୋହ; ଆଗାମୀ ଦଶନ୍ଧି ଓଡ଼ିଶାର: ମୋହନ

ନୂଆଦିଲ୍ଲୀ: ଓଡ଼ିଆ ଜାତି ଭାବେ ଆମର ସ୍ବପ୍ନ ଅସୀମ ଓ ଲକ୍ଷ୍ୟ ବିଶାଳ। ପରିବର୍ତ୍ତନର ଏହି ଲକ୍ଷ୍ୟକୁ ନେଇ ଆଜି ନୂଆ ସରକାର ଦୃଢ଼ ସଙ୍କଳ୍ପ ଓ ଉତ୍ସାହର ସହ ଉଦ୍ୟମ ଆରମ୍ଭ କରିଛନ୍ତି। ଆଗାମୀ ଦଶନ୍ଧି ହେବ ଓଡ଼ିଶାର। ଆଜି ସ୍ଥାନୀୟ ଜବାହରଲାଲ ‌ନେହରୁ ଷ୍ଟାଡିୟମ୍‌ର ୱେଟ୍‌ଲିଫ୍‌ଟିଂ ଇନ୍‌ଡୋର ଅଡିଟୋରିୟମରେ ଆୟୋଜିତ ଓଡ଼ିଶା ଦିବସ-୨୦୨୫ ସମାରୋହରେ ମୁଖ୍ୟ ଅତିଥି ରୂପେ ଯୋଗଦେଇ ଏହା କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ସେ କହିଲେ, ସ୍ବତନ୍ତ୍ର ଓଡ଼ିଶାର ସ୍ବପ୍ନ ଚରିତାର୍ଥ ପାଇଁ ଉତ୍କଳ ସମ୍ମିଳନୀର ବଡ଼ ଲକ୍ଷ୍ୟ ଓ ଆଭିମୁଖ୍ୟ ସାଢ଼େ ସାତ ଦଶନ୍ଧିର ଯାତ୍ରାରେ ଓଡ଼ିଶା ନିଜର ସାମର୍ଥ୍ୟର ଉପଯୋଗ କରିବାରେ ‌କୋଉଠି ନା କୋଉଠି ବିଫଳ ହୋଇଛି। ଆଜି ଓଡ଼ିଶାରେ ଯେଉଁ ବିରାଟ ପରିବର୍ତ୍ତନ ହୋଇଛି, ସାଢ଼େ ୪ କୋଟି ଓଡ଼ିଆ ଅସ୍ମିତା ଓ ସଂସ୍କୃତିକୁ ନେଇ ଆଜି ଯେଉଁଭଳି ଆସ୍ଥା ପ୍ରକଟ କରିଛନ୍ତି ସେମାନଙ୍କ ସମସ୍ତ ଆଶା ଓ ଆକାଂକ୍ଷାକୁ ନୂଆ ସରକାର ପୂରଣ କରିବ। ଓଡ଼ିଶା ସରକାରଙ୍କ ନୀତି ହେଲା ବିକାଶ ଓ ତାହା ସହିତ ଓଡ଼ିଆ ଅସ୍ମିତା। ଯାହା ‘ଆମେ ଓଡ଼ିଆ, ଆମେ ବଢ଼ିଆ’ ବୋଲି କହିପାରିବା। ସମୃଦ୍ଧ ଓଡ଼ିଶାର ବାସ୍ତବତା ପାଇଁ ରାଜ୍ୟ ସରକାର  ନିରନ୍ତର କାର୍ଯ୍ୟ କରୁଛନ୍ତି ବୋଲି ଶ୍ରୀ ମାଝୀ କହିଥିଲେ। 

ଏହି ଅବସରରେ କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମ ଦିଲ୍ଲୀରେ ପ୍ରଥମଥର ଓଡ଼ିଶା ଦିବସର ଭବ୍ୟ ପାଳନକୁ ନେଇ ଖୁସି ବ୍ୟକ୍ତ କରିବା ସହ ଓଡ଼ିଶାର ଉନ୍ନତି ଓ ଓଡ଼ିଶାକୁ ଆଗେଇନେବା ପାଇଁ ସମସ୍ତଙ୍କୁ ସଂକଳ୍ପ ନେବାକୁ ପଡ଼ିବ ବୋଲି କହିଥିଲେ। ମୋଦୀ ସରକାରଙ୍କ ଅମଳରେ ଓଡ଼ିଶାର ବିକାଶ ବନ୍ଦେ ଭାରତ ଗତିରେ ଚାଲିଥିବା କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ କହିଥିଲେ। ଓଡ଼ିଶାରେ ୭୩ହଜାର କୋଟି ଟଙ୍କାର ରେଳ ପ୍ରକଳ୍ପ ନିର୍ମାଣ କାର୍ଯ୍ୟ ଚାଲିଥିବାବେଳେ ଆଗକୁ ଏକ ଲକ୍ଷ କୋଟି ଟଙ୍କାର ରେଳ ପ୍ରକଳ୍ପ ନିର୍ମାଣର ଯୋଜନା ମୋଦୀ ସରକାରଙ୍କ ରହିଥିବା କହିଥିଲେ।

ଆଗକୁ ଏକ ଲକ୍ଷ କୋଟିର ରେଳ ପ୍ରକଳ୍ପ: ଅଶ୍ବିନୀ 
ଭୁବନେଶ୍ବର ରେଳଷ୍ଟେସନ୍‌‌େର ‌ହେବ ବିଶ୍ବସ୍ତରୀୟ ଆଇଟି ହବ୍‌

ଭୁବନେଶ୍ବର ରେଳଷ୍ଟେସନ୍‌ର ନବନର୍ମିତ କୋଠାର ୫ରୁ ୧୧ ମହଲା ପର୍ଯ୍ୟନ୍ତ ବିଶ୍ବସ୍ତରୀୟ ଆଇଟି ହବ୍‌ ଭାବେ ବ୍ୟବହାର କରାଯିବ ବୋଲି ସେ କହିଥିଲେ। ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା କହିଥିଲେ, ଦିଲ୍ଲୀ ସରକାରଙ୍କ ଦ୍ବାରା ଓଡ଼ିଶା ପର୍ବର ଆୟୋଜନ ପାଇଁ ନିଷ୍ପତ୍ତି ନିଆଯାଇଛି। ଦିଲ୍ଲୀକୁ ସମୃଦ୍ଧ କରିବାରେ ପ୍ରବାସୀ ଓଡ଼ିଆଙ୍କ ପ୍ରମୁଖ ଭୂମିକା ରହିଛି ବୋଲି ସେ କହିଥିଲେ। ଦିଲ୍ଲୀରେ ୧୨ ରୁ ୧୫ ଲକ୍ଷ ଓଡ଼ିଆ ରହୁଥିବା ସେ ସୂଚନା ଦେଇଥିଲେ। ଏହି ଅବସରରେ ଶ୍ରୀପତି ମିଶ୍ରଙ୍କ ପୁସ୍ତକର ଅବତାରଣ କରି ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ଡ. ପିକେ ମିଶ୍ର କହିଲେ, ସ୍ବତନ୍ତ୍ର ରାଜ୍ୟ ଗଠନରେ ଓଡ଼ିଆ ଭାଷା ପ୍ରଚଳନ ପାଇଁ ସମ୍ବଲପୁରରେ ଗଣଆନ୍ଦୋଳନ ଆରମ୍ଭ ହୋଇଥିଲା। ଭାରତର ବିକାଶରେ ପୂର୍ବ ଭାରତ ଗ୍ରୋଥ୍‌ ଇଂଜିନ୍‌ ଭାବେ କାର୍ଯ୍ୟକରିବ ବୋଲି ପ୍ରଧାନମନ୍ତ୍ରୀଙ୍କ ଉକ୍ତିକୁ ସେ ଉଲ୍ଲେଖ କରିଥିଲେ। ବିକଶିତ ଭାରତର ଲକ୍ଷ୍ୟ ସାକାର ହେବ ବୋଲି ସେ ଆଶାବ୍ୟକ୍ତ କରିଥିଲେ।  

ରାଜ୍ୟରେ ବିଜେପି ପ୍ରଥମ ଥର ପାଇଁ କ୍ଷମତାକୁ ଆସିବା ପରେ ଦିଲ୍ଲୀରେ ଓଡ଼ିଶା ଦିବସ ସମାରୋହ-୨୦୨୫କୁ ଭବ୍ୟ ରୂପେ ପାଳନ କରାଯାଇଛି। ଉତ୍ସବରେ ଓଡ଼ିଶାର ସମୃଦ୍ଧ ସଂସ୍କୃତି ଓ ପରମ୍ପରାର ଝଲକ ଦେଖିବାକୁ ମିଳିଥିଲା। ସମାରୋହରେ ବିଜେପି ସାଂସଦ, ରାଜ୍ୟ ବିଜେପି ସଭାପତି ମନମୋହନ ସାମଲ, ପ୍ରଶାସକ, ବୁଦ୍ଧିଜୀବୀଙ୍କ ସମେତ ଦିଲ୍ଲୀ ଓ ଏନ୍‌ସିଆର୍‌ ଅଞ୍ଚଳରେ ବସବାସ କରୁଥିବା ୨୦୦୦ରୁ ଊର୍ଦ୍ଧ୍ବ ପ୍ରବାସୀ ଓଡ଼ିଆ ଯୋଗ ଦେଇଥିଲେ।