ମଝି ଆକାଶରେ ଯୁବତୀଙ୍କୁ ମଦ ପିଇବାକୁ ଦେବା ସହ ନମ୍ବର ଦେବାକୁ ବାଧ୍ୟ କଲେ ପାଇଲଟ

ପୁଣେ: ମଝି ଆକାଶରେ ଯୁବତୀଙ୍କୁ ମଦ ପିଇବାକୁ ଦେବା ସହ ନମ୍ବର ଦେବାକୁ ବାଧ୍ୟ କଲେ ପାଇଲଟ। ବେଙ୍ଗାଲୁରୁରୁ ପୁଣେ ଆସୁଥିବା ଆକାଶ ଏୟାର ବିମାନରେ ଘଟିଛି ଏଭଳି ଘଟଣା। ଜଣେ ୨୦ବର୍ଷୀୟ ଯୁବତୀଙ୍କୁ ବିମାନରେ ଯାତ୍ରା କରୁଥିବା ପାଇଲଟ ହଇରାଣ କରିଥିବା ସାମ୍ନାକୁ ଆସିଛି। ଏମିତି କି ଯୁବତୀଜଣକ ଏହାର ଅଭିଯୋଗ କରିଥିଲେ ବି ତାଙ୍କର ଅଭିଯୋଗ ଉପରେ କାର୍ଯ୍ୟନୁଷ୍ଠାନ ଗ୍ରହଣ କରିନାହିଁ ଆକାଶ ଏୟାର।

ମିଳିଥିବା ସୂଚନା ମୁତାବକ, ଅକ୍ଟେବାର ୧ରେ ଯୁବତୀ ବେଙ୍ଗାଲୁରୁରୁ ପୁଣେ ଆସୁଥିଲେ। ବେଙ୍ଗାଲୁରୁକୁ ୩ମାସର ଇଣ୍ଟର୍ନସିପ୍ କରିବାକୁ ଯାଇଥିଲେ ଯୁବତୀ। ଇଣ୍ଟର୍ନସିପ୍ ସରିବା ପରେ ସେ ନିଜ ଘରକୁ ଫେରୁଥିଲେ। ବିମାନରେ ବସିବା ପରେ ଡିଉଟିରେ ନଥିବା ଜଣେ ପାଇଲଟ ତାଙ୍କୁ ମଦ ପିଇବାକୁ ଅଫର କରିବା ସହ ନମ୍ବର ମାଗିଥିଲେ। ପୀଡ଼ିତାଙ୍କ କହିବା ମୁତାବକ, ବିମାନରେ ଲଗେଜ୍ ରଖିବାରେ ସାହାଯ୍ୟ କରି ପାଇଲଟ କଥାବାର୍ତ୍ତା କରିବା ଆରମ୍ଭ କରିଥିଲେ। ଏହା ପରେ ଆମେ ନିଜ ନିଜ ସିଟରେ ବସିଥିଲୁ। କିଛି ସମୟ‌ ପରେ ଜଣେ କ୍ରୁ ସଦସ୍ୟ ମୋତେ ପଛରେ ଥିବା କ୍ରୁ ଷ୍ଟେସନକୁ ଯିବା ପାଇଁ କହିଥିଲେ। ଲଗେଜ୍ ସହ ଜଡ଼ିତ ସମସ୍ୟା ଥିବ ବୋଲି ଭାବି ମୁଁ ସେଠାକୁ ଯାଇଥିଲି। ହେଲେ ସେଠାରେ ପାଇଲଟ ମୋତେ ମଦ ପିଇବାକୁ ଅଫର ଦେଇଥିଲେ। ମୁଁ ମନା କରି ମୋ ସିଟକୁ ଆସିଯାଇଥିଲି। ଏହା ପରେ ପୁଣି ଥରେ କ୍ରୁ ସଦସ୍ୟ ଆସି ପାଇଲଟଙ୍କ ପାଖରେ ଖାଲି ଥିବା ସିଟକୁ ଯିବାକୁ କହିଥିଲେ। ମୁଁ ମନା କରିବାରୁ ପାଇଲଟ ମୋତେ କାଜରେ ଲେଖି ମୋ ନମ୍ବର ମାଗିଥିଲେ। ଏସବୁ ଘଟିବାରୁ ମୁଁ ଅସହଜ ହୋଇଯାଇଥିଲି। ପରେ ଏହାର ଅଭିଯୋଗ ବିମାନ କମ୍ପାନିକୁ କରିଥିଲେ ବି ଏପର୍ଯ୍ୟନ୍ତ ପାଇଲଟଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ।